1 येसु येमत ओबाज़्‍याक तोबो जर्मननी ज़ उमी मारैंःवलाई रँःक्‍यो। 2 नाःत ज़ उसिसराए, “गुर्बा, आव उमी मारैंःव सुए ओदोव पापए अइ ओताव? ओल ओदोवए सैं ओबाबु ओआमाराए यादोवए अइ ओताव?” है यादोक ते, 3 येसुए, “आव ओल ओदोव पापनी ब माःक, ओबाबु ओआमाराए यादोव पापनी ब माःक। परमेस्‍वरए ओसक्ती ओक्‍याँत सरैंःन्‍याए जूँनी अइ ओताव ची। 4 आव पलाँव बेला उलिज़्‍याक ज़ ङालाई परींज़्‍यावए ओय़ेन गे दाव ताके। चुम चुमो ओतावकिन ते सुए ज़ य़ेन मादोधुव। 5 आव मानुवात ङालेवा भरी, मानुवाताव ज़गै ङा ज़,” है दाद, 6 येसुए नामक त़िल्‍द, गम मुछिद, नो उमी मारैंःवए उमीत थीद्याद, 7 “आव नमीताव हिला सिलोआम दहल च़्‍यानाके,” है दाद परींक्‍यो। (सिलोआमए ओअर्थ परींसिउ।) नो दहल बाद उमीताव हिला ओच़्‍याव प़ाइँना उमी रैंःके। 8 निताव रँःद ओनाखार जीलावर स़ोनो ङ़ादाकिन ऩिद ओङासिज़्‍याव रँःज़्‍यावराए, “आव ते नो ङ़ादाकिनकाव ऩिज़्‍याव मिँ ची सानी!” है लिकेर। 9 ख्वाराए फरी, “हैज़, आव हो ज़,” है लिकेर। ख्वाराए फरी, “आव हो माःक, नो उमी मारैंःवस जेसोबोरोल्‍ज़्‍याव ताखेहो,” है लिकेर। नो उमी मारैंःज़्‍यावए फरी नो यापाँ थैद, “ङा हो ज़ ब्‍याँ,” है ओरादोक ते, 10 नोराए, “हुकी, नँ नमी कै जैद ओरैंःव की?” है यादोक ते, 11 नोए, “येसु है यादोज़्‍यावए हिला जैद ङामीत थीद्याद सिलोआम दहल च़्‍यानाव परींनाक्‍यो। नल बाद ङाच़्‍याव प़ाइँना रँःधुन्‍या ङाताके,” है यादोक्‍यो। 12 नोराए, “आव है नलिज़्‍याव मिँ काना ओबाव?” है यादोक ते, “माँ, ङा ते ङामासैंए,” है यादोक्‍यो।

13 हाःत ज़ नोराए उमी गराँवलाई फरिसीराए ल्‍योक लाँकेर। 14 येसुए नोलाई उमीत हिला थीद्याद रँःधुन्‍या ओजैव ऩासिन्‍या छ्याम ओल्‍यो। 15 नो फरिसीराए मनी, “नँ कै जैद रँःधुन्‍या नताव?” है यादोक ते, नोरालाई मनी नो रँःधुन्‍या तावए, “होए ङामीत हिला थीद ओयाँव, ङाच़्‍याव प़ाइँना रँःधुन्‍या ङाताके,” है यादोक्‍यो। 16 नलाव फरिसीर ख्वा ख्वाराए नो ओपाँ थैद, “आव सगराँज़्‍याव मिँ परमेस्‍वरनी हुव ते माःक, म़ानी ऩासिन्‍या छ्यामकाव य़ेन मादान्‍या कानुनलाई माख्याखेहो,” है लिकेर। ख्वाराए फरी, “नो मिँ पापी ताकिन इताव अचम्‍बलाव य़ेन कै जैद ओदोधुरिज़्‍याव?” है लिद या याल माखैकेर।

17 नोराए उमी गराँवलाई, “नँ नमी सगराँद्याज़्‍यावलाई किताव नङम्‍सिज़्‍या?” है यादोक ते, नोए, “नो अगमबक्ता ज़,” है यादोक्‍यो। 18 नो यहूदीराए यास़ेरराए, “आव मिँ ते ङ़ादा उमी मारैंःव ओल्‍यो माताखेहो,” लिद नोए ओपाँ मापतिकेर। है जैद ओबाबु ओआमानिलाई याल्‍योक खुल्‍द, 19 “आव जर्मननी ज़ उमी मारैंःव है यादोज़्‍याव जिनज़ा रो? निताव ओल्‍यो ताकिन कै जैद रँःधुन्‍या ओताव?” है यारादोक ते, 20 ओबाबु ओआमानी, “हैज़, आव गिनज़ा ज़, जर्मननी ज़ उमी मारैंःव ओल्‍यो। 21 खाली कै जैद रँःधुन्‍या ओताव, सुए ओजैव गिन गिन्‍मासैंए। ओललाई ज़ है दोचिके, नो ल़ुज़ा माले, ओल ज़ पाँधुन्‍या ले,” है यारादोकिनी। 22 नोनी यहूदीराए यास़ेरराए छ्याचेए नितावनी निपाँव। नो स़ेरराए ङ़ादा ज़, “जोए ‘येसु परमेस्‍वरनी बाँचैना हुव ख्रीस ज़’ है लिज़्‍या, होलाई धर्मसास्‍त्र झ़िमनी पले·न्या,”* 9:22 छुत बुझिन्या — समाजनी पले·द बातङ जैन्‍या। है यालिज़्‍याव। 23 है जैद ज़ नो ओबाबु ओआमानी, “नो ल़ुज़ा माले, ओललाई ज़ है दोचिके,” है निरादोव।

