11
युँ हुप्न्या
1 उयुँ हुबो मिँए परमेस्वरए ओय़ाकार साचो ज़ थ·रैद ओमारँःवलाई ब उरँःधुव मिताव ज़ जैज़्याव। 2 भाःकाव मिँर ब यायुँ उहुबोनी ज़ परमेस्वरए उयुँलावर ताकेर।
3 परमेस्वरए ओपाँत गेयुँ उहुबोनी ज़ ‘परमेस्वरए ओयाःनी नाम नम ओजैव’ लिन्या गेथ·रैज़्या। है जैद ताव भरी गेमारँःवनी ज़ ताकेर। 11:3 उत १:१; भज ३३:६,९ 4 युँ हुबोनी ज़ हाबिलए ओदाज्यु कयिनकिन परमेस्वरलाई चाव चरैःक्यो। उयुँ उहुबोनी ज़ धर्मी थ॰रिके। ओसाची परमेस्वरलाई ओचरैःव रैद ओयोनी ज़ रैंःज़्या। नो ओल उसिदी ब ओय़ेन ते मासिए, पाँव ज़ लिज़्या। 11:4 उत ४:३-१०
5 फरी युँ हुबोनी ज़ हनोक पाला मासिद ज़ स्वर्गत छींसिके। नोलाई परमेस्वरए ओलस ज़ ओलाँवए साप्द ब मादैकेर। नो मिँ परमेस्वरए ओलस ओमालाँद ज़ उयुँलाव मिताव थ॰रिउ उलिज़्याव धर्मसास्त्रल ब रैंःज़्या। 11:5 उत ५:२१-२४ 6 उयुँ माहुप्ज़्याव मिँए खर्क ज़ परमेस्वरए उयुँ होलाँ जैद माएधुव। जो परमेस्वरए ल्योदा हुज़्या, होए ङ़ादा ‘परमेस्वर लिज़्या ज़’ लिद पतिउ ताके, नकिन ‘ओललाई खिम्ज़्याव मिँए ल्योदा उयुँ य़ालो ज़ लिज़्या’ लिन्या ब पतिउ ताके।
7 युँ हुबोनी ज़ नोआए पाला हुन्या पाँर ओमाहुद ज़ परमेस्वरए है ओदोव उयुँ हुप्द उझ़िमलावरालाई बाँचैन्याए जूँनी ङ़ादाकिन ज़ ऱी जहाज जैक्यो। ननी ज़ मानुवाताव मिँ भरी ओपो·स ज़ अधर्मीर रैंःकेर। ओल ते उयुँ उहुबोनी ज़ परमेस्वरए उयुँलाव मितावल गनिसिके। 11:7 उत ६:१३-२२
8 परमेस्वरए अब्राहामलाई याव ओपैंज़्याव पोदा उखुल्क उयुँ उहुबोनी ज़ नो पो मासैंद ज़ परमेस्वरए ओपाँ भैंःद पुलुस्द बाके। 11:8 उत १२:१-५ 9 नो पो ओल उजिउ भरिल ओमादैदी ब परमेस्वरए ओपाँत उयुँ उहुबोए नल ज़ खासिद लिके। ओज़ा इसहाक, ओनाती याकूबए ओपालाक पै नो पोल ज़ पालल खासिद लिकेर। नोनी ब अब्राहामए ओदैव य़ाका दैवनी निल्यो। 11:9 उत ३५:२७ 10 ओल अब्राहामए उखिम्ज़्याव ते आव मानुवाताव सहररालाई माःक, परमेस्वरए ओजैव खर्क ज़ माखेम्न्या सहरलाई ची।
11 ओज्या साराए मनी उयुँ उहुबोनी ज़ जूचास्द ब परमेस्वरए ओसक्ती दैद ज़ा तोबो दैक्यो। नो ज़ा दैन्या य़ाका याज़्याव परमेस्वरलाई ङ़ादा ज़ थ·रैद ओनैज़्याव। 11:11 उत १८:११-१४; २१:२ 12 है जैद अब्राहाम बनै सेर्द फ्या·न्याल गनिसिउ उलिदी ब ओथोर नमताव सोरोर, स़ोनो समुन्द्रलाव बालुवा स्यासो मागनिसिधुन्यार ताकेर। 11:12 उत १५:५; २२:१७; ३२:१२
यायुँ हुबोराए स्वर्गताव पो खिम्ज़्यार
13 आवर परमेस्वरए ओरायो य़ाका याजिउत यामादैदी ब यायुँ हुप्द ज़ सिकेर। नो य़ाका तादानी ज़ यारँःव मिताव जैद यायुँ नदा ज़ झाःकेर। नोर आव जुनील याझ़िम मालिद खासिद यालिज़्याव मिताव जैसिकेर। 11:13 उत २३:४; १ इति २९:१५; भज ३९:१२ 14 निताव जैसिज़्यावर साचो यादेस याखिम्ज़्याव रैंःज़्या। 15 निताव यामाताकिन याख्यानैव देसलाई मामेंःद ओल्द बाखेरहो। 16 खाली आवराए ते या याख्यानैव देसकिन झन स्वर्गताव चाव देस खिमो ज़ यानैज़्याव। है जैद परमेस्वरए, “ङा आवराए यापरमेस्वर ज़” है लिन्यात ओलाज माहुइ, काराव ल्यो ताकिन नोराए जूँनी परमेस्वरए स्वर्गत तोबो सहर जैद नैद यायो।
