1 निस्‍तार यादोज़्‍याव माँदा भरेस ज़्‍यान्‍या पर्ब हुनाद उलिज़्‍याव। 22:1 प्रस १२:१-२७ 2 नो बेलाक ज़ मुख्‍या पुजारीर स़ोनो सास्‍त्रीराए ‘येसुलाई कै जैद सैःन्‍या ओताव?’ लिद बुद्धी याकलैज़्‍याव। ‘मिँराए ङ़ाक सैःकिन मिँर मचिर्‍या’ लिद याछे·ज़्‍याव।

3 हाःत ज़ सैतान नो बाह्र जना उसिसरासकाव यहूदा इस्‍करियोतए ओक्‍याँत पसिके। 4 है जैद नो ननी पुलुस्‍द मुख्‍या पुजारीर स़ोनो ध्‍यान झ़िमलाव पुलिसराए ल्‍योक बाद ‘येसुलाई इतावनी जेकुइत जैद ङायाचिरिज़्‍या’ लिद पाँसिकेर। 5 नोर बनै रेंद नोलाई पैसा यान्‍या जैकेर। 6 इस्‍करियोत ब उचित बुझिद हाःकिन मिँर यामाल्‍यो बेलाक क्‍योःन्‍या मौका उखिम्‍ज़्‍याव।

7 हाःत ज़ नो माँदा भरेस ज़्‍यान्‍या पर्ब सुरू ओतावत पाथा पल्‍न्‍या छ्याम ताके। 8 है जैद येसुए पत्रुस स़ोनो यूहन्‍नानिलाई अइ लिद निपरींक्‍यो, “गे आव पर्ब मानिन्‍याए जूँनी जिन ज़्‍यावर जैनाचिन्‍के,” है उनिदोक ते, 9 “नँ कै नलिज़्या, गिन काङ्ङ बाद जैनान्‍या?” है दोकिनी। 10 येसुए फरी, “जिन सहरल जिन्‍पसिउ प़ाइँना तोबो ऱी गप्‍द ओघागरी छींद बाज़्‍याव मिँ दैन्‍या जिन्‍ले। नोए उछीं उछीं बाद उपसिज़्‍याव झ़िमक ज़ बाचिन। 11 नक बाद नो झ़िमए ओर्गेलाई है दोचिन, ‘नँलाई गेगुर्बाए है दींज़्‍याव, पाहुना लिन्‍या कुन्‍ती काङ्क उलिज़्‍याव? आव पर्ब उसिसरास नल ज़ मानिरिज़्‍याव दी,’ है दोचिन। 12 है जिन्‍दोव प़ाइँना नोए ओतर्ताव तालल तोबो घेप्‍पा कुन्‍ती चावस सजैसिउ जिनलाई सतैंद्यान्‍या ले। गेज़्‍याव भरी नल ज़ जैचिन,” है दाद निपरींक्‍यो। 13 है जैद नोनी बाद है उनिदोव मिताव ज़ दैद, पर्बताव ज़्‍याव भरी जैकिनी।

14 मानिन्‍या बेला ओतावत येसु ओसाचीरास नो कुन्‍तील दुप्‍सिद ज़्‍यावर ज़्‍यान्‍याए जूँनी याच़ुसिउत, 15 येसुए, “आव पर्ब ङाक्‍याँत हुरिज़्‍याव दुखर ओमाताद ज़ जेस मानिउ ङापैंज़्‍याव। 16 ङा जेलाई है ङादाचिज़्‍या, परमेस्‍वरए ओभत्‍यारल उमिनतावर यामादुप्‍सिवा पै ङा जेस फरी सिप ज़्‍यान्‍या ङामाले,” है यादोक्‍यो।

