7
यहूदीराए यापुर्खारानी हुव चलन
(मत्ती १५:१-९)
1 यरूसलेमनी हुव फरिसीर स़ोनो सास्त्रीर येसुए ल्योक यादुप्सिउत, 2 येसुए ख्वा ख्वा उसिसराए याकुइ माचोखोइसिद काँ याज़्युज़्याव यारारँःकेर। 3 फरिसीर स़ोनो उपुर्काव यहूदी भरिराए यासाखा पुर्खारानी हुव चलन दाद याकुइ यामाचोखोइसिवा पै काता ज़ यामाज़्युज़्याव। 4 फरी बजारनी याहुवत ब ऱीए यामाचोखोइसिवा पै काता ज़ यामाज़्युज़्याव। छुत भाःकिनकाव चलनर ब कुधु ज़ यादोज़्याव, कैताक जार याचोखोइज़्याव, कैताक खुरीर भोप्कार याचोखोइज़्याव।
5 है जैद नो फरिसीर स़ोनो सास्त्रीराए येसुलाई, “नसिसराए काराव गेसाखा पुर्खारानी हुव चलन यामादोज़्याव? आवराए याकुइ माचोखोइसिद ज़ ज़्युज़्यार,” है यादोक ते, 6 येसुए, “जे मिताव कैफतीराए जूँनी यसैयाए ङ़ादा ज़ थिक सर्द नैद्याचिउ। नोए ओसरो आव ज़,
‘आवराए यायाःए वाज़ ङामान नैद्याँज़्यार।
यायुँ ते ङाकिन तादाङ लिज़्या।
7 मिँराए याससैव चलनलाई सघ्योःद,
अऩाकल ज़ ङासेवा दोज़्यार।’ 7:6-7 यसै २९:१३
8 है जैद जे परमेस्वरए ओकानुनलाई ऱास्द झन मिँराए याजैव चलनलाई जेमानिज़्या। 9 निताव दान्यात बनै ज़ जेजम्कैज़्या — परमेस्वरए ओकानुनलाई ख्याद, जेचलनलाई जेसघ्योःज़्या। 10 अछादी परमेस्वरए ओकानुन सर्ज़्याव मोसाए इताव सर्द नैव,
‘बाबु आमाए ओमान नैद्याव ज़ परिए।’
स़ोनो,
‘जोए ओबाबु ओआमाए उमिन बले·दिज़्याव, होलाई सैःव ज़ परिए।’ 7:10 प्रस २०:१२; २१:१७; लेबी २०:९; ब्य ५:१६
11-12 जे ते झन, ‘जोए ओबाबु ओआमानिलाई, ‘जिन ङानिकाव दैव परिन्या भरी कुर्बान ताद ले,’ है उलिकिन, नो मिँलाई ओबाबु ओआमानी निभार मालागिद काता ज़ याव मापरिए,’ है जेलिज़्या। (कुर्बानए ओअर्थ — ङाधन भरी परमेस्वरए उमिनत नैसिउ लिज़्या।) 13 है जैद जे निताव जेसाखा पुर्खारानी हुव चलननी परमेस्वरए ओपाँलाई अऩाकलाव ज़ जेजैज़्या। हो मिताव य़ेन छुत मनी कुधु ज़ जेदोज़्या,” है यादोक्यो।
मिँलाई बले·न्या पाँर
(मत्ती १५:१०-२०)
14 नकिन येसुए नक लिज़्याव माहोल्यारालाई ओल्योदा खुल्द, “आव ङापाँ जे भरिए थैद चावस थ·रैच्यो, 15 पाखानी क्याँल पसिज़्यावए मिँलाई माछैंव माजैधुव। मिँलाई माछैंव जैज़्याव ते क्याँनी पुलुस्ज़्यावए ची। 16 [आव पाँ जोए थैन्या उयुँ लिज़्या, चावस ओथैवक,”] है लिद यासथैक्यो।
17 हाःत ज़ येसुए नो माहोल्यारालाई ख्यानैद तोबो झ़िमल उपसिउत उसिसराए नो पाँए ओअर्थ सुधिकेर। 18 येसुए, “जे मनी अझ ङापाँ जेमातीधुज़्याव रो? याःनी पसिज़्याव ज़्यावए मिँलाई माबले·व लिन्या जेमासैंए रो? 19 नो ज़्याव युँदा माबाए, अइज़ फूल पसिद छींनी पुलुस्द बाज़्या।” नो पाँनी ज़ येसुए ज़्याव भरी चोखो ज़ थ·रैक्यो। 20 फरी, “मिँलाई बले·ज़्याव ते युँल सिर्जैद याःनी पुलुसज़्याव पाँए ची। 