गेपुर्खाराए यायुँ यासुहुबो
17 युँ हुबोनी ज़ अब्राहामए ब परमेस्वरनी ओजाँचिसिक ओज़ा इसहाकलाई चरैःन्यात उयुँ माकैक्यो। परमेस्वरए ओय़ाकार दैद ओनैज़्यावत ब तोबोका तोबो ओज़ालाई परमेस्वरलाई चरैःन्या तयार ज़ ताके। 11:17 उत २२:१-१४ 18 नो ओज़ालाई ज़ परमेस्वरए, “इसहाकनिकावर वाज़ नथोल गनिसिन्या लेर,” 11:18 उत २१:१२ है ओदोव। 19 है जैद अब्राहामए उयुँल उयुँल, ‘इसहाक उसिदी ब परमेस्वरए जुनी ब सोचोइवा ज़’ है उलिज़्याव। है जैद हो छ्याम ओचरैःक ओमासिउए परमेस्वरए सोचोइद ओयो मिताव ज़ ताके।
20 युँ हुबोनी ज़ इसहाकए छींनीकाव तान्या पाँराए जूँनी ओज़ा याकूब स़ोनो एसावनिलाई असिक निएक्यो। 11:20 उत २७:२७-२९,३९-४०
21 युँ हुबोनी ज़ याकूबए ब उसिन्या बेलाक उझुइ तिकिसिद परमेस्वरलाई पोंखारिद योसेफए ओज़ानिलाई असिक निएक्यो। 11:21 उत ४७:३१–४८:२०
22 युँ हुबोनी ज़ योसेफए ब उसिन्या बेलाक इस्राएलीर इजिपनी पुलुस्न्याए जूँनी पाँद, “आनी जेपुलुस्क आव पोल ङाऱूस ब ख्यानैद तायाँच्यो,” लिद किर्या झाःव यापरींक्यो। 11:22 उत ५०:२४-२५; प्रस १३:१९
23 युँ हुबोनी ज़ मोसा उजर्मिक ओबाबु ओआमानी ‘आव परमेस्वरए उयुँलाव मिताव तारिज़्या’ लिद राजाए ओकानुन रँःद माछे·द ज़ स़ोंमैना पै म़ोंद नैकिनी। 11:23 प्रस १:२२; २:२
24 युँ हुबोनी ज़ मोसा स़ेर ओतावत राजा फारोए मेंमा ओज़ाए ओज़ाल उगनिसिदी ब नल ल्यो माभैंःके। 11:24 प्रस २:१०-१२ 25 नोए थाँतस लिद पाप दाज़्याव देखा बुरू परमेस्वरए उमींरास दुख सहिन्या रूजिक्यो। 26 इजिप भरिलाव धन सम्पती उकुइत उलिज़्यावत ब नोकिन झन ख्रीसए उमिनताव हेलारी तान्या घेप्पा रँःक्यो। परमेस्वरए ल्योङाव ओबताहादा वाज़ उयुँ थू जैक्यो। 27 युँ हुबोनी ज़ नलाव राजाए उरिसनी माछे·द इजिपलाई ऱास्द इस्राएलीराए याङ़ात बाके। सुए ज़ यामारँःधुज़्याव परमेस्वरलाई उरँःव मिताव जैद उयुँ थू जैद नो ओय़ेनलाई माऱास्क्यो। 11:27 प्रस २:१५ 28 परमेस्वरए इजिपलाव जेथा जेथा भरी ओरासैःज़्याक मोसाए उयुँ उहुबोनी ज़ इस्राएलीराए याज़ार छुव मायान्याए जूँनी पाथा सैःद य़ामत उझी थीन्या निस्तार पर्ब मानिउ यापरींक्यो। 11:28 प्रस १२:२१-३०
29 युँ हुबोनी ज़ इस्राएलीर लाल समुन्द्र यातरिज़्याक ऱी सा·द बगर ताके। नोरालाई खेपैहुव इजिपीर ते नो सा·व बगरल याहुव प़ाइँना ऱी हुद यागदैक्यो। 11:29 प्रस १४:२१-३१
30 युँ हुबोनी ज़ इस्राएलीराए यरीहो सहरलाई बारिसिउ भार्नालाई सात दिन पै दिनकाव तखेप याघुमैक नो भार्नार यानी ज़ त़ाकेर। 11:30 यहो ६:१२-२१
31 युँ हुबोनी ज़ नो राहाब बेस्याए ब नो इस्राएलीराए यारापरींव देस जाँचिना हुवनिलाई पाथस उनिनैवए नो सहरलाव मिँ भरी यारासैःक ओल सिउ मापरिके। 11:31 यहो २:१-२१; ६:२२-२५
यायुँ हुबोनी ज़ य़ेन ब दोकेर, दुख ब सहिकेर
