1 नकिन येसुए उसिसर स़ोनो नल लिज़्‍याव माहोल्‍यारालाई अइ लिद यासथैक्‍यो, 2 “सास्‍त्रीर स़ोनो फरिसीराए मोसाए ओकानुन पैन्‍या हक दैद नैर। 3 है जैद नोराए है यादाचिज़्‍याव मिताव जेदोदी ब थिक ज़, खाली नोराए यादोज़्‍याव मिताव य़ेन ते तादोच्‍यो। नोराए यायाःए वाज़ दोज़्‍यार, याकुइए ते मादोर। 4 नोर सुए ज़ यामासयो·धुज़्‍याव कानुनर जैद छुतरालाई वाज़ दाव यारापरींज़्‍यार, या ताकितर तके ओछ्यो ब माछुर। 5 नोराए यादोज़्‍याव भरी ते मिँराए ङ़ाक सतैंन्‍या वाज़ लिज़्‍या। नोर परमेस्‍वरए ओकानुन सर्सिउ पत्रीलाई घेप्‍पा जैद याचाँदीत स़ोनो यापाखोरात पो·द बाऱिज़्यार। याक्‍वारात ब झुम्‍कार ता·द बाऱिज़्‍यार। 23:5 गन्‍ती १५:३८; ब्य ६:८ 6 नोर स॰द घ्योःव घ्योःव भत्‍यारराल स़ोनो धर्मसास्‍त्र झ़िमराल प़ाइँराए रँःन्‍या पोक च़ुसिउ पैंज़्‍यार। 7 बजार जीदा ब ‘मिँराए गुर्बा लिद धो घदासिरक’ लिन्‍या युँ दाद बाऱिज़्यार।

8 “जे ते फरी ‘प़ाइँए गुर्बा है घदासिरक’ लिन्‍यार ताजैसिच्‍यो। जे जेगुर्बा ते तोबो वाज़ लिज़्‍या, जे ते दाज्‍यु भाइर ची। 9 जे आव मानुवाताव मिँरालाई ब कोभालाई बाबु है तारादोच्‍यो। जे जेबाबु ते स्‍वर्गत तोबो वाज़ लिज़्‍या। 10 फरी जे स॰द प़ाइँए याङ़ैताव मिताव ब ताजैसिच्‍यो। जे जेङ़ैत तोबो वाज़ लिज़्‍या, हो ख्रीस ज़। 11 है जैद जे जेल ते जो घेप्‍पा जेताज़्‍या, हो प़ाइँए यासेवा दान्‍या ओजैसिक। 12 जो ओलनी सघ्‍योःसिज़्‍या, हो ज़िम्‍रिज़्‍या। फरी जो ओलनी सज़िम्‍सिज़्‍या, हो घ्‍योःरिज़्‍या।”

13 “जे कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। जे स्‍वर्गताव राज्‍याल बाज़्‍यावरालाई जेरावैंज़्‍या। नो राज्‍याल जे ते पसिउ जेमाभैंःके, झन पसिउ पैंज़्‍यावरालाई ब पसिउ जेमाराएए।

14 [“फरी ब सास्‍त्रीर स़ोनो फरिसीरालाई थैए माँतकन ज़ लिज़्‍या। जे कैफतीर राँदी मेंमारालाई तँनी छाम छुम जेराख्‍याज़्या, मिँराए ङ़ाक वाज़ बनै चाव चाव पोंखारिउ जेजैसिज़्‍या। जे ते प़ाइँरानी घ्‍योःव सजा ज़ जेदैरिज़्‍या।]

15 “जे कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। जे तोबोलाई जेचलनल रैन्‍याए जूँनी समुन्‍द्र तरिद जेराखिम्‍नाज़्‍या, झेंःव झेंःव गोंर ब कातिद जेराखिम्‍नाज़्‍या। तोबोलाई जेदैकिन जेकिन झन ज़ नोलाई नर्गए ओथोलाव जेजैज़्‍या।

16 “जे उमी पा·वए येम पैन्‍या ओजैसिज़्‍याव मितावर जेलिज़्‍या। जे अऩाकलाव कानुनर जैद, ‘ध्‍यान झ़िम छुद किर्‍या झाःसिउ, नो किर्‍या माथ॰रिए,’ है जेलिज़्‍या। ‘ध्‍यान झ़िमलाव सुनलाई छुद झाःकिन वाज़ थ॰रिज़्‍या,’ है जेलिज़्‍या। 17 जे किताव जेमी मारैंःव भाँकात्‍यार जेल्‍यो, कै जैद नो सुनलाई चोखैज़्‍याव ध्‍यान झ़िमकिन नलाव लिज़्‍याव सुन घेप्‍पा ओताज़्‍याव? 18 जे फरी, ‘थानलाई छुद किर्‍या झाःसिउ, नो ब माथ॰रिए। नो थानल लिज़्‍यावलाई छुद झाःकिन वाज़ किर्‍या थ॰रिज़्‍या,’ है जेलिज़्‍या। 19 जे किताव जेमी मारैंःवर जेल्‍यो, कै जैद नो चरैःसिउलाई चोखैज़्‍याव थानकिन नलाव चरैःसिउ ओघ्योःज़्‍याव? 20 है जैद किर्‍या झाःज़्‍याव मिँए थानलाई छुद किर्‍या ओझाःकिन नलाव लिज़्‍याव भरी ब माहुइ रो? 21 हो मिताव ज़ ध्‍यान झ़िमलाई छुद झाःकिन नलाव लिज़्‍याव भरी ब हुज़्‍या। नलाव लिज़्‍याव परमेस्‍वर ब हुज़्‍या। 22 फरी नमलाई छुद किर्‍या झाःकिन परमेस्‍वरए उसिंहासनलाई छुद ओझाःव मिताव ब लिज़्‍या, ओल परमेस्‍वरए उमिन ज़ छुद ओझाःव मिताव ब लिज़्‍या। 23:22 यसै ६६:१

