1 नकिन पावल स़ोनो सिलासनी दर्बी स़ोनो लुस्‍त्रा सहरल बाकिनी। नल परमेस्‍वरए ओपाँत तोबो उयुँ हुबो तिमोथी यादोज़्‍याव उलिज़्‍याव। होए ओआमा पाला उयुँ हुबो यहूदिनी ओल्‍यो, ओबाबु ग्रीक जातलाव ओल्‍यो। 2 लुस्‍त्रा स़ोनो आइकोनियनलाव यायुँ हुबोराए तिमोथीलाई बनै चाव मिँ थ·रैद यानैज़्‍याव। 3 पावलए मनी नो मिँलाई ओलस बान्‍या ओनैं जैव ओपैंज़्‍याव। खाली नजीदाङाव यहूदीराए ग्रीक जातलाव ओबाबुलाई प़ाइँए ज़ यासरेस्‍ज़्‍याव। है जैद नोरालाई सभैंःन्‍याए जूँनी तिमोथीलाई क्‍याल्‍न्‍या सरेस जैदिक्‍यो। 4 हाःकिन नोनी सहर सहर, पो पोङ ‘यरूसलेमलाव येसुए ओसाचीर स़ोनो नलाव स़ेरराए याथ·रैव पाँर दोच्‍यो’ लिद याराअर्थैकिनी। 16:4 ओसा १५:२३-२९ 5 ननी ज़ मन्‍दलीर यायुँर झन ज़ हुप्‍नाद, या ब झन ज़ बा·नाकेर।

6 छैंव पुरूसए पावल स़ोनो सिलासनिलाई एसिया खन्‍दल परमेस्‍वरए ओपाँ सथैन्‍या उनिवैंवए फ्रिगिया स़ोनो गलातिया खन्‍दलाव घ्याँ बाकिनी। 7 नकिन माइसिया खन्‍द निकेसोत बिथिनिया खन्‍दल बाव निपैंज़्‍याक येसुए उपुरूसए फरी ब निवैंक्‍यो। 8 है जैद माइसियानी पुलुस्‍द त्रोआस सहरल बाकिनी।

9 नल निलिज़्‍याक तछा रील पावलए दर्सनल माकेदोनियालाव मिँलाई च्‍याँःसिद उलिज़्याव रँःक्‍यो। नोए, “जिन माकेदोनिया खन्‍दल हुद गेलाई ब परमेस्‍वरए ओपाँ सथैव ताके,” है लिद बिन्‍ती दोक्‍यो। 10 है जैद पावलए निताव दर्सन उरँःव छींनी, “परमेस्‍वरए गेलाई नदा मनी चाव था सथैना उपरींसिज़्‍याव ओल्‍यो,” लिन्‍या थ·रैद हतप्‍त ज़ बान्‍या गेझाःसिके।

11 त्रोआसकिन ऱी जहाजल पसिद एकसब्‍द्या ज़ सामोथ्राके तापुदा गेबाके। नकिन हो पराःती नियापोलिस सहरदा गेबाके। 12 नकिन बल्‍ल माकेदोनिया खन्‍दलाव तोबो फिलिप्‍पी यादोज़्‍याव मुख्या सहरल गेकेस्‍के। नलाव मिँर जाँकोसै रोमी जातलावर यालिज़्‍याव। नो सहरल सर्बा ज़ गेलिके।

13 ऩासिन्‍या छ्याम सहरलाव य़ामनी पुलुस्‍द, ‘भै छ्योक पोंखारिन्‍या पो लिज़्याखेहो’ लिद नदा ज़ गेबाके। नङ दुप्‍सिद लिज़्‍याव मेंमारालाई मनी परमेस्‍वरए ओपाँ गेरासथैके। 14 नोरास परमेस्‍वरए ओमान नैज़्याव थिआतीरा सहरनी हुव तोबो लिदिया यादोज़्‍याव मेंमाए बनै धिद ओथैज़्याव। नो मेंमाए घ्‍यामो क्‍वाए बेपार ओदोज़्‍याव। प्रभुए नोलाई पावलए है ओरादोज़्‍याव पाँर बुझिन्‍या युँ जैदिक्‍यो। 15 ओल स़ोनो उझ़िमलाव भरी ऱील सछैंसिद, “ङालाई परमेस्‍वरलाई उयुँ हुबो मेंमा जेथ·रैनाकिन ङा ङाझ़िमक हुद गेस ज़ ल्‍यो ताके,” है दाद गेलाई मालाँद मातान्‍या जैक्‍यो।

16 फरी तछा नो पोंखारिन्‍या पोदा गेबाज़्‍याक तोबो जोखना चिऊन्‍या पुरूस दैव बाँदानी ल़ुज़ास गेदैसिके। नो ल़ुज़ाए, ओल्‍योक हुज़्‍यावरालाई हुन्‍या पाँर पाँद्याद ओघरपतीरालाई कुधु पैसा कमैद ओराएज़्‍याव। 17 हो छ्याम नो मेंमा गेछीं गेछीं हुद बनै चोइस, “आवर माहान परमेस्‍वरए ओनोकोरर ज़। यासथैचिज़्‍याव पाँर अजम्‍बरी जुनील सकेस्‍न्‍या पाँर ज़,” है लिद उक़िज़्‍याव। 18 कुधु दिन पै निताव क़िउ ज़ उलिज़्‍याव। तछा पावलए उयुँ कोला कोला ताद नो मेंमाए ल्‍योदा भाल्‍सिद ओक्‍याँताव च़रिउ पुरूसलाई, “ङा नँलाई येसु ख्रीसए उमिननी है ङादींज़्‍या, नोए ओक्‍याँतिन पुलुस्‍द बान्‍के,” है ओदोव प़ाइँना ज़ पुलुस्‍द बाके।

