1 साऊलए हाःपै प्रभुए ओपाँत लिज़्यावरालाई यामिन सम़ैद्यान्‍याए जूँनी उसुनी बनै फों फों ओमोज़्‍याव। है जैद प्रधान पुजारीए ल्‍योक बाद, 2 दमस्‍कस सहरलाव धर्मसास्‍त्र झ़िमलाव घेप्‍पारालाई सतैंद्यान्‍याए जूँनी पुर्जी कागत ऩिद ओनैज़्याव। नोए येसुए ओपाँत बाज़्‍याव खेपा मेंमारालाई साप्‍द क्‍योःद, यरूसलेमदा लाँन्‍या ओपैंज़्याव। 3 येमत ओबाज़्‍याक दमस्‍कस केस्‍न्‍यावाक उमँःजानी बनै मी झीःन्‍या ज़गै नमतिन म्‍याल्‍याकनी मिलिक हुके। 4 साऊल होक ज़ धलिद कातानी तोबो गाए, “ए साऊल, ए साऊल, नँ काराव ङाखिरी नपसिज़्‍याव?” है लिद ओपाँज़्‍याव थैक्यो। 5 साऊलए फरी, “नँ सु प्रभु?” है ओदोक ते, नो गाए, “ङा नो ङाखिरी नपसिज़्‍याव येसु ज़। 6 नँ सोद सहरल बान्‍केदा, नङ ज़ नँ दान्‍या य़ेन भरी थैन्‍या नले,” है दोक्‍यो।

7 साऊलस बाज़्‍याव ओनैंराए ते नो गा थैज़्‍यावत ब सुलाई ज़ यामारँःवए नोर बनै तोतास्‍केर। 8 हाःत ज़ साऊल सोद च्‍याँःसिद आदा होदा ओभाल्‍सिक उमी ज़ मारैंःके। है जैद ओनैंराए उकुइनी दोरैद दमस्‍कसल लाँकेर। 9 स़ोंला भरी उमी मारैंःद, ज़्‍याव ब माज़्‍युक्‍यो, ऱी ब माओक्‍यो।

10 दमस्‍कसल येसुए ओपाँत बाज़्‍याव तोबो हननिया यादोज़्‍याव उलिज़्‍याव। नोलाई दर्सनल परमेस्‍वरए, “अ हननिया,” है ओदोव ओथैक, “काराव प्रभु?” है दोक्‍यो। 11 परमेस्‍वरए फरी, “नँ सोद बजारलाव दाँव येम यादोज़्‍याव दोहाल बाद यहूदाए उझ़िमल पसिद, ‘तार्ससलाव साऊल काङ्क उलिज़्‍याव?’ है यादोनाके। नो साऊलए भर्ज़ा ज़ पोंखारिज़्‍याव। 12 होए मनी दर्सनल नँलाई ज़ रँःनिज़्‍याव। नँ ओल्‍योक बाद, नकुइ ओक्‍याँत नैद उमी सरैंःद नएरिज़्‍याव ब सतैंद ङाएके,” है दोक्‍यो।

13 हाःत ज़ हननियाए, “ओहो प्रभु! आव है नलिज़्‍याव मिँए उजूँनी कुधु ज़ थैद ङानै। नोए यरूसलेमलाव छैंव नमींरालाई बनै ज़ दुख याएज़्‍याव दी। 14 झन आल मनी मुख्या पुजारीराए ल्‍योनी नमिन हाइज़्‍याव भरिरालाई क्‍योःन्‍या हक ब रैद नैव दी,” है ओदोक ते, 15 परमेस्‍वरए, “नँ घबानी, नो मिँलाई ङाय़ेनत छाँतिद ङानै। नोए ङामिन छुत जातलावर, इस्राएलीर स़ोनो राजाराए ल्‍योदा सथैन्‍या ले। 16 नोए ङामिनताव दैन्‍या दुख भरी नोलाई ङा ज़ सतैंद्यान्‍या ङाले,” है दोक्‍यो।

