1 नकिन यहूदीराए पर्ब तोबो उलिज़्‍याव। होए उजूँनी येसु ननी पुलुस्‍द यरूसलेमदा बाके। 2 यरूसलेम सहर बारिसिउ भार्नानी पुलुस्‍न्‍या तोबो ‘बेधा य़ाम’ उलिज़्‍याव। होए ओङ़ाक तोबो दह उलिज़्‍याव। नोलाई हिब्रू खामनी ‘बेथेस्‍दा’ है यादोज़्‍याव। नो दह घ्वाँगिल पाँच गोता छान्‍या झाःसिउ उलिज़्‍याव। 3 नल याजोरो हुवर, याखँ याकुइ सिउर, काना दूँदाराए [ऱी खा बेलाक छल्‍किके लिद कींद यानैज़्‍याव। 4 नो दहल कैताक कैताक परमेस्‍वरए ओचाकर्‍या हुद ऱी ओचलैज़्‍याव। नो ऱी ओचलैव बेलाक जो ङ़ात नो दहल पसिज़्‍या, हो जो मिताव बेथा उलिदी ब ओगराँज़्‍याव।]

5 नल अरतीस बर्स भरी ओजोरो हुव तोबो मिँ उलिज़्‍याव। 6 येसुए नोलाई घ्याँसिद उलिज़्‍याव रँःद, ‘आव ते कुधु बर्स ची ताके’ लिन्‍या सैंद नोलाई, “नँ सगराँसिउ नपैंज़्‍याव रो?” है ओदोक ते, 7 नो ओजोरो हुवए, “प्रभु, सगराँसिउ ते ङापैंज़्‍या। खाली ऱी उछल्‍किक ङालाई दहल सुए ची झाःनाव केदा? ङा धो धो ङाबाज़्‍याक ज़ ङालाई बलेंद छुत पसिज़्‍या,” है ओदोक ते, 8 येसुए, “ङा नँलाई है ङादींज़्‍या, च्‍याँःसिद नतैंर सिम्‍द बान्‍के,” है ओदोक ते, 9 बेहार ज़ नो मिँ गराँद ओतैंर सिम्‍द बाके।

नो छ्याम ऩासिन्‍या छ्याम ओल्‍यो। 10 है जैद यहूदीराए यास़ेरराए नो गराँवलाई रँःद, “आछिम ऩासिन्‍या छ्याम ची, नँ इताव गुर घुर्न्‍या माताए,” है यादोक ते, 5:10 नहे १३:१९; यर १७:२१ 11 नो गराँवए, “ङालाई सगराँज़्‍यावए ज़, ‘नतैंर सिम्‍द बान्‍के,’ है ओदाँव ची,” है ओरादोक ते, 12 “नँलाई निताव है दाज़्‍याव सु?” है दोकेर। 13 खाली नो गराँव मिँए ओललाई सगराँज़्‍यावलाई ब ओमासरेस्‍ज़्‍याव। नो बेलाक मिँर बनै काला मुलु यातावए येसु ङ़ादा ज़ ननी पुलुस्‍द ओबाधुव ओल्‍यो। 14 छींनी येसुए नो गराँवलाई ध्‍यान झ़िमल रँःद, “नँ आख ते नगराँके, आकिनी फरी पाप तादोयो, म़ानी झन ज़ माचाव तान्‍या नले,” है ओदोक ते, 15 नो मिँ झन ननी पुलुस्‍द बाद यहूदीराए यास़ेररालाई, “ङालाई सगराँव ते येसु ची ओल्‍यो,” है यादोनाक्‍यो।

16 येसुए ऩासिन्‍या छ्याम मनी निताव य़ेन ओदोवए यहूदीराए यास़ेरर नाःकिन ज़ उखिरी पसिनाकेर। 17 येसुए फरी नोरालाई, “ङाबाबुए आःपै ओय़ेन दाव ज़ नैज़्‍याव। है जैद ङा मनी ङादोज़्‍या,” है यादोक्‍यो। 18 नो पाँ थैद नोर झन ज़ मचिद, “आवए ‘ऩासिन्‍या छ्याम य़ेन दान्‍या माताए’ लिन्‍या कानुनलाई वाज़ ओख्याव माःक, परमेस्‍वरलाई ज़ ‘ङाबाबु’ है लिद ओल मनी परमेस्‍वरस सम सम जैसिज़्‍या। आवलाई ते सैःव ज़ परिए,” है लिकेर।

