15
छुतलाई सपारैन्या
1 गे परमेस्वरए ओपाँत थ॰रिउराए चाव माचाव माछुतैधुज़्यावराए यापाँ सहिद्याव ताके। क्याँलाई तान्या वाज़ दान्या माःक। 2 गे प़ाइँए छुतलाई सपारैन्याए जूँनी ओललाई तान्या य़ेन दाद्याद खुसी जैव ताके। 3 ख्रीसए मनी ओललाई तान्याए जूँनी मादोक्यो। हिताव ज़ धर्मसास्त्रल ब अइ लिद सर्सिउ लिज़्या,
“नँलाई याथल्निउ भरी
ङा ङाक्याँत ज़ हुद ले।” 15:3 भज ६९:९
4 नो भाःङाव धर्मसास्त्रलाव सर्सिउ भरी गेजूँनी ज़ लिज़्या। ननी ज़ य़ेन भरी पैसिद गेयुँर होलाँ ओताज़्यावए दुखर उहुदी ब ननी ज़ थ॰रिद गेआस लिज़्या। 5 है जैद युँ होलाँ जैद्याद थ॰रिउ जैज़्याव परमेस्वरए, येसु ख्रीसए उमींर जेतावए जेलाई तयुँ ओजैचिउक। 6 हो ताकिन ची जे प़ाइँए ज़ तयुँ तपाँ जैद गेप्रभु येसु ख्रीसए ओबाबु परमेस्वरलाई उमिन सघ्योःद्यान्या जेले।
जे जेल सुम्सिचिके
7 है जैद जे परमेस्वरए उमिन सघ्योःद्यान्याए जूँनी किताव ख्रीसए गेलाई सहिद उसुम्सिउ, जे जेल ब सुम्सिचिके। 8 ङा जेलाई है ङादाचिज़्या, ख्रीसए मनी यासाखा पुर्खारालाई परमेस्वरए ओरायो य़ाका भरी साचो ज़ थ·रैद्यान्याए जूँनी यहूदीराए यासेवा दान्या जैसिहुके। 9 छुत जातलावराए मनी ‘परमेस्वरए ओदया गेलाई ब ताके’ लिद उमिन सघ्योःद्यान्या लेर। धर्मसास्त्रल मनी अइ लिद सर्सिउ लिज़्या,
“ङा छुत जातलावराए याखार्ल मनी
नमिन सघ्योःद्यान्या ङाले।
नमिनताव भजन ब गैन्या ङाले।” 15:9 २ समू २२:५०; भज १८:४९
10 फरी तोथोल इताव मनी लिज़्या,
“अ छुत जातलाव मिँर, परमेस्वरए उमींरास जे ब रेंचिके।” 15:10 ब्य ३२:४३
11 फरी तोथोल इताव मनी लिज़्या,
“अ छुत जातलाव मिँर,
परमेस्वरए उमिन सघ्योःदिचिके।
संसार भरिलाव मिँराए मनी उमिन ओसघ्योःरक।” 15:11 भज ११७:१
12 यसैयाए मनी अइ लिद सर्द नैव,
“यिसैए* 15:12 यिसै दाऊद राजाए ओबाबु ज़। ओथोनी तोबो हुरिज़्या।
नो छुत जातलावराए याङ़ैताव ब तारिज़्या।
नोए ओक्याँत छुत जातलावराए ब आस दान्या लेर।” 15:12 यसै ११:१०
13 जेलाई मनी नो आस दाद जेनैज़्याव परमेस्वरए, ओललाई जेयुँ जेसुहुबोए जेयुँ होलाँ जैद रेंद लिन्या ओजैचिउक। हो ताकिन ची छैंव पुरूसए ओसक्तीनी जेआस ब झन ज़ घ्योःन्या ले।
आव ङासरो पाँर सम्जैन्याए जूँनी ज़
14 अ ङानैं ङामेंर, जे परमेस्वरए ओपाँर सैंद, धर्मलाव य़ेनर दाद, जे जेल जेसुदारैसिज़्याखेहो लिद ङायुँ हुबो ज़ लिज़्या। 15 हितावत मनी परमेस्वरए ङालाई उयुँ नाद ओखतैनावए जेलाई सम्जैन्याए जूँनी तोबो ऩेब्लो जाँ नास्न्या मिताव पाँर सर्द नैद ङायाचिए। 16 नो ओखतैनाव य़ेन जे मिताव छुत जातलाव मिँरालाई येसु ख्रीसए ओपाँ सथैद ओसेवा दान्या ज़। है जैद नलाव ङाय़ेन पुजारी य़ेन स्यासो लिज़्या। जेलाई छैंव पुरूसनी जेखत माल्यो छैंवर जैद परमेस्वरए उयुँलाव मितावर ङाजैचिज़्या।