17 है जैद हननिया ननी पुलुस्‍द परमेस्‍वरए ओपैव झ़िमक बाद, साऊलए ओक्‍याँत उकुइ नैद, “अ भाइ साऊल, नँ आदा येमत नहुज़्‍याकाव नङ़ाक सरैंःसिउ प्रभु येसुए ङालाई नल्‍योदा नमी सरैंःद्यान्‍याए जूँनी स़ोनो छैंव पुरूसए घब्‍याल्‍क लिद उपरींनाव,” है ओदोव प़ाइँना ज़, 18 साऊलए उमीनी सींका मिताव कातार तेद उमी रैंःके। हाःत ज़ ननी च्‍याँःसिद ऱील सछैंसिनाद, 19 ज़्‍यावर ज़्‍याद ओर्सार पुलुस्‍के।

साऊल येसुए ओपाँत लिज़्‍यावरास जाँवा पै दमस्‍कसल लिद, 20 धर्मसास्‍त्र झ़िम झ़िमल बाद, “येसु परमेस्‍वरए ओज़ा ज़,” लिद ओरासथैज़्‍याव। 21 ओपाँ थैज़्‍याव भरी बनै अचम्‍ब ताद, “आव ते नो यरूसलेमल येसुए उमिनत लिज़्‍यावरालाई खेमो पैंज़्‍याव मिँ माःक रो? आवए ते आल मनी नितावरालाई क्‍योःद, मुख्या पुजारीराए याकचरील स़ेले स़ेले लाँन्‍याए जूँनी हुव ची सानी,” है लिकेर। 22 खाली साऊलए ओसक्ती झन ज़ घ्‍योःनाद, “येसु परमेस्‍वरए ओज़ा ख्रीस ज़,” लिद थ·रैद ओरायोनी दमस्‍कसलाव यहूदीराए यायुँ बनै आँचानी पाँचा जैद याएक्‍यो।

23 छींनी सर्बा कुधु दिन ओतावत नलाव यहूदीराए साऊललाई सैःन्‍या बुद्धी कलैकेर। 24 खाली नो पाँ ओल साऊलए मनी थैद ओनैज़्‍याव। है जैद नोराए, ‘जुनी ब सैःन्‍या ज़’ लिद नो सहरनी पुलुस्‍न्‍या येम भरिल पाल्‍यार नैद लाकनी रील वैंसिद यालिज़्‍याव। 25 खाली ओनैंराए तछा रील साऊललाई भेल झाःद नो सहर घिरिसिउ भार्नातिन झरैकेर।

26 साऊल दमस्‍कसनी पुलुस्‍द यरूसलेमल बाद येसुए ओपाँत बाज़्‍यावरास तखेप सरेस्‍सिउ ओपैंज़्‍याव। खाली नोलाई यायुँ माहुप्द, “आव ते येसुए ओपाँत साचो लिज़्याव माःक सानी,” है लिद छे·केर। 27 बारनाबासए वाज़ साऊललाई पतिद येसुए ओसाचीराए ल्‍योक लाँद, “आव मिँ दमस्‍कसदा ओबाज़्‍याक प्रभु येसु ओल्‍योक सरैंःसिद, ओलस ज़ पाँके दी। दमस्‍कसल मनी येसुए उमिन माछे·द ज़ यासथैक्‍यो,” है यादोक्‍यो। 28 है जैद साऊल नोरास यरूसलेम सहरल आदा होदा लिद, नल ब प्रभुए उमिन माछे·द ज़ यासथैक्‍यो। 29 खाली नलाव ग्रीक खामनी पाँज़्‍याव यहूदीरास याखर्लेसिक ते नोराए झन साऊललाई सैःन्‍या निउँ याखिम्‍ज़्याव। 30 ओनैंराए नो पाँ थैद साऊललाई ननी पले·द कैसरिया सहरक पै सारैद, नकिन उझ़िम तार्सस सहरदा परींकेर।