23 “जे कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। जे तके दँ जरार घोद दस भा जैद तभा भितील झाःन्‍या य़ेन ते जेमाबिरैए। झन प़ाइँरानी ओचाहित ल्‍यो कानुनलाव सर्सिउ पाँ, सतस दान्‍या, सतत लिन्‍या, छुतए ल्‍योदा युँ नान्‍या, नो भरी ते जेऱास्‍के। जे ते झन नो ओचाहित ल्‍योलाई ब ऱासो मापरिन्‍या। 23:23 लेबी २७:३० 24 जे किताव भाँकात्‍यार जेल्‍यो, तोबो ओभार भाँती ल्‍यो मिँए ऊँतलाई गाल्‍द, तकेज़ा ऱूइलाई उरँःक उयुँ माजाम्‍द हाइद ख्‍याज़्‍याव मिँ स्‍यासोर जेलिज़्‍या।

25 “जे कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। जे ताथीर खुरीर जेराचोखोइज़्‍याव नो पाखाताव वाज़ लिज़्‍या। जेयुँल ते लोभ स़ोनो जोत ब युँ मानैधुन्‍या वाज़ लिज़्‍या। 26 जे भाँकात्‍या फरिसीर, ङ़ादा जेयुँलाई सछैंचिकेदा, पाखाताव जेक्‍याँ ब चोखो ज़ तान्‍या ले।

27 “जे कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। जे सरा थीसिउ मथ स्‍यासोर जेलिज़्‍या। नो मथ पाखानी बनै चाव पोरो·व रैंःज़्‍या, उजींल ते चिची सी ङरो मिँराए ऱूसर वाज़ लिज़्‍या। 28 हिताव ज़ जे मनी मिँराए ङ़ाक बनै चाव धर्मी मिताव जेजैसिज़्‍या, जेयुँल ते कैफत स़ोनो अधर्म वाज़ लिज़्‍या।

29 “जे निताव कैफती सास्‍त्रीर स़ोनो फरिसीरालाई थैए माँतकन ज़ लिज़्‍या। अगमबक्ताराए याखादरर जेराबनैज़्‍या, यामिनताव नैर ब स्‍यासी जैद, 30 ‘गे गेसाखा पुर्खाराए याबेलाक यास गेल्‍यो ताकिन इताव अगमबक्तारालाई सैःन्‍या गेमाल्‍यो,’ है जेलिज़्‍या। 31 है जैद ननी ज़, ‘अगमबक्तारालाई सैःज़्यावराए याथोर गे ज़ गेल्‍यो’ लिन्‍या जे ज़ जेथ·रैज़्‍या। 32 है जैद जे मनी जेसाखा पुर्खाराए यादोज़्‍याव य़ेन घसयो·च्‍यो।

33 “ए घुलर, घुलए ओथोर! जे नर्गलाव सजानी कै जैद उस्‍किउ जेदैरिज़्‍याव? 34 ङा जेल्‍योदा अगमबक्तार, याबुद्धी ल्‍योर, स़ोनो ओल्‍योदा बान्‍या येम पैज़्‍यावर परींद ङायाचिरिज़्‍या। जे नोरानी ख्‍वारालाई जेरासैःरिज़्‍या, ख्‍वारालाई क्रुसत जेरातङ्गैरिज़्‍या, ख्‍वारालाई धर्मसास्‍त्र झ़िम झ़िमल जेराप़ोरिज़्‍या, ख्‍वारालाई सहर सहरदा जेराखेपैरिज़्‍या। 35 है जैद यारासैःव धर्मी भरी नो ओदाज्‍युए ओसैःव हाबिलए ओपालाकिन नो थान स़ोनो ध्‍यान झ़िमनी निखार्लाव जेसैःव बेरेक्‍याहए ओज़ा जकरिया पैकावराए याझी जेलाई ज़ लागिस्‍रिज़्‍या। 23:35 उत ४:८; २ इति २४:२०-२१ 36 जेलाई साचो है ङादाचिज़्‍या, आव भरी आव बेलाकाव मिँराए ङ़ैत ज़ फुलुप्‍सिरिज़्‍या।”

37 “ए यरूसलेमलाव मिँर, कै जैद अगमबक्ता भरिरालाई जेरासैःज़्‍याव, जेल्‍योक परींसिउरालाई ब लुँ लुँए जेराझेःज़्‍याव? बामाए ओचर्ल्‍यानीर ओकर धूँल ओरादुप्‍ज़्‍याव मिताव, ङा ब जेलाई कुधु पाला ज़ ङाल्‍योदा पाथस दुपो ङापैंके, खाली जे ते जेमाभैंःके। 38 है जैद जेझ़िम रितो ज़ तारिज़्‍या। 23:38 यर २२:५ 39 ङा जेलाई है ङादाचिज़्‍या, आकिन ते ‘परमेस्‍वरए उमिनताव हुज़्‍याव धन्‍याकाव ओताक’ 23:39 भज ११८:२६ है जेमादाँवा पै ङालाई फरी रँःन्‍या जेमाले।”