2
परमेस्वरए मिँ रँःद न्याय मादोव
1 है जैद जे छुतलाई वाज़ ‘इताव हिताव’ है दाज़्यावर जेलाई मनी परमेस्वरए ओङ़ाक काता निउँ ज़ माले। जे नोरास जेय़ेन तोबो ज़ ओतावए नोराए यागल्ती थ·रैद जेराएक जे जेगल्ती ब जे ज़ जेथ·रैज़्या। 2 नितावराए याक्याँत परमेस्वरए ओसजा उहुरिज़्याव ते थिक ज़ है लिन्या गे गेसैंज़्या। 3 हिताव ताकिन जे छुतए ओगल्ती थ·रैद जेएज़्याव य़ेन जे ब जेदोज़्याव ताकिन परमेस्वरए ओसजानी कातानी उस्किउ जेदैरिज़्याव? 4 सैं परमेस्वरए ओदयानी जेगल्ती भरी कुधु ज़ सहिद ओयाचिज़्यावए, ‘गेलाई कैज़ ओमाजैसिज़्याव ओल्यो’ है जेलिज़्याव रो? परमेस्वरए ओदया ते बुरू, ‘कसा ङाल्योदा यायुँ माफर्कैर’ लिद कींद नैचिज़्याव लिन्या जे जेमासैंज़्याव रो? 5 जे ते झन माचाव जेदिउदीए ओल्योदा जेयुँ फर्कैव जेमाभैंःवए, परमेस्वरए मिँरालाई न्यायस फाल्द ओसजा ओसतैंरिज़्याव छ्यामकावए जूँनी उरिस दुपो ज़ जेनैज़्या। 6 परमेस्वरए हो छ्याम मिँरालाई सु सु यादोव मितावनी ज़ यान्या ले। 2:6 भज ६२:१२; हितो २४:१२
7 चाव य़ेनत थ॰रिद ज़गै मगैवलाव माखेम्न्या जुनी खिम्ज़्यावरालाई अजम्बरी जुनी याएरिज़्याव। 8 फरी यालाई वाज़ तान्या खिम्द साचो पाँलाई माभैंःद माचाव य़ेन दाज़्यावराए याक्याँत परमेस्वरए उरिस थुद याएरिज़्याव। 9 माचाव य़ेन दाज़्यावरालाई यहूदीर तादी ब, छुत जातलावर तादी ब बनै दुख तान्या ले। 10 चाव य़ेन दाज़्यावरालाई फरी, यहूदीर तादी ब, छुत जातलावर तादी ब असिक स़ोनो मान याद यायुँ ब होलाँ जैद्यान्या ले। 11 परमेस्वरए मिँ रँःद मादोव, य़ेन रँःद दोज़्याव। 2:11 ब्य १०:१७
12 है जैद परमेस्वरए ओकानुन सैंदकाव पाप दोव भरी हो कानुननी ज़ फाल्सिरिज़्यार। परमेस्वरए ओकानुन मासैंदकाव पाप दोव भरिए बिनु कानुननी ज़ सजा दैरिज़्यार। 13 परमेस्वरए ओकानुन थैद वाज़ परमेस्वरए ओङ़ाक सु ज़ धर्मी माथ॰रिए। ओकानुन दाद वाज़ धर्मी थ॰रिन्या ताए। 14 परमेस्वरए ओकानुन मादैव छुत जातलाव मिँराए मनी परमेस्वरए ओकानुनलाव मिताव य़ेनर यायुँ स्यानी याज़ दान्या यासैंवए नोराए मनी तोबो कानुन यादैव मिताव ज़ ताद ले। 15 परमेस्वरए ओकानुन ते यायुँल ज़ सर्सिउ लिज़्या। है जैद याज़ यायुँल छाप छाप दाद, ‘आव ते चाव ज़ ङादोके, आव ते माचाव ची ङादोके’ लिन्या याज़ सैंज़्यार। 16 आव भरी परमेस्वरए मिँरालाई येसु ख्रीसनी ओराफाल्रिज़्याव छ्याम ज़ तारिज़्या। ङा ङारासथैज़्याव चाव था मिताव ज़, नो छ्याम यायुँलाव म़ोंसिउ पाँ भरी फाल्सिरिज़्यार।
