1 राउँनी झ्याउँ ओखेमोत पावलए नलाव यायुँ हुबोरालाई दुप्‍द परमेस्‍वरए ओपाँनी यायुँ सझेंःद्याद, बिदा ऩिद माकेदोनिया खन्‍ददा बाके। 2 नदाङाव यायुँ हुबोरालाई मनी परमेस्‍वरए ओपाँर सथैद यायुँ सझेंःद याएक्‍यो। नकिन ग्रीस देसदा बाद, 3 नल स़ोंमैना पै लिके। ननी ऱी जहाजनी सिरिया खन्‍ददा बाव ओपैंज़्‍याक, ‘यहूदीराए पावललाई सैःव पैंज़्‍यार दी’ लिन्‍या थैद नो येमनी माबाद फरी माकेदोनियालाव घ्याँ बान्‍या थ·रैक्‍यो। 4 ओलस छुत मिँर मनी बाकेर। नोराए यामिनर आवर ज़ — बेरिया सहरलाव पुरसए ओज़ा सोपात्रोस, थेसलोनिके सहरलाव अरिस्‍तार्खस स़ोनो सिकन्‍दसनी, दर्बी सहरलाव गायस, तिमोथी, स़ोनो एसिया खन्‍दलाव तुखिकस स़ोनो त्रोफिमसर ज़। 5 नोर गेकिन ङ़ादा बाद त्रोआस सहरल याकींसिज़्‍याव। 6 माँदा भरेस ज़्‍यान्‍या पर्ब ओमाखेमा पै फिलिप्‍पी सहरल गेलिके। पर्ब ओखेमोत ऱी जहाजल पसिद पाँच दिनत त्रोआसल केस्‍द ङ़ादा बावरास दैसिद, नल सात दिन गेलिके।

7 सातालाव उस॰कताव छ्याम ऱिमक त्रोआसलाव यायुँ हुबोरास दुप्‍सिद प्रभु-भोज गेमानिज़्‍याव। पावल हो पराःती बाव ओपैंज़्‍यावए आधा री पै परमेस्‍वरए ओपाँ ओसथैसिज़्‍याव। 8 नो दुप्‍सिद गेलिज़्‍याव ओतर्ताव तालल कुधु बत्तीर तैंःसिउ यालिज़्याव। 9 झ्यालत तोबो धापाज़ाकाव युतिकस यादोज़्‍याव च़ुसिद उउङ्गिज़्याव। पावलए ओपाँ बनै ओख्यो·वए नो छोर्‍या घेप्‍पा ङ़लत बाद स़ोंताल्‍यातिन तेके। नोलाई याच़ानाक सिउ दैकेर। 10 पावल रूतिन झरिद नो छोर्‍यालाई लाप्‍द प़ाइँलाई, “जेयुँ होलाँ जैचिके, उस॰ लिज़्या,” है दाद, 11 फरी रोत बाद येसुए उमिनताव भरेस केःद भाःद्याद, नम उसँवा पै परमेस्‍वरए ओपाँर सथैद ननी पुलुस्‍द बाके। 12 नो छोर्‍या मासिद ओबाँचिउए प़ाइँए यायुँ बनै होलाँ ताद झ़िमक लाँकेर।

13 पावल त्रोआसकिन अस्‍सोस सहरक पै उखँनी ज़ बान्‍या थ·रैद गेलाई ऱी जहाजल बाव परींसिक्‍यो। ओल अस्‍सोसकिन वाज़ ऱी जहाजल पसिन्‍या युँ ओदोवए, 14 नल ओल गेस दैसिद हाःकिन ऱी जहाजल गेस ज़ बाके। मितिलेने सहरल गेकेसोत, 15 हो पराःती खियस तापुए ओसोराक गेबाके। हुकिन सामोस तापुल बाद, हुकिनकाव हो पराःती मिलेतस सहरल गेकेस्‍के। 16 पावलए, ‘एसिया खन्‍दल गेबाकिन यरूसलेमलाव पेन्‍तिकोस पर्बदा गेमाताप्‍नाधुया’ लिद बनै घल्‍सिद एफिसस सहरदा माबान्‍या जैक्‍यो। 17 बुरू एफिससलाव मन्‍दलीलाव स़ेररालाई मिलेतसनी थार परींद ओल्‍योदा ज़ याथाक्‍यो।

18 एफिससलाव मन्‍दलीलाव स़ेरर पावलए ओल्‍योक याकेस्‍हुवत पावलए, “ङा एसियाल ङाकेस्‍हुव छ्यामकिन ङादोव भरी जे ज़ जेसैंज़्‍या। ङा जेस लिद, 19 यहूदीराए ल्‍योनी कुधु दुखर ङादैज़्‍यावत ब, जेजूँनी ङा सज़िम्‍सिद परमेस्‍वरए ओसेवा दाद ङाप़िलर ब ङाऱास्‍के। 20 जेलाई ओचाहित ल्‍यो पाँर सथैन्‍या माअन्‍कनिद ज़ जेदुप्‍सिज़्‍याव पो पोक, जेझ़िमक जेझ़िमक ब ङासथैचिके। 21 जेदेसलाव यहूदीर स़ोनो छुत जातलाव मिँरालाई, ‘जेपापलाई ऱास्‍द, परमेस्‍वरए ल्‍योदा सखैसिद, गेप्रभु येसु ख्रीसए ओपाँत जेयुँ सुहुप्‍चिके,’ लिद प़ाइँलाई ज़ ङारासथैके।