19 येसुए नोरालाई, “ङा जेलाई साचो है ङादाचिज़्‍या, ङा ओज़ाए ङाबाबुए ओदोज़्‍याव य़ेन ङामारँःवा पै ङानी काता ज़ ङामादोधुइ। ङाबाबुए जोनी दोज़्‍याव, ङा मनी हुनी वाज़ ङादोज़्‍या। 20 ङाबाबुए ङा ओज़ालाई मया दाँज़्‍याव। है जैद ओदोज़्‍याव य़ेन भरी ङालाई मनी सतैंद्याँज़्‍याव। जे आव जेरँःज़्यावकिन झन घेप्‍पा य़ेन सतैंद्यान्‍या ले। ननी झन ज़ अचम्‍ब तान्‍या जेले। 21 किताव ङाबाबुए सिउरालाई सोचोइद जींदो याजैज़्‍याव, हिताव ज़ ङा मनी जोलाई ङायुँ लिज़्‍या होलाई अजम्‍बरी जुनील बान्‍या ङाजैज़्‍या 22 है जैद, ङाबाबुए सुए ओय़ेन ज़ माफालो, नो फाल्‍न्‍या भरी ङा ओज़ाए ङाकुइत ज़ याद नैनाव। 23 ननी ज़ किताव ङाबाबुए ओमान नैद याएज़्‍याव, हिताव ज़ ङा ओज़ाए ङामान ब प़ाइँए नैद्यान्‍या लेर। जोए ङामान नैद मायाँव, होए ङालाई परींज़्‍याव ङाबाबुए ओमान ब नैद मायो।

24 “ङा जेलाई साचो है ङादाचिज़्‍या, जोए ङापाँ थैद ङालाई परींज़्‍यावलाई उयुँ हुप्‍ज़्‍या, नोए अजम्‍बरी जुनी दैद सजाल परिन्‍या माले। नो मिँ सिउल गनिसिउनी पुलुस्‍द साःरो जुनी दैन्‍याल गनिसिज़्‍या। 25 फरी ब जेलाई साचो है ङादाचिज़्‍या, नो बेला हुज़्‍या, हुद मनी ले, जोए परमेस्‍वरए ओज़ाए ओर्गा ओथैकिन, नो मिँ सिउ उलिदी ब साःरोल सैंसिन्‍या ले। 26 किताव ङाबाबुए ल्‍योनी पोहोन ताज़्‍या, ङा ओज़ालाई मनी नो पोहोन यान्‍या जैद नैनाव। 27 है जैद ङा ओलनी ज़ मिँ मिन्‍सिद ङाहुवए मिँरालाई फाल्‍न्‍या हक ब ङाकुइत ज़ याद नैनाव। 28 आव ङापाँत अचम्‍ब ताताच्‍यो। तछा इताव बेला हुरिज़्‍या, खादरल लिज़्‍यावराए मनी ङा ओज़ाए ङार्गा थैद, 29 सैंसिद खादरनी पुलुस्‍न्‍या लेर। नोरानी चाव य़ेन दाव भरी अजम्‍बरी जुनील बान्‍या लेर, माचाव य़ेन दाव भरी सजाल बान्‍या लेर,” है ओरादोज़्‍याव। 5:29 दान १२:२