17 नकिन येसुए खुरी उकुइत रैद धन्‍याबाद चरैःद उसिसरालाई याद, “हाँ, आव भाःचिके। 18 ङा जेलाई है ङादाचिज़्‍या, परमेस्‍वरए ओराज्‍या ओमाहुवा पै दाखमद्य फरी ओन्‍या ङामाले,” है यादोक्‍यो। 19 नकिन येसुए उकुइत भरेस तोबो रैद, धन्‍याबाद चरैःद, नो भरेस केःद उसिसरालाई अइ लिद भाःद याएक्‍यो, “आव भरेस जेजूँनी झाःद ङायाचिरिज़्‍याव ङाक्‍याँ ज़। आकिनी ङालाई मामेंःन्‍याए जूँनी आव भत्‍यार दाव य़ेन ज़ दोच्‍यो,” है यादोक्‍यो। 20 हिताव ज़ फरी नो भरेस याज़्‍युवत येसुए खुरी उकुइत रैद, “आव जेजूँनी ङासोभोरिज़्‍याव ङाझी ज़। आनी ज़ परमेस्‍वरए जेस साःरो बाचा नैद्याचिरिज़्‍याव। 22:20 यर ३१:३१-३४

21 “ङालाई धोका याज़्याव मिँ जेखार्ल ज़ लिज़्‍या, ङास सिप ज़ ज़्‍युज़्‍याव। 22:21 भज ४१:९ 22 मिँ मिन्‍सिउए ते गोइँसिउ मिताव सयो·व ज़ परिए, खाली नोलाई धोका याज़्याव मिँलाई ते थैए माँतकन ज़ लिज़्‍या,” है यादोक्‍यो। 23 नकिन उसिसर या याल, “गेनी निताव य़ेन दान्‍या सु ओताव?” है लिकेर।

24 नकिन जाँवाक उसिसर, ‘गे भरिनी सु घेप्‍पा गेलिज़्‍याव?’ लिद याखर्लेसिनाक, 25 येसुए, “आव मानुवाताव चलननी जोर राजा ताज़्‍यार, होर याधूँलावराए याङ़ैत बनै अखत्‍यासो ताज़्‍यार। याधूँलावराए फरी नोरालाई ‘गेधर्मीदातार’ है दाव ज़ परिज़्‍या। 26 खाली जे ते निताव जैसिन्‍या माःक, बुरू जेनी जो स़ेर ताज़्‍या, हो प़ाइँए याधूँलाव ओजैसिक। फरी जोए हक दैज़्‍याव, नो प़ाइँए यासेवा दान्‍या ओजैसिक। 27 भत्‍यारल च़ुसिज़्‍याव घेप्‍पा ओताज़्‍याव, सैं ज़्‍याव लाँज़्‍याव घेप्‍पा ओताज़्‍याव? नो च़ुसिज़्‍याव ज़ घेप्‍पा ताज़्‍या सानी सैं माःक? हैदी ब ङा झन जेसेवा दान्‍या ङाजैसिके।

28 “जे फरी आव मानुवाताव ङादुख भरिल ङास ङासतत लिन्‍यार जेतावए, 29 किताव ङालाई ङाबाबुए ओराज्‍या याद नैनाव, हिताव ज़ ङा ब जेलाई तोबो हक ङायाचिरिज़्‍या। 30 नो ङाराज्‍याल जे ङास ज़ तोबोल सिप ज़ ज़्‍यान्‍या जेले, स़ोनो बाह्र थर इस्राएलीराए याङ़ैतावर ताद याय़ेन फाल्‍द्यान्‍या ब जेले,” है यादोक्‍यो।

31 नकिन येसुए पत्रुसलाई, “अ सिमोन, सिमोन, किताव मनमलाई छिन्‍कैज़्यार, हिताव ज़ सैतानए नँलाई ब जाँचिन्‍या झाःसिद ले। 32 है जैद ङा नजूँनी ङाल्‍योदा नदोव सत ताऱासोक लिद पोंखारिद ङाईंज़्‍या। फरी तखेप नबादी ब ओल्‍द नहुवत नँ ननैंरालाई पाथ पारैव ताके,” है ओदोक ते, 33 पत्रुसए, “प्रभु, नँस झ्यालखानाल बान्‍या ब तयार ज़ ङालिज़्या, नँस सिन्‍या ब तयार ज़ ङालिज़्‍या,” है दोक्‍यो। 34 येसुए फरी, “पत्रुस, नँलाई है ङादींज़्‍या, आछिम रील भाल्‍या ओमाकोद ङालाई स़ोंखेप ‘ङामासरेसे’ है दान्‍या नले,” है दोक्‍यो।