31 हाः बेलाक यहूदिया, गालील स़ोनो सामरिया खन्‍दलाव मन्‍दली जाँवा पै रान छानस लिन्‍या ताके। येसुए ओपाँत बाज़्यावर परमेस्‍वरलाई यायुँल चेतैद, छैंव पुरूसनी यायुँर झेंःद, झन ज़ याबा·नाज़्‍याव।

32 पत्रुस नजीदा आदा होदा उलिज़्‍याक लुद्दा नाखारल परमेस्‍वरए उमिनत लिज़्‍यावरास दैसिनाके। 33 नल तोबो एनियास यादोज़्‍याव उखँ उकुइ सिउ, आथ बर्स भरी घ्याँसिद लिज़्‍याव मिँलाई दैक्यो। 34 पत्रुसए नोलाई रँःद, “अ एनियास, येसु ख्रीसए नँलाई सगराँनिज़्‍याव। नँ सोद नतैंर यारूल्‍के,” है ओदोव प़ाइँना ज़, नो मिँ थर च्‍याँःसिके। 35 नकाव लुद्दा स़ोनो सारोन नाखारल लिज़्‍यावराए निताव रँःद यायुँ हुप्‍द प्रभुए ओपाँत हुकेर।

36 फरी योप्‍पा सहरल तोबो तबीता यादोज़्‍याव परमेस्‍वरए ओपाँताव मेंमा ओल्‍यो। ग्रीक खामनी होए उमिन दोरकास है यादोज़्‍याव। नो मेंमा बनै उयुँ गराँद प़ाइँलाई सघैव ज़ ओरानैज़्‍याव। 37 तछा नो मेंमा ओजोरो हुद सिके। मिँराए ओमोरोलाई हुर्द ओतर्ताव ताललाव कुन्‍तील नैकेर। 38 हाः बेलाक पै पत्रुस योप्‍पाकिन नजिकक लिज़्‍याव लुद्दाल उलिज़्‍याव सैंद नलाव यायुँ हुबोराए ऩेब्‍लो मिँनिलाई, “जिन पत्रुसलाई, ‘हतप्‍त ज़ हुन्‍साँ दी’ है दोचिन,” है लिद क़िनाव यारापरींकेर। 39 है जैद पत्रुसए नो पाँर थैद नोनिस बाके। योप्‍पाल याकेसो प़ाइँना पत्रुसलाई नो सिउ मेंमालाई यानैज़्‍याव ओतर्ताव कुन्‍तील लाँकेर। नल नो नाखारलाव राँदी मेंमार दोरकासए जैद ओरायो क्‍वार सतैंद याघर्ज़्‍याव। 40 पत्रुसए नोरालाई लाँःदा परींद नो सिउए ओलापक उघूँदानी तिकिसिद परमेस्‍वरलाई पोंखारिद, सिउए ल्‍योदा भाल्‍सिद, “अ तबीता, सोनिके,” है ओदोव प़ाइँना नो मेंमा सैंसिद भाल्‍सिके। पत्रुसलाई उरँःव प़ाइँना सोद च़ुसिके। 41 हाःत ज़ पत्रुसए नोलाई उकुइनी क्‍योःद सच्‍याँद, नो लाँःक लिज़्‍याव परमेस्‍वरए उमिनताव राँदी मेंमारालाई खुल्‍द सिउनी बाँचिउलाई सतैंद याएक्‍यो। 42 नो पाँ योप्‍पा भरिल प़ाइँदा ज़ थास्‍द कुधुए प्रभुलाई यायुँ हुप्‍के। 43 नो भरी ओतावत पत्रुस कुधु दिन पै योप्‍पाल तोबो स्‍यालोए य़ेन दाज़्‍याव सिमोन यादोज़्‍यावए उझ़िमक ज़ लिके।