18
Allah janji kasi anak laki-laki untuk Abraham
18:1-15
1 Satu siang pas ada panas pica ni, Abraham de duduk-duduk depan de pu pintu tenda yang dekat pohon-pohon besar di Mamre. Begini, TUHAN kas tunjuk De pu diri ke Abraham. 2 Waktu Abraham de buang mata begini, de liat ada tiga orang bediri tra jau dari dia. Pas de liat dorang, dari de pu pintu tenda tu de pi lari sambut dong. De tunduk hormat sama dong sampe ke tana.✡ 18:2 Ibrani 13:2 3 Trus de bilang, “Tuan, kalo kam mau, mari singga dulu sebentar di sa pu tenda. 4 Biar sa suru orang ambil air untuk cuci tuan-tuan pu kaki trus tuan dong bisa istirahat sebentar di bawa pohon ini.” 5 Baru Abraham bilang lagi, “Tuan dong su datang jadi, biar sa taru makan sedikit supaya tuan-tuan bisa isi tenaga. Habis itu baru, nanti tuan dong lanjut jalan lagi.”
Trus dong jawab, “Iyo, baik! Bikin yang ko bilang itu suda.”
6 Abraham langsung kembali ke tenda cepat-cepat trus bilang ke Sara, “Cepat! Ko pi ambil tepung yang paling bagus satu sak trus bikin roti bulat dari situ!”
7 Habis itu, Abraham de lari ke tempat binatang piara. De ambil sapi muda yang de pu daging bagus skali trus de kasi ke de pu orang kerja. De pu orang ni langsung kas siap daging itu. 8 Dari situ Abraham de pi ambil susu sapi, trus de ambil susu yang su jadi yogurt, deng daging yang su masak itu. Baru de pi taru itu depan de pu tamu-tamu itu. Waktu de pu tamu ni dong makan, Abraham de bediri dekat dong di bawa pohon situ.
9 Baru orang-orang ini tanya Abraham, “Ko pu maitua Sara, ada di mana?”
Abraham jawab, “De ada di sana, dalam tenda situ.”
10 Satu dari dong tiga* 18:10 Satu dari dong tiga - Bahasa Ibrani: De. ‘De’ itu TUHAN. bilang ke Abraham, “Taun depan di waktu yang sama macam skarang ini, Sa pasti datang ketemu ko lagi. Waktu itu, ko pu maitua Sara ni nanti su lahir anak laki-laki satu.”✡ 18:10 Roma 9:9
Waktu itu, tuan itu ada duduk depan tenda, trus Sara de ada duduk dengar dari blakang pintu tenda. 11 Waktu itu, Abraham deng Sara su tua skali, trus Sara su brenti datang bulan. 12 Jadi, waktu dengar itu Sara de rasa lucu trus de tertawa dalam hati, de pikir, “Sa yang su layu begini? Macam sa masi mo rasa snang tidur deng sa pu paitua ka, tamba lagi sa pu tuan Abraham✡ 18:12 1 Petrus 3:6 juga su tua begitu.”
13 TUHAN† 18:13 TUHAN tu sama deng orang yang tadi mulai bicara di ayat 10. tanya ke Abraham,
“Knapa Sara de tertawa? Knapa de tra percaya kalo de bisa lahir anak di de pu umur yang su tua ka? 14 Sa ini TUHAN! Trada yang susa untuk Sa! Taun depan, di waktu yang sa su bilang itu, Sa nanti datang ketemu ko lagi. Waktu itu, Sara de nanti su lahir anak laki-laki satu.”
15 Karna Sara de takut jadi, de alasan bilang, “Sa tra tertawa.”
Tapi TUHAN jawab dia, “Trada. Ko memang tertawa tadi!”
Abraham sembayang untuk kota Sodom
18:16-33
16 Habis itu Abraham antar tiga orang ni dong lanjut jalan lagi.
Pas dong sampe di tempat yang dari jau dong bisa liat kota Sodom di bawa sana, 17 TUHAN De pikir,
“Masa Sa tra kastau Abraham apa yang Sa mo bikin sama kota Sodom? 18 Abraham ini yang, de pu anana cucu nanti pasti jadi bangsa besar yang pu kuasa besar. Trus, lewat de Sa mo kasi berkat buat smua bangsa di dunia ini baru? 19 Tra bisa! Karna Sa su pili de supaya de ajar de pu anana deng cucu-cucu hidup ikut Sa pu mau. Dong pu hidup tu harus benar trus bikin yang adil. Kalo dong bikin smua yang Sa bilang ini, Sa, TUHAN, pasti nanti bikin smua yang Sa su janji ke Abraham itu.”
20 Habis itu, TUHAN bicara ke Abraham begini,
“Abraham, ada banyak orang yang triak tentang Sodom deng Gomora, trus memang dong pu jahat su terlalu banyak skali. 21 Itu jadi, Sa ada mo turun ke sana untuk liat kalo memang yang dong triak tentang Sodom deng Gomora tu betul ka tra.”
22 Trus Abraham pu tamu-tamu ni dong jalan pi ke kota Sodom. Tapi Abraham de masi tetap bediri deng TUHAN di situ. 23 Baru Abraham de ke dekat-dekat baru de tanya TUHAN,
“Betul ka, Tuhan mo kas lenyap orang-orang jahat, lapis deng de pu orang-orang benar juga? 24 Bagemana kalo ada 50 orang benar di kota situ, Tuhan tetap kas lenyap kota itu smua ka? Tuhan betul-betul trakan kas ampun kota itu ka, supaya 50 orang tu slamat? 25 Pasti Tuhan tra mau kas lenyap orang benar sama-sama deng orang jahat to? Su pasti skali, Tuhan tra mungkin bikin begitu. Tra mungkin Tuhan hukum orang jahat deng orang benar sama-sama to? Tuhan tu hakim untuk sluru dunia, pasti bikin yang adil.”
26 Trus TUHAN bilang, “Kalo Sa ketemu 50 orang benar di kota Sodom itu, Sa nanti kas ampun dong satu kota tu smua, karna ada 50 orang benar ini.”
27 Abraham lanjut tanya lagi, “Tuhan, Sa ni memang cuma debu tana saja tapi, jang mara sa ka, karna sa mo tanya lagi. 28 Bagemana kalo hanya ada 45 orang benar di kota Sodom, Tuhan tetap kas lenyap dong smua ka, karna hanya ada 45 orang saja?”
TUHAN jawab, “Kalo sa ketemu 45 orang benar, Sa trakan kas lenyap tana itu.”
29 Abraham lanjut lagi, “Bagemana kalo ada 40 orang benar, Tuhan?”
TUHAN jawab, “Kalo ada 40 orang benar saja, Sa trakan kas lenyap tana itu.”
30 Abraham tanya lagi, “Tuhan, tolong jang mara karna sa mo tanya lagi. Bagemana kalo ada 30 orang benar saja?”
TUHAN jawab, “Kalo sa ketemu 30 orang benar, Sa trakan kas lenyap tana itu.”
31 Abraham tanya lagi, “Tuhan, sa memang su terlalu brani skali tapi, bagemana kalo ada 20 orang benar saja?”
TUHAN jawab, “Kalo Sa ketemu 20 orang benar, Sa trakan kas lenyap tana itu.”
32 Trakir Abraham bilang, “Tuhan, jang mara eh, ini yang trakir sa tanya. Bagemana kalo ada 10 orang benar saja di tana itu?”
TUHAN jawab, “Karna 10 orang benar itu, Sa trakan kas lenyap tana itu.”
33 Habis bicara deng Abraham, TUHAN pigi dari situ trus Abraham de pulang ke de pu ruma.