24 नकिन नो यहूदीराए यास़ेरराए फरी ब नो उमी गराँवलाई याल्‍योक खुल्‍द, “नो मिँ ते पापी ची लिन्‍या गे गेसैंज़्या। कै जैद नँ ‘परमेस्‍वरए ओसगराँनाव’ है नमालिधुज़्‍याव?” है यादोक ते, 25 नोए, “ङा नो मिँ पापी उलिज़्‍याव सैं ओमालिज़्‍याव लिन्‍या ङामासैंए। तोबो वाज़ ङासैंज़्‍या, ङ़ादा मारँःधुन्‍या ङाल्‍यो, अब रँःधुन्‍या ङाताके,” है ओरादोक ते, 26 फरी ब नोराए, “नोए नँलाई कै कै जैद रँःधुन्‍या ओजैनिउ?” है यादोक ते, 27 नोए फरी, “है दाव ज़ ङानैचिज़्‍या सानी, जेमाथैधुइ रो? तोबो पाँलाई खा ची है दान्‍या, सैं जे मनी उसिसर जैसिउ जेपैंज़्‍याव?” है ओरादोक ते, 28 नोराए थल्‍द, “नँ ची होए उसिस ते, गे ते मोसाए उसिसर ची। 29 मोसास परमेस्‍वर ओपाँव ते गेसैंज़्‍या, आव मिँ सुए ल्‍योनी हुव गे गेमासैंए,” है दोकेर। 30 हाःत ज़ नो उमी गराँवए, “आव ते बनै अनवार्‍यासो पाँ ज़ जेपाँके। ङालाई रँःधुन्‍या ओजैनाज़्‍यावत ब कै जैद आनी हुव लिन्‍या जेमासैंज़्‍याव? 31 परमेस्‍वरए पापीराए यापाँ माथैव, ओमान नैद्याज़्‍याव उयुँलाव मिताव य़ेन दाज़्‍यावराए यापाँ वाज़ थैज़्‍याव लिन्‍या प़ाइँए गेसैंज़्‍या सानी। 32 आव संसार ओतावकिन जर्मननी ज़ मारँःधुज़्‍यावलाई रँःधुन्‍या जैक्‍यो लिन्‍या आःपै सुए ज़ गेमाथैताए। 33 नो मिँ परमेस्‍वरनी हुव ओमाताव ताकिन, कै जैद निताव य़ेन ओदोधुरिज़्‍याव?” है ओरादोक ते, 34 नोराए झन नोलाई, “नँ पापल जर्मिद नपाप भुगिउ प़ैक्‍याए गेलाई पैव नपैंज़्‍याव रो?” है लिद नोलाई धर्मसास्‍त्र झ़िमनी हुतैद पले·केर।

35 येसुए नोलाई पले·केर दी लिन्‍या थैद नोस दैसिनाद, “मिँ मिन्‍सिउलाई नयुँ माहुप्‍ज़्‍या?” है ओदोक ते, 36 “नो मिँ मिन्‍सिउ है नलिज़्‍याव सु ओताव, प्रभु? ङा नोलाई ङारँःकिन ङायुँ हुप्‍न्‍या ले,” है ओदोक ते, 37 येसुए, “नो मिँलाई रँःद ब ननै, ङा नँस पाँज़्‍याव ब हो ज़,” है ओदोव प़ाइँना, 38 नो मिँ ओङ़ाक फुलुप्‍सिद, “प्रभु, ङा नँलाई ङायुँ हुप्‍के,” है दोक्‍यो।

39 हाःत ज़ येसुए, “काता ज़ मासैंन्‍यार मारँःधुन्‍यार सैंन्‍या रँःधुन्‍या ओतारक, फरी ‘गेसैंज़्‍या गेरँःज़्‍या’ है लिज़्‍यावर काता ज़ मासैंन्‍या छाम छामोर ओतारक लिद आव मानुवाताव मिँरालाई ङाराछ्यानिहुव,” है लिके। 40 नक लिज़्‍याव फरिसीराए थैद, “हुकी, गेलाई मनी गेमी मारैंःव मितावर नजैसिज़्‍याव रो?” है यादोक ते, 41 येसुए, “जे साचो काता ज़ मासैंधुन्‍या मारँःधुन्‍यार जेताव ताकिन जेखत माल्‍योर तान्‍या जेल्‍यो। खाली जे ‘सैंद रँःद ज़ गेदोज़्‍या’ है जेलिज़्‍यावए जेखत ल्‍योर जेताके,” है यादोक्‍यो।