यहूदीर स़ोनो मोसाए ओकानुन
17 जे नलाव यहूदी तावर मोसाए ओकानुनत जेयुँ हुप्द, ‘परमेस्वरए गेलाई वाज़ चाव रँःसिज़्याव’ है ब जेलिज़्याखेहो। 18 नो कानुननी फरी चाव माचाव सैंद, परमेस्वरए उयुँलाव मिताव दान्या य़ेनर ब जेसैंज़्या। 19 ‘यामी मारैंःवरालाई दोरैज़्यावर ब गे ज़, चुम चुमोल लिज़्यावरालाई पलाँ जैद्याज़्यावर ब गे ज़। 20 साचो पाँ स़ोनो सैंन्या भरिए ओथालन परमेस्वरए ओकानुनल गेदैवनी मुर्खरालाई गेरासुधारैज़्या, मासैंज़्यावरालाई गेरापैज़्या,’ है जेलिज़्या। 21 है जैद जे छुतरालाई पैज़्यावर जे जेमापैसिज़्या नी? जे छुतरालाई ‘कुन्या माताए’ है दाज़्यावर जे जेमाकुज़्या नी? 22 जे ‘अर्काए ओज्याए ल्योदा बान्या माताए’ है दाज़्यावर जे जेमाबाज़्या नी? जे अङग्या पुजात जेयुँ माजाम्ज़्यावर मन्दिरलाव अङग्यार कुद जेमारायो·ज़्या नी? 23 जे मोसाए ओकानुन जेदैवनी सघ्योःसिज़्यावर नो कानुन माभैंःद परमेस्वरए उमिन जेमाबले·ज़्या नी? 24 जे मितावराए जेजूँनी धर्मसास्त्रल इताव ब सर्सिउ लिज़्या,
‘जे जेदोव हुनानी
छुत जातलाव मिँराए खार्ल
परमेस्वरए उमिन माचाव थ॰रिके।’ 2:24 यसै ५२:५
25 है जैद नो कानुनलाव पाँ जेदोकिन वाज़ नो यहूदी जैसिन्या क्याल्न्या सरेस ओलेखा ल्यो लिज़्या। कानुनलाव पाँ जेमादोकिन ते नो सरेस जैसिद ब माजैसिउ स्यासोर जेलिज़्या। 26 हो मिताव ज़ फरी, क्याल्न्या सरेस माजैसिउ छुत जातलाव मिँए कानुनलाव य़ेन ओदोकिन, नो मिँ सरेस माजैसिद ब जैसिउ स्यासो ज़ लिज़्या। 27 है जैद निताव क्याँताव सरेस माजैसिउ छुत जातलाव मिँए कानुनलाव य़ेन ओदोकिन, नोए ज़ झन जे मिताव सरेस जैसिउ यहूदी जातलाव कानुन सैंद ब मादोज़्याव मिँरालाई जेपाहा झाःद्यान्या ले। 28 पाखातावए वाज़ साचो यहूदी तान्या माताए। हिताव ज़ सतैंन्याए जूँनी वाज़ क्याल्न्या सरेस जैसिउ ब साचो सरेस माःक। 29 साचो यहूदी तान्या युँल ज़ ताज़्या। साचो क्याल्न्या सरेस ब युँल ज़ ताज़्या। नो सरेस ते पाखाताव कानुननी माताए, छैंव पुरूसनी ज़ ताज़्या। निताव मिँ मिँराए ल्योनी ओमागनिसिदी ब परमेस्वरए ल्योनी ते गनिसिज़्या। 2:29 ब्य ३०:६