35 नकिन येसुए प़ाइँलाई, “ङा नो ङ़ादा जेलाई पैसा, पोला, झ़ैंर मालाँद ज़ ङापरींचिक, काताराए खाँचो माताया?” है ओरादोक ते, “काताए खाँचो ज़ माताके,” है दोकेर।

36 नकिन फरी, “आकिन ते जेबाक हो मिताव तान्‍या माले। फरी जेबाक पैसाए ओचाहित ब तारिज़्‍या, जेझ़ैं लाँन्‍या ओचाहित ब तारिज़्‍या, स़ोनो जेस तरवाली ओमालिकिन जेक्‍वार यो·द तादी ब लँःद लाँन्‍या बेला हुके। 37 नो ङाजूँनी धर्मसास्‍त्रलाव सर्सिउ पाँ ब यो·नारिके। नलाव सर्सिउ आव ज़,

39 येसु ननी पुलुस्‍द एकतारकाव ओबाज़्‍याव जैतून दाँदादा बाके। उसिसर ब ओलस ज़ बाकेर। 40 नो पोत याकेसोत उसिसरालाई, “पोंखारिचिके, म़ानी दुखराल जेमाथ॰रिधुया,” है दाद, 41 ओल याकिन जाँ अछतङ लुँ झोमक केस्‍न्‍यावाक बाद नामक उघूँदानी तिकिसिद, 42 “अ बाबु, नयुँ ओताकिन आव ङाक्‍याँत हुरिज़्‍याव दुखर वैंद्याँके। खाली ङा ङायुँ माःक, नँ नयुँ ओताकिन वाज़,” है लिद पोंखारिक्‍यो। 43 हाःत ज़ स्‍वर्गनी परमेस्‍वरए तोबो ओचाकर्‍या हुद येसुलाई सघैक्‍यो। 44 उयुँर बनै धो थाइव ताद बनै धामास पोंखारिद ओक्‍याँतिन ओपस्‍योंर ब झी स्‍यासो हुद बाप बाप यातेज़्‍याव। 45 पोंखारिद ओखेमोत उसिसराए ल्‍योक ओबाक नोर प़ाइँ यासोगोए स्‍याँद यालिज़्‍याव रँःद, 46 “काराव जेस्‍याँज़्‍याव? सैंसिद पोंखारिचिके, म़ानी दुखराल जेमाथ॰रिधुया,” है यादोक्‍यो।

47 येसु ओपाँज़्‍याक ज़ मिँर तबगाल हुकेर। नोराए याङ़ा याङ़ा बाह्र जना उसिसरानिकाव यहूदा इस्‍करियोत उहुज़्‍याव। नो येसुए ल्‍योक हुद माइँ ओदोक, 48 येसुए, “अ यहूदा, मिँ मिन्‍सिउलाई माइँ दाव जैसिद धोका याव नपैंज़्‍याव रो?” है ओदोव प़ाइँना, 49 येसुस लिज़्‍यावराए, ‘याक्‍योःरिज़्‍याव ची ओल्‍यो’ लिन्‍या सैंद, “प्रभु, आवरालाई तरवालीए गेरापल रो?” है दाद, 50 तोबोए ते ओतरवाली हाइद प्रधान पुजारीए ओनोकोरलाई वोर्निकाव ओर्ना पल्‍द सतेदिक्‍यो। 51 नो रँःद येसुए, “च़िम दोके, अइ जैन्‍या माःक,” है दाद नो मिँए ओर्ना छाप्‍द्याद सोजोकाव ज़ जैदिक्‍यो।

