1 येसु उसिसरास दह होफताव गेरासेनस यादोज़्‍याव पोङ केस्‍द, 2 येसु दोङ्गातिन उझरिउ प़ाइँना ज़ माचाव पुरूसए क्‍योःद ओनैज़्‍याव तोबो मिँ खादर पोनी पुलुस्‍द येसुए ल्‍योक दैसिहुके। 3 नो मिँ एकतार खादर जीदा ज़ उलिज़्‍याव। नोलाई सुए ज़ साँगलए ब यामाकिधुज़्‍याव। 4 कुधु पाला साँगलए किद, हलाल याझाःदी ब, साँगलर पाता पत॰ ओराफ्या·ज़्‍याव, हलार ब कुतु कुतु केःद ओराख्‍याज़्‍याव। है जैद सुए ज़ यामाहारैधुज़्‍याव। 5 नो लाकनी रील खादर जीदा, हाँ जीदा चिर चिर क़िद लुँ लुँराए उरूम्‍सिज़्‍याव।

6 नोए येसुलाई तादानी उरँःव प़ाइँना ओल्‍योक धोंःहुद उखँत फुलुप्‍सिद, 7 बनै चोइस, “अ येसु, माहान परमेस्‍वरए ओज़ा, ङास नखै काता उलिज़्‍याव? परमेस्‍वरए उमिननी है ङादींज़्‍या, ङालाई दुख तायाँ,” है दोक्‍यो। 8 नो माचाव पुरूसलाई येसुए ङ़ादा ज़, “ए माचाव पुरूस, आव मिँए ओक्‍याँतिन पुलुस्‍द बान्‍के,” है दाद ओनैज़्‍याव। 9 येसुए फरी, “नमिन कै?” है ओदोक ते, “ङामिन फौजी, गे कुधु ज़ गेलिज़्‍या,” है दोक्‍यो। 10 नोराए, “गेलाई आव पोनी तापले·सियो,” है लिद बिन्‍ती दोकेर।

11 नो बेलाक ज़ नक तोबो दाँदात ऊर तबगाल यालाज़्‍याव। 12 नो माचाव पुरूसराए, “गेलाई बुरू नो ऊराए क्‍याँत बाव यासिके,” लिद बिन्‍ती यादोक ते, 13 येसुए भैंःद याएक्‍यो। है जैद नो माचाव पुरूसर नो मिँए ओक्‍याँतिन पुलुस्‍द ऊराए क्‍याँत बाकेर। हो प़ाइँना ज़ ऊ भरी बूलिद दाँदातिन सुइँःकिनाद दहल ज़ो·द प़ाइँ ज़ स़ुद सिकेर। नो ऊर ऩेहजाराकाव बगाल याल्‍यो।

14 निताव रँःद नो ऊ गावलार धोंःनाद सहर जीदा, नाखार जीदा बाद नो यारँःव भरी है यारादोकेर। नो पाँ थैव भरी कै ओताव लिद चिऊना हुवर, 15 येसुए ल्‍योक याबाक नो माचाव पुरूसराए याऱासो मिँ ओक्‍वार क्‍वाइसिद सोजोकाव ज़ च़ुसिद उलिज़्‍याव रँःकेर। निताव रँःद नोर छे·केर। 16 नो चिऊना हुवरालाई, नो य़ेन रँःव भरिए, “बूलिउलाई इताव इताव ताके, ऊरालाई इताव इताव ताके,” लिद है यारादोकेर। 17 है जैद नो गेरासेनस खन्‍दलाव मिँराए येसुलाई, “आनी पुलुस्‍द बान्‍के,” है लिद बिन्‍ती दोकेर।

18 येसु दोङ्गाल उपसिज़्‍याक नो माचाव पुरूसराए याऱासो मिँए, “ङालाई ब नँस लाँनाके,” है लिद बिन्‍ती ओदोक ते, 19 येसुए भैंःद मायाद, “बुरू नँ नझ़िमदा बाद ननैं नमेंरालाई, ‘परमेस्‍वरए ङालाई उयुँ नाद ङाजूँनी आःल्‍दिउ य़ेन दाद्याँक्‍यो,’ है लिद यासथैनाके,” है दोक्‍यो। 20 है जैद नो मिँ देकापोलिस खन्‍दल बाद ओल उजूँनी येसुए ओदोव य़ेन यासथैक्‍यो। थैज़्‍याव भरी अचम्‍ब ताकेर।

21 येसु दोङ्गाल ओल्‍द दह आफत उहुत मिँर बनै माहोल्‍या दुप्‍सिहुकेर। ओल दह छ्योक ज़ उलिज़्‍याव। 22 नाःत ज़ धर्मसास्‍त्र झ़िमलाव तोबो याघेप्‍पा याइरस यादोज़्‍याव नक हुद येसुलाई रँःद उखँत फुलुप्‍सिद, 23 “ज़िम्ज़ा मेंमा ङाज़ा सिउ पैंज़्‍याव। नँ हुद नोए ओक्‍याँत नकुइ नैद नएकिन नो गराँद बाँचिन्‍या ले,” लिद बिन्‍ती ओदोक ते, 24 येसु नोस ज़ बाके।

