1 नकिन पावल एथेन्‍स सहरलाई ऱास्‍द कोरिन्‍थ सहरदा बाके। 2 होङ बाद तोबो पोन्‍तस खन्‍दल जर्मिउ अकिलास यादोज़्‍याव यहूदीस दैसिकिनी। ओज्‍याए उमिन प्रिस्‍किला। माहाराजा क्‍लौदियसए यहूदी भरिरालाई रोम सहरनी ओरापले·वए नोनी ज्‍या-री भर ज़ इतालिया देसनी कोरिन्‍थल हुद निलिज़्‍याव। 3 नोनी निय़ेन ब पावलए ओय़ेन स्‍यासो पाल जैन्‍या ओतावए, पावल नोनिस लिद याय़ेन ब सिप ज़ दोकेर। 4 साताकाव तखेप ऩासिन्‍या छ्याम धर्मसास्‍त्र झ़िमल बाद यहूदीर स़ोनो ग्रीकरास खर्लेसिद सभैंःन्‍या ओपैंज़्याव।

5 छींनी सिलास स़ोनो तिमोथीनी पावलए ल्‍योक माकेदोनिया खन्‍दनी निहुवत पावलए ओध्‍यावना परमेस्‍वरए ओपाँ सथैन्‍या वाज़ जैद, यहूदीरालाई ‘येसु ज़ पापनी ऱास्‍ज़्याव ख्रीस’ लिद साची ओराएज़्‍याव। 6 नोर पावलए ओपाँर माभैंःद ओपाँलाई थल्‍द बीज्‍यात जैव यापैंवए पावलए ओक्‍वाताव गालो धुइरोर याङ़ाक थरैद्याद, “जेपाप भरी जे जेङ़ैत ज़ ओताक। जे नो पाँ जेमाभैंःव प़ाइँना फुर्सुल ङाताके। अबकिन ङा छुत जातलावरालाई ची ङारासथैनारिज़्‍या,” है दाद, 7 ननी पुलुस्‍द धर्मसास्‍त्र झ़िम लापकाव तीतस युस्‍तसए उझ़िमक बाके। नो मिँ ब परमेस्‍वरए ओमान नैज़्याव ज़ ओल्‍यो। 8 धर्मसास्‍त्र झ़िमलावराए याघेप्‍पा ब तोबो क्रिस्‍पसए उझ़िमलाव भरिरास परमेस्‍वरए ओपाँत यायुँ हुप्‍के। कोरिन्‍थलाव छुत छुतराए मनी परमेस्‍वरए ओपाँ थैद, यायुँ हुप्‍द ऱील सछैंसिकेर।

9 तछा रील पावलए दर्सनल प्रभु ओपाँज़्‍याव रँःक्‍यो। प्रभुए, “पावल, नँ माछे·द ज़ आव सहरल ङापाँ सथैव ज़ घरानैयो, च़िम दान्‍या माःक। 10 ङा नँस ज़ ङालिज़्‍या। सुए ज़ नँलाई कैज़ जैन्‍या मालेर। आव सहरल ङामींर कुधु ज़ तान्‍या लेर,” है दोक्‍यो। 11 है जैद पावल नो सहरल अथार मैना लिद परमेस्‍वरए ओपाँ पलास्‍द ओराएज़्‍याव।

12 अखैया खन्‍दल गलियोन हाकिम उलिज़्‍याव बेलाक, यहूदीर पावलकिन तँदा जैसिद पावललाई क्‍योःद अदालतदा लाँद, 13 “आव मिँए परमेस्‍वरए ओसेवा तँदा बङ्गैद मोसाए ओकानुनकिन छुत येम यापैज़्‍याव,” है लिकेर। 14 पावलए जवाप याव ओपैंज़्‍याक ज़ गलियोनए ओल ज़, “अ यहूदीर, आव मिँए मादान्‍या य़ेनर ओदोव ताकिन ङा जेपाँ सहिद ङायाचिखेहो। 15 खाली जे जेधर्म रोक मेक ताद, काता काताराए यामिनर ओत़ोसिक जे ते जम्‍मा इ़सिउ वाज़ जेपैंज़्‍या। ङा निताव पाँ कै जैद थैन्‍या? जे ज़ सैंच्‍यो,” है दाद, 16 अदालतनी यापले·क्‍यो। 17 हाःत ज़ झन नोराए धर्मसास्‍त्र झ़िमलाव याघेप्‍पा सोस्‍थेनेसलाई क्‍योःद अदालत ङ़ाक ज़ प़ोकेर। खाली गलियोनए घाइ ज़ मारादोक्‍यो।