30 “ङा ङानी ते काता ज़ ङामादोधुइ। ङाबाबुए ल्‍योनी किताव ङाथैज़्‍या, हितावनी ज़ ङाफाल्‍ज़्‍या। नो ङाफाल्‍ज़्‍याव भरी न्‍यायस ङादोज़्या, काराव ल्‍यो ताकिन नो ङादोज़्‍याव ङा ङापैंज़्‍यावनी माःक, ङालाई परींज़्‍यावए ओपैंज़्‍याव मितावनी वाज़ ङादोज़्‍या। 31 ङाजूँनी ङा ज़ ङापाँकिन, नो पाँ साचो माथ॰रिए। 32 ङाजूँनी पाँद ङालाई थ·रैद्याज़्‍याव छुत ज़ लिज़्‍या। होए ङाजूँनी पाँद ओयाँज़्‍याव भरी साचो थ॰रिज़्‍या। 33 जे ऱील सछैंज़्‍याव यूहन्‍नाए ल्‍योक मिँर जेरापरींक मनी, नोए ब ङाजूँनी साचो थ॰रिउ पाँ ज़ पाँके। 34 हैदी ब मिँनी हुज़्‍याव पाँनी ते साचो ङामाथ॰रिए। अइज़ जे यूहन्‍नाए ओरायो गोहाई रैद बाँचिर सैं लिद होए उमिन तखेप ङाहाइज़्‍या। 35 यूहन्‍ना पलाँ जैज़्‍याव बत्ती स्‍यासो ओल्‍यो। जे नोए ओजैव पलाँवल जाँवा पै रेंद जेलिके। 36 खाली ङास लिज़्‍याव गोहाई यूहन्‍नाकिन ब घेप्‍पा लिज़्‍या। ङाबाबुए ङालाई दाव उपरींनाज़्‍याव य़ेन ङा ङादोज़्‍या, आव य़ेनरानी ज़ परमेस्‍वरए उपरींव ज़ ओल्‍यो लिद सरेस्‍नाज़्‍यार। 37 ङालाई परींज़्‍याव ङाबाबुए मनी ङाजूँनी ओल ज़ पाँद याँज़्‍याव। जे होए ओर्गा ब जेमाथैताए, ओललाई ब जेमारँःताए। 38 जे ते झन परमेस्‍वरए ओपाँ ब जेयुँल जेमानैए, उपरींव ओज़ालाई ब जेयुँ माहुबे। 39 जे अजम्‍बरी जुनी दैन्‍याए जूँनी धर्मसास्‍त्रल खिमो ज़ जेनैज़्‍या। नो जेखिम्‍ज़्‍याव धर्मसास्‍त्रए ज़ ङाजूँनी गोहाई याचिज़्‍याव। 40 हितावत ब नो जुनीए उजूँनी ङाल्‍योदा हुव जेमाभैंःए।

41 “ङा मिँराए ल्‍योनी घेप्‍पा मिन ते ङामाखिमे। 42 खाली जे परमेस्‍वरए ल्‍योदा जेयुँ ज़ माले लिन्‍या ङासैंज़्‍या। 43 ङा ङाबाबुए उमिननी ज़ हुद ङाले, जे ते झन ङालाई जेसोनाज़्‍या। छुत सुवार या यामिननी याहुकिन होरालाई ते झन यामानर नैद्याद जेरासुम्‍ज़्‍या। 44 जे तोबोका तोबो परमेस्‍वरए ल्‍योनिकाव दैन्‍या मान माखिम्‍द जे जेल मान खिम्‍ज़्‍यावराए कातानी ची परमेस्‍वरए उपरींवलाई जेयुँ उहुप्‍रिज़्‍याव? 45 है जैद तछा परमेस्‍वर ङाबाबुए ओङ़ाक जेगल्‍ती थ·रैद्यान्‍या ङा पाँव मापरिए। जे जेखत पले·द्यान्‍या जेयुँ जेसुहुप्‍ज़्‍याव मोसा ज़ तान्‍या ले। 46 जे मोसाए ओपाँलाई साचो जेयुँ उहुप्ज़्‍याव ताकिन ङालाई मनी जेयुँ हुप्‍न्‍या ओल्‍यो। होए ङा ङाजूँनी ज़ सर्द ओनैज़्‍याव। 47 खाली जे होए ओसरो पाँलाई जेयुँ ओमाहुबो प़ाइँना, ङा ङापाँत झन कातानी ची जेयुँ उहुप्‍रिज़्‍याव?”