48
Yakub minta berkat untuk Manasye deng Efraim
48:1-22
1 Brapa waktu begini, ada orang yang kasi kabar sama Yusup kalo de pu bapa ada sakit para. Itu jadi Yusup langsung bawa de pu anana Manasye deng Efraim ni, pi liat Yakub di Gosyen. 2 Pas dong sampe di sana, ada yang kastau Yakub* 48:2 Yakub - Bahasa Ibrani: Israel. Liat catatan di Kejadian 37:3. Ada juga di 48:8, 10, 11, 13, 14, 20, 21. kalo Yusup dong ada datang mo liat dia. Jadi, Yakub kumpul de pu tenaga untuk duduk di de pu tempat tidur. 3 Baru Yakub de bicara ke Yusup,
“Waktu sa di Betel† 48:3 Betel - Tempat ini de pu nama tu su ganti dari Lus. di tana Kanaan situ, Allah Yang Pu Kuasa Paling Besar,‡ 48:3 Allah Yang Pu Kuasa Paling Besar - Bahasa Ibrani: El-Shaddai. De kas tunjuk De pu Diri ke saya, baru De kasi berkat sama saya. 4 Allah de bilang begini, ‘Pasti Sa nanti bikin ko ada anana cucu yang banyak. Sampe ko nanti jadi moyang dari bangsa-bangsa yang banyak. Sa pasti kasi tana ni ke ko pu anana cucu dorang untuk nanti jadi dong pu tana trus.’✡ 48:3-4 Kejadian 28:13-14
5 Jadi Yusup, ko pu anak Efraim deng Manasye yang lahir di Mesir waktu sa blum datang ke Mesir ni, dong dua tu su jadi sa pu anak, su sama macam Ruben deng Simeon,§ 48:5 sama macam Ruben deng Simeon - Efraim deng Manasye dapat warisan deng berkat dari Yakub sama sperti Yakub pu anana lain karna dong dua su dapat angkat jadi de pu anak. sa pu anana itu. 6 Tapi ko pu anana yang habis dong dua, itu ko punya tetap. Nanti waktu bagi-bagi warisan, ko pu anana cucu yang habis Efraim deng Manasye ni, nanti dapat warisan dari Efraim deng Manasye dong pu bagian.* 48:6 Karna Yusup pu mama cuma punya Yusup deng de pu ade Benyamin saja, jadi Yakub de bikin ini untuk de pu maitua Rahel supaya de pu anana laki-laki juga ada banyak. 7 Waktu sa kembali dari tana Padan,† 48:7 Padan - De pu nama lain tu Mesopotamia. ko pu mama Rahel mninggal di tana Kanaan, waktu tong su mo dekat Efrata. Waktu itu sa rasa sedi skali. Sa kubur ko pu mama di pinggir jalan mo dekat-dekat Efrata situ.”
Efrata pu nama lain Betlehem.✡ 48:7 Kejadian 35:16-19
8 Waktu Yakub liat Yusup pu anak dua, de tanya, “Ini sapa?”
9 Yusup jawab, “Sa pu anana yang Allah kasi sama sa di Mesir sini.”
Yakub bilang, “Kasi dekat dong dua ke sini, sa mo kasi berkat dong dua.” 10 Waktu itu Yakub pu mata su kabur karna de su tua, jadi de tra bisa liat baik. Jadi Yusup kas dekat de pu anana dua itu ke Yakub baru Yakub de peluk dong dua trus de cium dorang. 11 Trus Yakub bilang Yusup, “Sa tra pikir skali kalo sa bisa ketemu ko lagi, tapi skarang ni Allah kasi sa untuk liat ko pu anana juga.”
12 Habis itu Yusup ambil de pu anana dua tu dari de pu bapa pu kaki baru de tunduk ke de pu bapa sampe ke tana. 13 Baru Yusup pegang de pu anak dua itu, di kanan de pegang Efraim trus di kiri de pegang Manasye supaya Manasye pas ada di sebla kanan Yakub trus Efraim di sebla kiri. Baru de bawa dekat ke de pu bapa Yakub. 14 Tapi Yakub de kas ulur de pu tangan kanan baru de taru di Efraim pu kepala, padahal Efraim ni yang bungsu. Trus de taru de pu tangan kiri di Manasye padahal Manasye yang tua. Jadi Yakub de pu tangan tasilang.