18 पावल कोरिन्‍थ सहरल सर्बा ज़ लिद यायुँ हुबोराए ल्‍योनी बिदा ऩिद, ‘सिरिया खन्‍ददा ओल्‍द बान्‍या’ लिद ऱी जहाजल पसिके। ओलस अकिलास स़ोनो प्रिस्‍किलानिलाई ब निलाँक्‍यो। नोकिन ङ़ादा कोरिन्‍थ लापकाव किंक्रिया सहरल किर्‍या झाःद ओचेम ब एन्‍क्‍यो। 18:18 गन्‍ती ६:१८ 19 नकिन ऱी जहाजल एफिसस सहर पै बाद अकिलास स़ोनो प्रिस्‍किलानिलाई नल ज़ निख्यानैक्‍यो। ओल ते जाँवा पै वाज़ लिद धर्मसास्‍त्र झ़िमल बाद यहूदीरास खर्लेसिकेर। 20 नकिन नोराए, “गेस ज़ जाँवा पै ल्‍यो ताके,” है यादोक ते, पावलए माभैंःद, 21 “परमेस्‍वरए उयुँ ओताकिन फरी ङाहुया ज़,” है दाद ऱी जहाजल पसिद एफिससनी बाके।

22 सिरिया खन्‍दलाव कैसरियाल केस्‍द जहाजतिन झरिद यरूसलेम पै बाद नलाव मन्‍दलीस दैसिद एन्‍तिओखियादा बाके। 23 नल जाँवा लिद गलातिया स़ोनो फ्रिगिया खन्‍द जीलाव पो पोक लिज़्‍याव येसुए ओपाँत बाज़्‍याव भरिरास दैसिद परमेस्‍वरए ओपाँत यायुँ सझेंःद याएक्‍यो।

24 अलेक्‍जेन्‍द्रिया सहरलाव तोबो अपोल्‍लोस यादोज़्‍याव यहूदी एफिससल केस्‍हुके। नो मिँए ओपाँ बनै ङमो, धर्मसास्‍त्रलाव पाँ ब बनै ओसैंज़्‍याव। 25 प्रभुए ओपाँ ब सर्बा ज़ सिऊसिद बनै जाँगरस येसुए ओपाँर सथैद चावस ज़ पलास्‍द ओराएज़्‍याव। खाली यूहन्‍नाए ओरासछैंज़्याव वाज़ ओसैंज़्‍याव। 26 नोए धर्मसास्‍त्र झ़िमल बनै घ्‍योःव युँस परमेस्‍वरए ओपाँ ओरासथैज़्‍याव। अकिलास स़ोनो प्रिस्‍किलानी नोए ओपाँ थैद नोलाई निझ़िमदा लाँद येसुए उजूँनी ओमासैंज़्‍याव पाँ भरी पलास्‍दिकिनी।

27 नकिन अपोल्‍लोस अखैयादा बान्‍या युँ दोक्‍यो। है जैद नलाव यायुँ हुबोराए उयुँर सझेंःद्याद, ‘आव मिँलाई चावस नैच्‍यो’ लिद होङाव यायुँ हुबोरालाई तोबो चिथी परींद याराएकेर। अपोल्‍लोस होङ केस्‍द परमेस्‍वरए उयुँ ओगराँवनी यायुँ हुबोरालाई कुधु ज़ यासघैक्‍यो। 28 प़ाइँए याङ़ाक यहूदीराए यापाँ पल्‍तैद्याद, ‘येसु ज़ परमेस्‍वरए खतैद उपरींव ख्रीस’ लिद धर्मसास्‍त्रनी थ·रैद याएक्‍यो।