22 “अब ते छैंव पुरूसए है ओदाँव भैंःद यरूसलेमदा ङाबाज़्‍या। होङ केस्‍द ‘अइ ङातारिज़्‍या’ लिन्‍या ते ङामासैंए। 23 खाली जो सहरल ङाबादी ब छैंव पुरूसए, ‘नजुँ आव ज़ — दुखर दैन्‍या स़ोनो झ्‍यालखानाल लिन्‍या’ लिद है दाँज़्याव। 24 हैदी ब ङाजिउए मया माले, खाली ङाय़ेन भरी सुदुम्‍द, प्रभु येसुए ङालाई ओयाँव य़ेनलाई सयो·न्‍यात वाज़ ङायुँ थू ताज़्‍या। नो ओयाँव ङाय़ेन ते, ‘परमेस्‍वर गेल्‍योदा उयुँ ओगराँव’ है लिन्‍या चाव था सथैन्‍या ज़।

25 “अबकिन ते जे परमेस्‍वरए ओराज्‍यालाव पाँ जेल्‍योङाव ङासथैचिउ मिँराए फरी ङाङाः रँःव दैन्‍या जेमाले लिन्‍या ङासैंज़्या। 26 है जैद जे आछिम आव सैंचिके — जे सुवाराए तछा परमेस्‍वरए ओसजा जेदैकिन, नो ङा ङागल्‍ती तान्‍या माले। 27 परमेस्‍वरए ओगोइँ भरी ओपो·स ज़ जेल्‍योङ सथैद ङासयो·के।

28 “है जैद जे परमेस्‍वरए ओबगाललाव यालोम्‍बार, छैंव पुरूसए ओखतैचिउर, जेक्‍याँलाई जोगोइद ख्रीसए उझीए ओरालँःव परमेस्‍वरए ओमन्‍दलीलाई पाथस याराछोच्‍यो। 29 ङा ङाबाव छींनी जेबगालल छे छे ङम्‍सिउ प़र स्‍यासोर पसिद रन्‍दनी बन्‍द जैन्‍या लेर। 30 जेखार्लाव मिँराए मनी ख्वा ख्वार तँदा जैसिद परमेस्‍वरए ओपाँताव मिँरालाई याल्‍योदा जैन्‍याए जूँनी धुत पाँर ब पैन्‍या लेर। 31 है जैद जे सैंसिद लिच्‍यो। ङा जेल्‍योङाव स़ोंरिम भरी लाकनी रील परमेस्‍वरए ओपाँर तोबो तोबोनी पैद ङाप़िलर ङाऱासो ब तामेंःच्‍यो।

32 “अब ते ङा जेलाई परमेस्‍वरए ओपासल ङाझाःचिज़्‍या। गराँव ओपाँ ब जेस ज़ लिज़्‍या। नो पाँए जेलाई थ॰रिउ जैद, परमेस्‍वरए उमिनत लिज़्‍यावरास जेलाई मनी परमेस्‍वरनिकाव जुँ दैन्‍या जैचिरिज़्‍याव। 33 ङा जेस ङालिज़्‍याक सुए जेल्‍योनी ब पैसार क्‍वाराए लोभ ङामादोए। 34 जे ज़ जेसैंज़्‍या, ङा स़ोनो ङानैंरालाई ओचाहिज़्‍याव भरी आव ङाकुइए ज़ य़ेन दाद गेङासिके। 35 है जैद प़ाइँनी ज़ जेल्‍योङ मनी ङासतैंके — गेकुइए य़ेन बनै दाद माधुन्‍यारालाई मनी सघैव ताके। आवए जूँनी गेप्रभु येसुए ओपाँ ब तामेंःच्‍यो — ‘छुतए ल्‍योनी दैन्‍या देखा, छुतलाई यान्‍या पाथ लिज़्‍या।’ ”

36 पावल आव भरी पाँद उघूँदानी तिकिसिद नो भरिरास प़ाइँए पोंखारिकेर। 37 हाःत ज़ यायुँ माचाव दाद पावललाई लाप्‍द, माइँ दाद प़ाइँ ज़ घर्केर। 38 ‘जे ङाङाः फरी रँःव दैन्‍या जेमाले’ है ओल्‍योए, होए ज़ प़ाइँरानी यायुँ माचाव जैद ओरायो। हाःत ज़ पावललाई ऱी जहाजक पै सारैनाकेर।