1 येसुए नो ओपाँ भरी मिँरालाई ओरासथैवत फरी कफर्नहुमदा बाके। 2 हाः बेलाक नल तोबो रोमी कप्‍तानए उयुँलाव मिताव ओनोकोर ओजोरो हुद सिउ ओपैंज़्‍याव। 3 नो कप्‍तानए येसुए ओबयेन थैद ओनोकोरलाई सगराँन्‍याए जूँनी यहूदीराए यास़ेरर ऩेबरेंवा परींद येसुलाई क़िनाव यापरींक्‍यो। 4 नोर येसुए ओल्‍योक बाद बिन्‍ती दाद, “नो कप्‍तानए नँ नसाएता दैन्‍याकाव ज़ लिज़्‍या। 5 नोए गेजातलाव मिँराए ल्‍योदा उयुँ ताद गेजूँनी धर्मसास्‍त्र झ़िम ब जैद्यासिक्‍यो,” है दोकेर।

6 है जैद येसु नोरास बाके। याबाज़्‍याक कप्‍तानए नोर झ़िमकिन सर्बा तादाङ याहुज़्‍याव रँःद तोबो ऩेब्‍लो ओनैंरालाई येसुए ल्‍योदा, “ ‘अ प्रभु, ङाजूँनी आः दुख तादैयो। ङा इतावए ङाझ़िमक नँलाई लाँन्‍या स्‍यासो ङामाले। 7 ङा नङ़ाक सतैंसिन्‍या स्‍यासो ब ङामाले। बुरू ननी ज़ ‘गराँनिके’ है नलिकिन ङानोकोर गराँन्‍या ले। 8 ङा ब छुतए ओहक धूँलाव मिँ ज़। ङा ङाधूँल मनी कुधु सिपाईंर लिज़्‍यार। नोरालाई ‘बाचिके’ है ङारादोक बाज़्‍यार, ‘हुचिके’ है ङारादोक हुज़्‍यार। ङानोकोरलाई ब ‘इताव दोके’ है ङादोक दोज़्‍याव’ है दोच्‍यो,” है लिद यापरींक्‍यो। 9 येसुए कप्‍तानए ओरापरींवराए यापाँ थैद कप्‍तानस अचम्‍ब ताद ओलस बाज़्‍याव माहोल्‍याराए ल्‍योदा भाल्‍सिद, “ङा जेलाई है ङादाचिज़्या, इस्राएलीराए याखार्ल मनी आव मिताव ङाल्‍योदा उयुँ हुबो सु ज़ ङामादैताए,” है यादोक्‍यो।

10 नकिन नो कप्‍तानए ओरापरींवर ओल्‍द झ़िमक याबाक नो ओजोरो हुज़्‍याव गराँद उलिज़्‍याव रँःकेर।

11 येसु नकिन फरी जाँवाक नाइन यादोज़्‍याव नाखारदा बाके। नो बेलाक उसिसर स़ोनो माहोल्‍यार ब ओलस कुधु ज़ याबाज़्‍याव। 12 नाखार ङ़ाक याकेसोत तोबो मोरो घुर्द यालाँज़्‍याव यारँःक्‍यो। नो सिउ छोर्‍या तोबो राँदी मेंमाए ओज़ा नाः तोबो ज़ ओल्‍यो। नो लाँज़्‍याव मलामीर सर्बा कुधु ज़ याल्‍यो। 13 प्रभुए नो राँदी मेंमालाई रँःद उयुँ नाद ओल्‍योक बाद, “ताघर्नी,” है दाद, 14 मोरो झाःसिउ बाकसलाई ओछापोत नो मोरो बैज़्‍यावर ब च्‍याँःसिकेर। याच्‍याँःसिक येसुए नो मोरोलाई, “अ बुचा, सोनिके,” है ओदोव प़ाइँना 15 नो सिउ छोर्‍या सैंसिद च़ुसिद पाँके। है जैद येसुए नो छोर्‍यालाई ओआमाए ओजिम्‍बाल झाःक्‍यो।