21 युँलाव माचाहिउ पाँर आवर ज़ — माचाव चेतैन्या, पातर्या पातर्नी जैसिन्या, कुन्या, मिँ सैःन्या, अर्काए ओज्याए ल्योदा बान्या, 22 अर्काए उमीं कोसै रँःन्या, माचाव य़ेन दान्या, धुत पाँन्या, जोत ब युँ मानैधुन्या, मी तून्या, अर्काए उमिन बले·द्यान्या, स॰द सघ्योःसिन्या, उर्ती माल्यो जैसिन्या, 23 आवर ज़ युँनी पुलुस्द मिँलाई बले·न्या पाँर।”
छुत जातलाव सिरियालाव मेंमा
(मत्ती १५:२१-२८)
24 येसु ननी पुलुस्द तुरोस स़ोनो सीदोन खन्द त॰दा बाके। नल तोबो झ़िमल पसिद, ‘आल ङाहुव सुए ज़ यामासैंकिन ताखेहो,’ है उलिज़्यावत ब माम़ोंसिधुके। 25 बेहार ज़ तोबो मेंमाए, ‘येसु हुके दी’ लिन्या थैद ओल्योक हुद उखँत फुलुप्सिके। नोए मेंमा ओज़ालाई माचाव पुरूसए क्योःद ओनैज़्याव। 26 ओल मेंमा फरी ग्रीक जातलाव ओल्यो, उझ़िम सिरिया फोनिके खन्दल ओल्यो। नोए, “अ प्रभु, ङाज़ाए ओक्याँताव माचाव पुरूस पले·द एके,” लिद बिन्ती चरैःव ज़ ओनैज़्याव। 27 येसुए फरी, “ल़ुज़ाराए याज़्युज़्याव ज़्याव नैंद काःरालाई* 7:27 यहूदीर या सघ्योःसिद छुत जातलावरालाई काः मितावर याङम्सिज़्याव। खाली आव पाँ येसुए नो मेंमालाई सज़िम्न्याए जूँनी माःक, उयुँ उहुप्ज़्याव सैं ओमाहुप्ज़्याव लिद ओजाँचिउ ची। यान्या माताए। ङ़ादा ल़ुज़ार घवाँःरक,” है ओदोक ते, 28 नो मेंमाए, “हैज़ प्रभु, हैदी ब ल़ुज़ाराए यासय़ेलो ज़्यावर तेबल खँकाव काःराए मनी ज़्याव दैर सानी,” है ओदोक ते, 29 येसुए, “आव नपाँए ज़ नज़ाए ओक्याँताव माचाव पुरूस पुलुस्द बाधुके, नँ नझ़िमदा चावस बान्के,” है ओदोक ते, 30 नो मेंमा उझ़िमक ओबाक ओज़ालाई तैंत घ्याँसिद उलिज़्याव रँःक्यो। माचाव पुरूस ओबाधुव ओल्यो।
येसुए ओर्ना माथासोलाई थैन्या ओजैव
31 नकिन येसु तुरोसनी पुलुस्द सीदोन स़ोनो देकापोलिसलाव घ्याँ गालील दह छ्योक बाके। 32 नलाव मिँराए येसुए ल्योक तोबो ओर्ना माथासो स़ोनो मापाँधुन्यालाई रैद, “आवए ओक्याँत नकुइ नैद सगराँके,” है यादोक ते, 33 येसुए नोलाई माहोल्यारानी अछतङ लाँद ओआङुला ओर्ना कुँल झाःद्याद ओसेत उत़िल झाःद्याद, 34 नमदा परमेस्वरए ल्योदा भाल्सिद, ख्यो·व स॰ दोहोरैद नो मिँलाई, “इफ्फाता,” है दोक्यो। (इफ्फाताए ओअर्थ — नर्ना ओफैसिक।) 35 हो प़ाइँना ज़ नो मिँए ओर्ना फैसिद थैन्या ताके। ओसेर ब पलास्सिद चावस ज़ पाँके। 36 हाःत ज़ येसुए नक लिज़्यावरालाई, “आव ङादोव य़ेन सुलाई ज़ है तारादोच्यो,” है लिद याअर्थैक्यो। खाली नोराए खा ओराअर्थैव हाःज़ नो पाँलाई फींजैद यारासथैकेर। 37 नोर बनै अचम्ब ताद, “काता आः चाव य़ेन ओदोज़्याव। यार्ना माथासोरालाई ब थैन्या याजैज़्याव, मापाँधुन्यारालाई ब पाँधुन्या याजैज़्याव,” है यालिज़्याव।