19 नो ल़ुज़ाए ओघरपतीराए निताव रँःद, ‘गेपैसा हुन्‍या येम सूइद्यासिकिनी’ लिद पावल स़ोनो सिलासनिलाई क्‍योःद बजार खार्ल स़ेले स़ेले अदालतल लाँद, 20 हाकिमराए याङ़ाक सच्‍याँद, “आव यहूदीनी गेसहरलाव मिँरालाई गरबर याराजैज़्यानी। 21 गे रोमीराए गेकानुनस माखैव, गेमाभैंःज़्याव रितिथितीर यारापैज़्यानी,” है यारादोकेर।

22 हाःत ज़ नलाव माहोल्‍याराए नोनी निक्‍याँत भोरो·सिउ पैंकेर। है जैद हाकिमराए नोनी निक्‍वार सिउःद्याद स्याकोराए रीःव यारापरींकेर। 23 बनै ज़ प़ोद झ्यालखानाल झाःद पाल्‍यालाई बनै चावस गुव परींकेर। 24 है जैद नो पाल्‍याए नोनिलाई प़ाइँरानी उजींलाव कुन्‍तील झाःद, निखँत हला झाःद निएक्‍यो।

25 आधा रील पावल स़ोनो सिलासनी पोंखारिद परमेस्‍वरए उमिनत भजन निगैज़्‍याक, नीस लिज़्‍याव उपुर्काव कैदीराए याथैज़्‍याव। 26 हाःत ज़ उमँःजानी बनै घ्‍योःव भोंचालो हुद झ्यालखाना भरी बनै थोनो·सिद य़ामर ब यानी ज़ फैसिकेर। कैदीराए यासाँगलर ब पला·सिकेर। 27 हाःत ज़ नो पाल्‍या सैंसिद य़ाम भरी फैसिउ रँःद, “ओहो! कैदीर पुलुस्‍द याधोंःव ची ओल्‍यो,” लिद ओखोर्च्‍यो हाइद ओल ज़ सैःसिउ ओपैंज़्‍याव। 28 पावलए निताव रँःद बनै चोइस क़िद, “थारे थारे, तासैःसिनी। गे प़ाइँ आल ज़ गेलिज़्‍या,” है ओदोक ते, 29 नो पाल्‍याए ओनैंरालाई बत्ती रैव परींद, बनै भुम भुम गूद झ्यालखानाल धोंःनाद पावल स़ोनो सिलासनी निखँत फुलुप्‍सिके। 30 नोनिलाई ननी पले·द, “दे ङाधर्मीनी, ङा कै जैद बाँचिन्‍या ओताव?” है उनिदोक ते, 31 “प्रभु येसुलाई नयुँ सुहुप्‍द ओक्‍याँत नख्यासिकिन नँ स़ोनो नझ़िमलावरास बाँचिद अजम्‍बरी जुनी दैन्‍या जेले,” है दाद, 32 नो पाल्‍यालाई उझ़िमलाव भरिरास परमेस्‍वरए ओपाँ यारासथैकिनी। 33 निताव आधा रील मनी नो पाल्‍याए पावल स़ोनो सिलासनिलाई निघाइर छेद निएक्‍यो। हो प़ाइँना ज़ पाल्‍या उझ़िमलावरास ऱील सछैंसिद, 34 पावल स़ोनो सिलासनिलाई उझ़िमक लाँद, ज़्‍यावर जैद निएक्‍यो। उझ़िमलावरास परमेस्‍वरए ल्‍योदा यायुँ यासुहुबोए बनै रेंकेर।

35 नम छेलाला उसँक हाकिमराए, “पावल स़ोनो सिलासनिलाई निऱास्‍के,” लिद सिपाईंरालाई झ्यालखानादा है दानाव यारापरींकेर। 36 है जैद पाल्‍याए नो था दैद पावललाई, “हाकिमराए जिनलाई ‘ऱास्‍न्‍या’ लिद था परींद नैर। है जैद जिन आनी पुलुस्‍द चावस बाचिन्‍के,” है उनिदोक ते, 37 पावलए नो सिपाईंरालाई, “गिन रोमी नागरिकनिलाई मनी नाःकाव जनताराए ङ़ाक अऩाकल ज़ गिनलाई प़ोद गिनन्‍याय माफाल्‍द ज़ झ्यालखानाल झाःसिन्केर। अब कै जैद गिनलाई अलगज़ा पले·व यापैंज़्‍याव? माता। पले·न्‍या ताकिन याज़ ओपले·सिहुरक,” है ओरादोक ते, 38 नो सिपाईंराए हाकिमरालाई है यारादोनाकेर। नोराए नोनी रोमी नागरिकनी निल्‍यो लिन्‍या यामासैंज़्‍याव। है जैद नो पाँ थैद, हाकिमर बनै छे·द,* 16:38 रोमी नागरिकरालाई रोमी कानुननी न्‍याय यामादोवा पै सजा यान्‍या ओमाताज़्याव, झ्यालखानाल झाःन्‍या ब ओमाताज़्याव। है जैद नो हाकिमराए या यान्‍याय मनी ताए सैं लिन्‍या ओछ्यास उलिज़्याव। 39 याज़ निल्‍योक बाद माफी ऩिद लाँःदा पले·द, “गेसहरलाई ऱास्‍द बाचिन्के,” है दाव ज़ यारानैकेर। 40 है जैद नोनी झ्यालखानानी पुलुस्‍द लिदियाए उझ़िमक बाद येसुए ओपाँत बाज़्‍यावरास फरी तखेप दैसिद यायुँर सझेंःद्याद बाकिनी।