32 इताव यायुँ हुबोराए जूँनी खा ची ङापाँके? नोरानी गिदोन, बाराक, सिमसोन, यिप्ता, दाऊद राजा, समूएल स़ोनो अगमबक्तार ब लिज़्यार। नोराए जूँनी सर्न्या समय ज़ माले। 11:32 न्याय ४:६–५:३१; ६:११–८:३२; ११:१–१२:७; १३:२–१६:३१; १ समू १:१–२५:१; १ समू १६:१–१ राज २:११ 33 युँ हुबोनी ज़ नोराए छुत राज्यार ब झेंःद यारारैकेर, परमेस्वरए उयुँलाव मिताव य़ेन ब दोकेर, परमेस्वरए ओय़ाकालाव पाँर ब दैकेर, लाराए यायाःर ब सूइद याराएकेर, 11:33 दान ६:१-२७ 34 वीं वीं चाँःज़्याव मेंःए मुल्कालाई ब सैःकेर, तरवालीनी सिन्यानी ब पुलुस्केर, यार्सा ओमालिदी ब ओचाहिउ बेलाक घ्योःव सक्ती ब दैकेर, लरैंल यार्सा ल्यो ताद छुत फौजीरालाई याराखेपैकेर, 11:34 दान ३:१-३० 35 मेंमाराए ब सिउनी सैंसिउ यामींरालाई यारादैकेर।
युँ हुबोनी ज़ फरी ख्वाराए झ्यालखानाल यालिज़्याक ‘परमेस्वरलाई जेऱास्किन आनी पुलुसो जेदैया’ है यारादोक परमेस्वरए ल्योङाव अजम्बरी जुनी दैन्याए जूँनी ननी पुलुसो माभैंःद बुरू दुखस सिन्या सहिकेर। 11:35 १ राज १७:१७-२४; २ राज ४:२५-३७ 36 ख्वार फरी हसैसी ऩिन्या, रीःसी ऩिन्या ब ताकेर, ख्वार किसी ऩिन्या ब ताकेर। 11:36 १ राज २२:२६-२७; २ इति १८:२५-२६; यर २०:२; ३७:१५; ३८:६ 37 ख्वारालाई लुँराए झेःद यारासैःकेर, ख्वारालाई करौंतीए चिरा·द यारासैःकेर, ख्वारालाई तरवालीए यारासैःकेर। इतावनी ज़ प़ाइँनी जाँचिसिकेर। याखिरी पसिद दुखर दैकेर। नोर काता ज़ माल्योर ताद बेधा बाकराराए स्यालोर क्वाइसिद दुलिरिन्या ब ताकेर। 11:37 २ इति २४:२१ 38 सु ज़ यामालिज़्याव हाँ जीदा दुलिद कुँ जील पुप जील यालिज़्याव। आव मानुवाताव मिँराए कान्ल ज़ यामारागनिदी ब नोर झन प़ाइँरानी घेप्पाल गनिसिउर यालिज़्याव।
39 आव भरी यायुँ उहुबोनी ज़ परमेस्वरए उयुँलाव मितावर ताकेर। खाली आव याजिउत परमेस्वरए ओय़ाकार रँःव मादैकेर। 40 काराव ल्यो ताकिन परमेस्वरए गेजूँनी झन चाव पाँ तोबो थ·रैद, ‘प़ाइँ मिँर तखेप्त ज़ छैंवर घतारक’ लिद गेलाई ब कींद ओनैसिज़्याव।
11:3 11:3 उत १:१; भज ३३:६,९
11:4 11:4 उत ४:३-१०
11:5 11:5 उत ५:२१-२४
11:7 11:7 उत ६:१३-२२
11:8 11:8 उत १२:१-५
11:9 11:9 उत ३५:२७
11:11 11:11 उत १८:११-१४; २१:२
11:12 11:12 उत १५:५; २२:१७; ३२:१२
11:13 11:13 उत २३:४; १ इति २९:१५; भज ३९:१२
11:17 11:17 उत २२:१-१४
11:18 11:18 उत २१:१२
11:20 11:20 उत २७:२७-२९,३९-४०
11:21 11:21 उत ४७:३१–४८:२०
11:22 11:22 उत ५०:२४-२५; प्रस १३:१९
11:23 11:23 प्रस १:२२; २:२
11:24 11:24 प्रस २:१०-१२
11:27 11:27 प्रस २:१५
11:28 11:28 प्रस १२:२१-३०
11:29 11:29 प्रस १४:२१-३१
11:30 11:30 यहो ६:१२-२१
11:31 11:31 यहो २:१-२१; ६:२२-२५
11:32 11:32 न्याय ४:६–५:३१; ६:११–८:३२; ११:१–१२:७; १३:२–१६:३१; १ समू १:१–२५:१; १ समू १६:१–१ राज २:११
11:33 11:33 दान ६:१-२७
11:34 11:34 दान ३:१-३०
11:35 11:35 १ राज १७:१७-२४; २ राज ४:२५-३७
11:36 11:36 १ राज २२:२६-२७; २ इति १८:२५-२६; यर २०:२; ३७:१५; ३८:६
11:37 11:37 २ इति २४:२१