52 नकिन येसुए ओललाई क्‍योःना हुव मुख्‍या पुजारीर, यहूदीराए यास़ेरर स़ोनो ध्‍यान झ़िमलाव पुलिसरालाई, “काता ङालाई दाँकालाई मिताव तरवालीर खोंतार दाद जेक्‍योःहुनाव? 53 ङा दिनकाव ज़ जेस ध्‍यान झ़िमल ङालिज़्‍याव बेलाक जेमाक्‍योःनाके। हैदी ब गोइँसिउ मिताव चुम चुमोए ओहक चलैन्‍या जेबेला आव ज़,” है यादोक्‍यो।

54 नकिन येसुलाई क्‍योःद प्रधान पुजारीए उझ़िमक लाँकेर। पत्रुस ब याछीं याछीं जाँ तादाङ ओबाज़्‍याव। 55 मिँर प्रधान पुजारीए ओचतराक मेंः दाद यामुइँसिज़्‍याक पत्रुस ब नोराए ल्‍योक ज़ च़ुसिनाके। 56 नलाव तोबो नोकोर्नी मेंमाए पत्रुस मेंःए ओपलाँक च़ुसिद उलिज़्‍याव रँःद नोलाई लँ लँ चिऊद, “आव ब येसुस उलिज़्‍याव,” है ओदोक ते, 57 पत्रुसए, “अ बुची, ङा ते नो है नलिज़्‍याव मिँलाई ङामासरेसे,” है दोक्‍यो।

58 नकिन जाँवाक फरी तोबोए पत्रुसलाई सरेस्‍द, “नँ ते होसकाव ज़ सानी,” है ओदोक ते, पत्रुसए फरी, “ङा ते होसकाव माःक ब्‍याँ,” है दोक्‍यो।

59 नकिन तघन्‍तावाक फरी तोबो हुद, “आव ब पक्‍का नोसकाव ज़, आव ते गालीललाव ज़ ची,” है दाव ज़ ओनैज़्‍याव। 60 पत्रुसए झन, “नँ काता नपाँज़्‍याव इताव, ङा काता ज़ ङामासैंए,” है ओदोव प़ाइँना भाल्‍या ब कोके। 61 हाःत ज़ येसु पत्रुसए ल्‍योदा भाल्‍सिके। पत्रुसए नो रँःद ङ़ादा प्रभुए, “भाल्‍या ओमाकोद ज़ ङालाई स़ोंखेप ‘ङामासरेसे’ है लिन्‍या नले,” है ओदोव चेतैद, 62 लाँःक पुलुस्‍द धस धस घर्के।

63 नकिन येसुलाई गुद नैज़्यावराए प़ोद बरे·द, 64 उमी कप्‍द्याद, “नँलाई प़ोज़्‍याव सु? है लिन्‍के,” है दोकेर। 65 फरी बनै उल्‍लिनी गिल्‍ली दाद ब थल्‍केर।

66 नम उसँव प़ाइँना यहूदीराए यास़ेरर, मुख्‍या पुजारीर स़ोनो सास्‍त्रीराए घ्‍योःव कचरी जैद प़ाइँ दुप्‍सिद, येसुलाई याङ़ाक सच्‍याँद, 67 “नँ नो धर्मसास्‍त्रलाव हुरिज़्‍याव ख्रीस ज़ रो? नँ साचो हो ज़ ताकिन गेलाई है दासिके,” है यादोक ते, येसुए, “है ङादाचिदी ब जे ङालाई पतिन्‍या जेमाले, 68 ङा जेलाई ङासुधिचिदी ब जे जवाप यान्‍या जेमाले। 69 खाली अबकिन मिँ मिन्‍सिउ माहान परमेस्‍वरए ओवोर्दा च़ुसिन्‍या ङाले,” है यादोक्‍यो। 70 हाःत ज़ नलाव भरिए, “हुकी नँ परमेस्‍वरए ओज़ा ज़ रो?” है यादोक ते, येसुए, “हैज़, जे है जेलिज़्‍याव मिताव ज़,” है ओरादोव प़ाइँना, 71 नोर झन, “अब ते गेलाई छुत साची माचाहिए, साची भरी ओयाःनी ज़ गेथैके,” है लिकेर।