28
1 Habis itu, Isak panggil Yakub trus kasi berkat ke dia baru pesan de begini,
“Yakub, ko tra bole ambil prempuan Kanaan untuk jadi ko pu maitua. 2 Skarang juga, ko siap-siap, pigi ke Padan-Aram* 28:2 Padan-Aram - Tempat ini de pu nama lain tu ‘Haran,’ yang ada di daera Mesopotamia. ke Betuel, ko pu mama pu bapa. Trus ambil maitua satu untuk ko, dari ko pu mama pu sodara Laban pu anana prempuan.† 28:2 Laban pu anana prempuan - Ini biasa dalam dong pu budaya untuk kawin deng dong pu sodara dekat, macam sepupu ato yang satu bapa tapi beda mama, macam di Kejadian 20:12. 3 Sa minta Allah Yang Pu Kuasa Paling Besar‡ 28:3 Allah Yang Pu Kuasa Paling Besar - Bahasa Ibrani: El-Shaddai. De kasi berkat ke ko. De kasi ko anana cucu yang banyak, sampe ko nanti jadi moyang dari bangsa-bangsa yang banyak. 4 Biar berkat yang De kasi ke Abraham, de turun ke ko deng ko pu anana cucu dorang. Supaya tana yang ko ada tinggal jadi pendatang ni bisa jadi kam pu milik juga, tana yang Allah su kasi ke Abraham ini.”✡ 28:4 Kejadian 17:4-8
5 Jadi begitu suda, Isak de kirim Yakub pigi. Habis itu, Yakub de jalan ke Padan-Aram, ke Betuel pu anak Laban, yang orang Aram itu. De itu Esau deng Yakub pu mama Ribka pu sodara laki-laki.
Esau kawin deng Ismael pu anak prempuan
28:6-9
6 Esau de tau kalo Isak su kasi berkat ke Yakub baru kirim Yakub ke Padan-Aram untuk pi cari maitua di sana. De juga tau waktu Isak kas berkat ke Yakub, de juga pesan begini, “Yakub, ko tra bole ambil prempuan Kanaan untuk jadi ko pu maitua.” 7 Baru de liat kalo Yakub de dengar trus bikin yang de pu bapa deng mama bilang itu, Yakub de pigi ke Padan-Aram. 8 Dari situ yang, Esau de sadar langsung kalo de pu bapa Isak tra suka deng prempuan Kanaan itu. 9 Jadi, Esau de pi ke Ismael yang tete Abraham pu anak untuk ambil Mahalat jadi de pu maitua, tamba deng maitua dua itu.§ 28:9 maitua dua itu - Liat de pu crita di Kejadian 26:34-35. Mahalat tu Ismael pu anak prempuan, Nebayot pu ade.
Yakub de mimpi
28:10-22
10 Waktu Yakub de jalan dari Bersyeba pigi ke kota Haran, 11 de sampe di tempat satu. Karna su mo glap jadi de tinggal satu malam di situ. Yakub de ambil batu satu yang ada di situ untuk taru de pu kepala. Habis itu, de tidur di tempat situ. 12 Begini Yakub de mimpi. Di de pu mimpi tu de liat: Dari bumi ni, ada tangga yang de pu ujung tu sampe ke langit. Begini, ada Allah pu malaikat-malaikat yang jalan turun-naik tangga itu. 13 Trus begini de liat TUHAN ada bediri di sebla baru bilang de begini,
“Sa ini TUHAN, ko pu tete Abraham pu Allah, juga Isak pu Allah. Tana tempat ko ada tidur ni, nanti Sa kasi itu ke ko deng ko pu anana cucu dorang.✡ 28:13 Kejadian 13:14-15 14 Ko pu anana cucu nanti banyak skali, macam debu tana pu banyak begitu. Baru dong nanti tamba banyak ke smua ara, dari timur sampe ke barat trus dari utara sampe ke slatan. Nanti lewat ko deng ko pu anana cucu, nanti Sa kasi berkat ke smua kluarga di dunia ini.✡ 28:14 Kejadian 12:3, 22:18 15 Dengar ini! Sa ada sama-sama deng ko. Ke mana saja ko pigi, Sa yang nanti jaga ko. Nanti Sa bawa ko kembali ke negri ini. Karna Sa ini trakan kas tinggal ko. Mala, Sa juga tetap bikin yang Sa su bilang ke ko itu.”
16 Waktu Yakub de bangun tidur, de bilang begini, “Sunggu! Memang TUHAN ada di tempat ini! Baru, masa sa tra tau tu!” 17 Yakub de rasa takut langsung, trus de bilang begini, “Memang, tempat ini dasyat! Tra sala lagi, pasti ini Allah pu ruma, pasti ini surga pu pintu masuk.”
18 Pas besok, pagi-pagi skali Yakub de bangun trus ambil batu yang de pake taru kepala tu, trus de kas bediri batu itu untuk jadi tanda untuk kas ingat de nanti. Trus de siram minyak ke bagian atas batu itu, untuk kastau kalo batu itu de kas kusus untuk Allah. 19 De kas nama tempat itu Betel,* 28:19 Betel - De pu arti ‘Allah pu ruma.’ dulu tempat ini pu nama Lus.
20 Trus Yakub de ikat janji deng Allah begini,
“Kalo nanti Allah De tetap ada sama-sama deng sa, trus De tetap jaga sa waktu sa ada jalan ni,† 28:20 ada jalan ni - Yakub pu jalan ni de pu jau tu 800 kilometer, mungkin macam dari Jayapura ke Manokwari begitu. trus kalo De kasi sa makanan deng pakean, 21 supaya sa bisa kembali ke sa pu bapa pu ruma deng slamat, brarti nanti TUHAN‡ 28:21 TUHAN ni nama yang kusus untuk orang Israel pu Allah. Dalam bahasa Ibrani nama itu Yahweh. jadi sa pu Allah. 22 Trus batu yang sa su bikin jadi tanda untuk kas ingat nanti, kalo ini tempat untuk semba Allah di sini. Juga, apa saja yang Tuhan kasi, nanti sa kasi satu dari stiap spulu itu ke Tuhan.”
*28:2 28:2 Padan-Aram - Tempat ini de pu nama lain tu ‘Haran,’ yang ada di daera Mesopotamia.
†28:2 28:2 Laban pu anana prempuan - Ini biasa dalam dong pu budaya untuk kawin deng dong pu sodara dekat, macam sepupu ato yang satu bapa tapi beda mama, macam di Kejadian 20:12.
‡28:3 28:3 Allah Yang Pu Kuasa Paling Besar - Bahasa Ibrani: El-Shaddai.
✡28:4 28:4 Kejadian 17:4-8
§28:9 28:9 maitua dua itu - Liat de pu crita di Kejadian 26:34-35.
✡28:13 28:13 Kejadian 13:14-15
✡28:14 28:14 Kejadian 12:3, 22:18
*28:19 28:19 Betel - De pu arti ‘Allah pu ruma.’
†28:20 28:20 ada jalan ni - Yakub pu jalan ni de pu jau tu 800 kilometer, mungkin macam dari Jayapura ke Manokwari begitu.
‡28:21 28:21 TUHAN ni nama yang kusus untuk orang Israel pu Allah. Dalam bahasa Ibrani nama itu Yahweh.