15 Habis itu de minta berkat untuk Yusup, de bilang begini,
“Sa pu tete Abraham deng sa pu bapa Isak, dong percaya sama Allah. Allah itu suda, yang jaga sa trus sampe skarang ini. 16 De itu Malaikat yang su kas lepas sa dari bahaya apa saja. Sa minta Allah kasi berkat ke anana ini. Supaya Abraham, Isak deng Yakub, nama-nama ini ni tetap dapa ingat karna ada anana ini! Sa minta supaya dong pu anana cucu tamba banyak skali di bumi ini.”
17 Tapi waktu Yusup liat de pu bapa taru tangan kanan di de pu anak Efraim, yang bungsu, de pikir itu kurang baik jadi de pegang de pu bapa pu tangan untuk kas pinda dari Efraim pu kepala ke Manasye pu kepala. 18 Baru Yusup de bilang sama de pu bapa, “Bapa! Bapa taru tangan di anak yang sala. Ini ni yang anak tua, jadi bapa pu tangan kanan taru di anak yang tua ini.”
19 Tapi de pu bapa tolak de pu tangan. Trus bapa Yakub de bilang,
“Sa tau! Anak Yusup, sa tau. Manasye nanti dapat kuasa yang besar trus de pu anana cucu juga nanti jadi bangsa yang besar. Tapi de pu ade Efraim nanti pu kuasa lebi besar trus de pu ade pu anana cucu nanti jadi bangsa-bangsa yang lebi besar lagi.”
20 Jadi, Yakub kasi berkat sama dong waktu itu, baru bilang begini,
“Orang Israel dong smua nanti pake kam pu nama waktu dong kasi berkat ke orang lain. Nanti dong bilang, ‘Sa minta Allah bikin ko jadi sama macam Efraim deng Manasye.’ ”✡ 48:20 Ibrani 11:21
Waktu bilang Efraim pu nama duluan daripada Manasye pu nama, Yakub bikin Efraim yang ade ni, jadi lebi penting dari de pu kaka Manasye.
21 Baru habis itu Yakub bilang sama Yusup,
“Yusup, sa ni sebentar lagi su mo mninggal. Tapi Allah nanti sama-sama deng kam trus. Allah nanti pimpin kam kembali ke tong pu nene moyang pu tana Kanaan itu. 22 Jadi sa kasi tana Sikem, tempat subur di gunung tu, yang sa ambil dari orang Amori dong, pake sa pu pedang deng pana sendiri. Itu sa kasi ke ko saja, tra ke ko pu sodara-sodara lagi.”
*48:2 48:2 Yakub - Bahasa Ibrani: Israel. Liat catatan di Kejadian 37:3. Ada juga di 48:8, 10, 11, 13, 14, 20, 21.
†48:3 48:3 Betel - Tempat ini de pu nama tu su ganti dari Lus.
‡48:3 48:3 Allah Yang Pu Kuasa Paling Besar - Bahasa Ibrani: El-Shaddai.
✡48:4 48:3-4 Kejadian 28:13-14
§48:5 48:5 sama macam Ruben deng Simeon - Efraim deng Manasye dapat warisan deng berkat dari Yakub sama sperti Yakub pu anana lain karna dong dua su dapat angkat jadi de pu anak.
*48:6 48:6 Karna Yusup pu mama cuma punya Yusup deng de pu ade Benyamin saja, jadi Yakub de bikin ini untuk de pu maitua Rahel supaya de pu anana laki-laki juga ada banyak.
†48:7 48:7 Padan - De pu nama lain tu Mesopotamia.
✡48:7 48:7 Kejadian 35:16-19
✡48:20 48:20 Ibrani 11:21