17 है जैद परमेस्वरए उजूँनी ङादोज़्याव ङाय़ेनत येसु ख्रीसए उमिनत ङासुनी च्याँःसिउ ज़ लिज़्या। 18 खाली ङा ङादोवत माःक, ख्रीसए ङाक्याँताव ओदोव य़ेनत वाज़ सघ्योःद ङापाँज़्या। है जैद ख्रीसए ङाक्याँताव ओदोव ङाय़ेननी स़ोनो ङापाँनी छुत जातलाव मिँराए मनी परमेस्वरए ओपाँ भैंःकेर। 19 नो पाँत छैंव पुरूसए ओसक्ती हुद अचम्बलाव सरेसर य़ेनर ब सतैंद याएक्यो। है जैद यरूसलेमकिन इल्लुरिकन खन्द पै ख्रीसए चाव ओथा प़ाइँनी ज़ सथैद ङारानै। 20 छुतए ओथालिउलाई पुरा जैद ङामीं ङामाजैए। बुरू जोल ख्रीसए उमिन माथासो लिज़्या, होल ज़ सथैन्या ङायुँ लिज़्या। 21 धर्मसास्त्रल मनी इताव सर्सिउ लिज़्या,
“ओथा मादैतावराए मनी ओललाई रँःन्या लेर,
ओपाँ माथैतावराए मनी बुझिन्या लेर।” 15:21 यसै ५२:१५
जेस दैसिन्या ङायुँ लिज़्या
22 है जैद परमेस्वरए ओपाँ माथासो पो पोङ सथैन्या ङातावए जेल्योदा हुन्या ङामाताप्के। 23 अब ते नाः भरिल सथैन्या ङाय़ेन खेम्द ङानै। है जैद ङ़ादाकिन ज़ जेस दैसिन्या युँ ङादोज़्यावए, 24 ङा छींनी स्पेन देसदा ङाबाक जेल्योलाव घ्याँ हुद जेस दैसिन्या आस ङादोज़्या। हो बेलाक जाँवा लिद गेमयार सैःद ननी ङाबाक ङालाई जेसघैनाए सैं है ङालिज़्या।
25 खाली ङा आथ पाला यरूसलेमलाव परमेस्वरए छैंव उमिनतावराए जूँनी तखेप नदा ङाबाज़्या। 26 नलाव माथैंव मायो·वरालाई माकेदोनिया स़ोनो अखैयालाव मन्दलीराए ङाकुइत रूप्यार परींद याराएज़्यार। 15:25-26 १ कोर १६:१-४ 27 नो य़ेन यायुँ स्यानी ब दोज़्यार, दाव परिन्यानी ब दोज़्यार। निताव छुत जातलाव मिँराए परमेस्वरए ओअसिक यहूदीराए ल्योनी यादैवए, नोराए मनी यहूदीरालाई माथैंव मायो·वल यान्या ज़्यासो लिज़्या। 28 है जैद ङा नो रूप्यार लाँद ङारायोत, स्पेनदा ङाबाक जेल्योलाव घ्याँ ङाहुरिज़्या। 29 हो बेलाक ख्रीसए ओयाँज़्याव कुधु असिकरास जेल्योङ हुन्या ङाले।
ङाजूँनी पोंखारिद्याँच्यो
30 अ ङानैं ङामेंर, जेस ङाबिन्ती लिज़्या — गेप्रभु येसु ख्रीस स़ोनो छैंव पुरूसए ओयाचिउ मयानी ङा ङादुखराल सघैन्याए जूँनी परमेस्वरलाई पोंखारिद्याव ताके। 31 जेपोंखारिक, ङा यरूसलेमदा ङाबाक यहूदियालाव येसुए ओपाँ माभैंःज़्यावरानी कै मै ताताक, स़ोनो लाँद ङाराएज़्याव रूप्या नलाव परमेस्वरए छैंव उमींरालाई याचाहिज़्याव मिताव ज़ ओताक लिद पोंखारिद्याँच्यो। 32 हो ताकिन ची परमेस्वरए उयुँ ओताकिन ङा जेल्योङ ङाहुक सिप गेयुँर होलाँ जैद रेंन्या गेले। 33 युँ होलाँ जैद्याज़्याव परमेस्वर जेस ज़ बास ओदोवक। आमेन।