16 निताव रँःद मलामीर बनै छे·द परमेस्‍वरलाई बनै घ्‍योःव थ·रैद, “माहान अगमबक्ता ज़ गेखार्ल हुद ले, ओल परमेस्‍वर ज़ उमींरास दैसिहुद ले,” है लिकेर। 17 है जैद ‘येसुए इताव य़ेन दोक्‍यो दी’ लिन्‍या यहूदियाल स़ोनो नजीलाव खन्‍द भरिल प़ाइँदा ज़ थास्‍नाके।

18 ऱील सछैंज़्‍याव यूहन्‍नाए उसिसराए ब आव भरी यूहन्‍नालाई है दोकेर। 19 है जैद यूहन्‍नाए ऩेब्‍लो उसिसनिलाई खुल्‍द प्रभुए ल्‍योक, “नो धर्मसास्‍त्रलाव सर्सिउ ‘हुरिज़्‍या’ है यालिज़्‍याव नँ ज़ रो, सैं छुतलाई कींन्‍या?” है दोनाव निपरींक्‍यो। 20 है जैद नोनी येसुए ल्‍योक बाद, “गिनलाई ऱील सछैंज़्‍याव यूहन्‍नाए उपरींसिनो। होए नँलाई है दींज़्‍याव — नो धर्मसास्‍त्रलाव सर्सिउ ‘हुरिज़्‍या’ है यालिज़्‍याव नँ ज़ रो, सैं छुतलाई कींन्‍या?” है दोकिनी।

21 नो बेलाक येसुए याजोरो हुवरालाई, माचाव पुरूसराए क्‍योःद यारानैज़्‍यावरालाई स़ोनो यामी मारैंःवर कुधुलाई ओरासगराँज़्याव। 22 है जैद येसुए नोनिलाई, “आव ङादोव जिन्‍रँःव जिन्‍थैव भरी यूहन्‍नालाई है दोचिन। ‘यामी मारैंःवरालाई सरैंःद याएज़्‍याव, माबाधुन्‍यारालाई बाधुन्‍या याजैज़्‍याव, कुऱीरालाई यासगराँज़्‍याव, यार्ना माथासोरालाई थैधुन्‍या याजैज़्‍याव, सिउरालाई याजागैज़्‍याव, गरीबरालाई ब परमेस्‍वरए ओपाँ यासथैज़्‍याव,’ है दोनाचिन्‍के। 7:22 यसै ३५:५-६; ३१:१ 23 ङालाई रँःद यायुँ माक़्‍याज़्‍यावर असिक दैवर लिज़्‍यार,” है निदोक्‍यो।

24 यूहन्‍नाए उनिपरींवनी निबाव छींनी येसुए माहोल्‍यारालाई यूहन्‍नाए उजूँनी अइ यादोक्‍यो, “जे यूहन्‍नाए ल्‍योक बनल जेबाक नोलाई किताव जेरँःया? बतासए आदा फुलुपनी होदा फुलुप ओजैज़्‍याव छी स्‍यासो ते जेमारँःखेहो। 25 हिताव ओमालिकिन किताव जेरँःया? सैं बनै चाव चाव क्‍वा क्‍वाइसिउ मिँलाई जेरँःव? निताव क्‍वा क्‍वाइसिद थाँतस लिज़्‍यावर ते दरबारल वाज़ लिज़्‍यार सानी। 26 है जैद ओल्‍योक जेबाक नोलाई किताव जेरँःया? अगमबक्ता ज़ जेरँःखेहो सानी। ङा फरी है ङादाचिज़्‍या, अगमबक्ताकिन झन घेप्‍पालाई ज़ जेरँःके। 27 नो यूहन्‍ना धर्मसास्‍त्रलाव सर्सिउ मिँ ज़। नोए उजूँनी सर्सिउ आव ज़,

29 नो पाँ थैज़्‍याव मिँर स़ोनो सिर्मा स्‍यो·ज़्‍याव पापीर यातादी ब जाँकोसै यूहन्‍नानी यासछैंसिउए नोराए ङ़ादाकिन ज़ ‘परमेस्‍वरए ओय़ेन साचो ज़ लिज़्‍या’ लिद याथ·रैज़्‍याव। 30 फरिसीर स़ोनो कानुनलाव यागुर्बार ते यूहन्‍नानी मासछैंसिद नोराए जूँनी परमेस्‍वरए ओदोज़्‍याव य़ेन माभैंःकेर। 31 है जैद येसुए, “आव बेलाकाव मिँर कितावर यालिज़्‍याव, किताव अर्थनी है ङादाचिके, है लिक ते, 32 आव बेलाकाव मिँर बजार खार्ल रैःसिज़्‍याव ल़ुज़ा स्‍यासोर लिज़्‍यार। नोर यानैंरास गन्गनैद,