मिँर बनै माहोल्‍या येसुए उछीं उछीं येमत बनै याछुइसिनाज़्‍याव। 25 नो माहोल्‍याराए याखार्ल तोबो बाह्र बर्स भरी ओक्‍याँतिन झी भोन्‍या बेथाए क्‍योःद ओनैज़्‍याव मेंमा ब उलिज़्‍याव। 26 नो मेंमा सगराँसिन्‍याए जूँनी वासः जैज़्‍याव कुधुराए ल्‍योक ओलसकाव लिज़्‍याव भरी ओपो·स ज़ खेम्‍द ब जात्त ज़ मागराँके, झन ज़ हया गती तानाद उलिज़्‍याव। 27 है जैद नोए येसुए ओदोव य़ेन भरी थैद माहोल्‍याराए खार्ल पसिद येसुए उछींनी हुद ओक्‍वात छाप्‍दिक्‍यो। 28 नो मेंमाए उयुँल उयुँल, “येसुए ओक्‍वा वाज़ छापो ङादैकिन आव बेथानी गराँन्‍या ङाले,” है उलिज़्‍याव। 29 ओछापो प़ाइँना नो झी भोन्‍या बेथा ब गराँके, ओगराँव ओक्‍याँत ब दार्सिके।

30 हाःत ज़ येसुए ओक्‍याँतिन सगराँन्‍या सक्ती पुलुस्‍द ओबाव दार्सिद नो माहोल्‍याराए खार्ल उछींदा फर्किद, “ङाक्‍वात सुए ओछापो?” है ओरादोक ते, 31 उसिसराए, “आः याछुइसिज़्‍यावल कै जैद ‘सुए ओछाप्‍नाव,’ है नलिज़्‍याव?” है यादोक ते, 32 येसुए झन ‘सुए ओछाप्‍नाव?’ है लिद आदा होदा याचिऊक्‍यो। 33 नो मेंमा ‘ङागराँके’ लिन्‍या सैंद ओछ्याचेए गूए गूए येसुए उखँत फुलुप्‍सिद ओक्‍याँत ताव पाँ भरी ओपो·स ज़ है दोक्‍यो। 34 येसुए नोलाई, “अ माँ, ङालाई नयुँ नसुहुबोनी ज़ नगराँके। चावस बानी। नबेथाए ऱास्‍निक्‍यो,” है दोक्‍यो।

35 येसु नो मेंमास ओपाँज़्‍याक ज़ धर्मसास्‍त्र झ़िमलाव याघेप्‍पा याइरसए उझ़िमनिकावर हुद याइरसलाई, “गुर्बालाई काराव हत्‍या यान्‍या, नज़ा सिधुके,” है दोकेर। 36 नोराए यापाँ येसुए माथैव जैसिद याइरसलाई, “नयुँ तासतेयो, नयुँ वाज़ उहुप्‍क,” है दाद, 37 छुतरालाई ओलस बाव मायाद पत्रुस, याकूब स़ोनो याकूबए ओभाइ यूहन्‍नारालाई वाज़ यालाँक्‍यो। 38 नो धर्मसास्‍त्र झ़िमलाव याघेप्‍पाए उझ़िमक याकेसोत मिँर बनै चिर्लनी बिर्ल याघर्ज़्‍याव रँःद, 39 येसु नो झ़िमल पसिद, “काराव इताव च्‍याउँनी म्‍याउँ लँःसिद जेघर्ज्याव? ल़ुज़ा मासिए, अइज़ ङ़ल्‍द ले,” है ओरादोक ते, 40 येसुलाई हसैकेर। हाःत ज़ येसुए मिँ भरी लाँःदा परींद नो ल़ुज़ाए ओबाबु ओआमानी स़ोनो ओलस लिज़्‍याव स़ोम्‍लो उसिसरालाई वाज़ लाँद ल़ुज़ाए उकुन्तील पसिद, 41 नो ल़ुज़ालाई उकुइनी क्‍योःद, “तालिता कूमी,” है दोक्‍यो। (तालिता कूमीए ओअर्थ — अ बुची, सोनिके।) 42 हो प़ाइँना ज़ नो ल़ुज़ा थर च्‍याँःसिद आदा होदा लिके। नो ल़ुज़ा बाह्र बर्सवाकाव ओल्‍यो। निताव रँःद नोर बनै अचम्‍ब ज़ ताकेर। 43 नकिन येसुए, “आव य़ेन सुलाई ज़ है तारादोच्‍यो,” है लिद अर्थैद, “आवलाई ज़्‍यान्‍यार जैदिचिके,” है यादोक्‍यो।