1 है जैद ङानैं ङामेंर, हिताव दैन्‍या स्‍यासोर गेतावए परमेस्‍वरए ओपाँत थ॰रिद ल्‍यो ताके। जेस खर्क दैसिन्‍या लिद ङालाई जेमया बनै लागिज़्‍या। ङादोव भरी जेक्‍याँत ओरैंःवए ङायुँ होलाँ ताद ङासुनी च्‍याँःसिउ ज़ लिज़्‍या। 2 खाली जिन इयोदिया स़ोनो सुन्‍तुखेनिलाई है ङादाचिन्‍ज़्‍या, जिन प्रभुए ओपैंज़्‍याव मिताव खैद लिचिन्‍के। 3 नँ ङास नारिसिज़्याव साचो ङानैंलाई मनी है ङादींज़्‍या, आव मेंमानिलाई निसखैयो। चाव था सथैन्‍यात नोनी ङालाई कुधु सघैनाकिनी। नोनिस क्‍लेमेस ब ओल्‍यो। छुतर ब सर्बा ज़ याल्‍यो। आव भरिराए यामिन अजम्‍बरी जुनीलाव पोस्‍तोकोल सर्सिउ लिज़्या।

4 प्रभुस तोबो ताद एकतार रेंद ज़ लिच्‍यो। फरी ब है ङादाचिज़्‍या, रेंद ज़ लिच्‍यो। 5 जे बोमो युँनी जेदोज़्‍याव प़ाइँराए ओसरेस्‍चिरक। गेप्रभु चाँदो ज़ हुरिज़्‍या तामेंःच्‍यो। 6 जे व़ीनी फुइ ताताच्‍यो। बुरू प़ाइँत ज़ धन्‍याबाद चरैःद, जेचाहिज़्याव भरी पोंखारिद ओलस ऩिचिके। 7 हो ताकिन ची जे येसु ख्रीसस सिप जेतावए परमेस्‍वरनी हुज़्याव सैं ज़ मासैंधुन्‍या युँ होलाँनी ज़ जेयुँ जेबिचारलाई जोगोइद नैद्यान्‍या ले।

8 अब ते ङानैं ङामेंर, जो पाँ चाव लिज़्‍या, जो पाँ थ॰रिउ लिज़्‍या, जो पाँ साचो, छैंव, ओपाँःच्‍या माल्‍यो लिज़्‍या — नो पाँ असली, उगुन ल्‍यो उलिकिन जेयुँ होत ज़ थ·रैव ताके। 9 ङा ङाल्‍योनी पैसिद जेदैव पाँर स़ोनो ङा ङादोज़्‍याव भरी किताव जेरँःव, किताव जेथैव जे ब हितावनी ज़ दोच्‍यो। हो ताकिन ची गेयुँ होलाँ जैद्याज़्‍याव परमेस्‍वर जेस ज़ तान्‍या ले।

10 ङाल्‍योदाङाव खेसो जेयुँ फरी जेजागैवए ङायुँर होलाँ जैद परमेस्‍वरलाई धन्‍याबाद ङाचरैःज़्‍या। जे ङालाई मेंःनाकेर है ङालिज़्याव ते माःक, खाली ङालाई सघैन्‍या मौका जेमादैवए ची। 11 ङालाई कातार ओमाथैंनाज़्‍यावए है ङालिज़्‍याव ते माःक। जो मितावल तादी ब सोन्‍तोकोस लिन्‍या पैसिद ङाले। 12 ङा दुखल तादी ब, सुखल तादी ब, ज़्‍याद तादी ब, करे तादी ब, ल्‍योल तादी ब, माल्‍योल तादी ब, प़ाइँल ज़ ङालिधुइ। 13 जो मितावल तादी ब परमेस्‍वरए ओयाँज़्‍याव ओसक्तीनी प़ाइँ ज़ ङादोधुइ। 14 हितावत ब ङा ङादुखल जे जेचिऊनावए चाव ज़ ताके। 15 जे ज़ जेसैंज़्या, ङ़ादा जे फिलिप्‍पीरालाई परमेस्‍वरए चाव ओथा सथैद माकेदोनियानी ङाबाज़्याक ङालाई सघैन्‍या छुत मन्‍दलीर सु ज़ यामालिज़्‍याव, जे वाज़ जेल्‍यो। 16 ङा थेसलोनिकेल ङालिज़्‍याव बेलाक मनी ङालाई माथैंव मायो·वराल परींद्याव ज़ जेनैके। 17 खाली ङा जेल्‍योनी कातार दैन्‍या ङापैंज़्याव ते माःक, बुरू जेलाई झन ज़ असिक घताक है ङालिज़्याव ची। 18 अब ते ङालाई चाहिज़्‍याव भरी प़ाइँ ज़ लिज़्‍या, धोल पोगोल ब ताद ले। नो इपाफ्रोदितसए उकुइत परींद जेयाँव भरी ङादैके। ङालाई परींद जेयाँव भरी परमेस्‍वरए उयुँलाव मिताव ताद ओल परमेस्‍वरलाई चाव सी ङरो जेचरैःव मिताव ज़ ताके। 4:18 प्रस २९:१८ 19 ङालाई सयो·द्याज़्‍याव परमेस्‍वरए जेलाई मनी माथैंव मायो·व भरिल येसु ख्रीसए स्‍वर्गताव ओधननी ज़ सयो·द्यान्‍या ले। 20 परमेस्‍वर गेबाबुलाई खर्क ज़ माखेम्‍न्‍या ज़गै मगै ओताक। आमेन।

21 येसु ख्रीसए उमिनत लिज़्‍यावरालाई जेरो है यारादोच्‍यो। ङास लिज़्‍याव ङानैंराए मनी जेलाई जेरो है दाचिज़्‍यार। 22 आव सहरलाव ख्रीस येसुए छैंव उमीं भरी स़ोनो प़ाइँरानी ते रोमी माहाराजाए उझ़िमलाव य़ेन दाज़्‍यावराए जेरो है दाचिज़्‍यार।

23 गेप्रभु येसु ख्रीसए उयुँ जेल्‍योदा ओगराँक, जेयुँल बास ओदोवक।