36 तोबो फरिसीए येसुलाई उझ़िमक काँ ज़्‍यान्‍या खुल्‍क्‍यो। येसु नोए उझ़िमक बाद च़ुसिद काँ उज़्‍युज़्‍याक, 37 नो सहरलाव तोबो पातर्नी मेंमाए ‘येसु फरिसीए उझ़िमक काँ ज़्‍युना बाद ले दी’ लिन्‍या थैद नो मेंमाए बनै चाव ज़िम्‍ज़ा लुँ जाल उसी ङरो बनै ओएः ल्‍यो म़ास लाँद येसुए ल्‍योक बाके। 38 नक उछींक बाद घर्द उप़िलए उखँलाई सचिऊद्याद ओचेमए सीद नो ओरैव म़ास थीद्याद उखँलाई माइँ दोदिक्‍यो। 39 नो येसुलाई काँ याज़्‍याव फरिसीए नो मेंमाए ओदोव य़ेन रँःद उयुँल उयुँल, “आव साचो अगमबक्ता ओताव ताकिन नो उखँ छाप्‍ज़्‍याव मेंमा माचाव पापीनी ओल्‍यो लिन्‍या सरेस्‍खेहो,” है लिके।

40 हाःत ज़ येसुए नो फरिसीए उयुँलाव पाँ सैंद, “अ सिमोन, नँलाई तोबो पाँ है ङादींरिज़्‍या,” है ओदोक ते, “ताए गुर्बा, है दाँके,” है दोक्‍यो। 41 नकिन येसुए, “तोबो साहुए उरूप्‍या रिन लाँवनी ऩेब्‍लो निल्‍यो। नोनी तोबोए चाँदीए सिक्‍का पाँच सय, तोबोए पचास लाँद निनैज़्‍याव। 42 नोनी नो रिन निमाफो·धुवए साहुए ऩेब्‍लोलाई ज़ निऱास्‍क्‍यो। नोनी साहुए उगुन काताकावए कोसै चेतैनिके? है दाँके,” है ओदोक ते, 43 नो सिमोनए, “नो कुधु ओऱासोए ज़ ताखेहो,” है ओदोक ते, येसुए, “थिक ज़ है नदाँके,” है दाद, 44 नो मेंमाए ल्‍योदा भाल्‍सिद सिमोनलाई है दोक्‍यो, “आव मेंमाए ओदोव नरँःखेहो। ङा नझ़िमक ङाहुक ङाखँ हुर्न्‍या ऱी ब नमायाँके, आवए ते उप़िलए ङाखँ हुर्द्याद ओचेमए सीद्याँक्‍यो। 45 नल्‍योक ङाहुक माइँ ब नमादाँके, आवए ते ङाहुवकिन ज़ ङाखँत माइँ दाव ज़ नैज़्‍याव। 46 नँ फरी ङाङ़ैत म़ास ब थीद नमायाँके, आवए ते झन ङाखँत चाव सी ङरो म़ास ब थीद्याँक्‍यो। 47 है जैद ङा नँलाई है ङादींज़्‍या, आव मेंमाए ओपाप कुधु ज़ उलिदी ब ओपो·स ज़ ओक्‍याल्‍सिउए ङागुन कुधु ज़ चेतैक्‍यो। फरी छ्या ऱास्‍सिउए छ्या गुन ज़ चेतैज़्‍याव,” है लिद, 48 येसुए नो मेंमालाई, “नपाप प़ाइँ ज़ क्‍याल्‍सिके,” है दोक्‍यो। 49 ओलस काँ ज़्‍युज़्‍यावराए नो पाँ थैद, “आव मिँ कै जैद पाप क्‍याल्‍धुन्‍या ओजैसिज़्‍याव?” है लिकेर। 50 येसुए फरी नो मेंमालाई, “ङालाई नयुँ उहुबोए नबाँचिके, नझ़िमदा चावस बानी,” है दोक्‍यो।