1 है जैद गे ख्रीसए ओपाँताव ओथालनलाव पाँराकिन जाँ ङ़ाकसै बाद पाखो ताव ताके। नो थालनलाव पाँर आवर ज़ — सिन्‍या सजादा लाँज़्याव य़ेनलाई ऱास्‍द परमेस्‍वरलाई युँ सुहुप्‍न्‍या, 2 सछैंसिन्‍या, सुवाराए क्‍याँत कुइ नैद पोंखारिन्‍या, सिउनी सोवत ख्वाराए खर्क ज़ माखेम्‍न्‍या सजा दैन्‍या, ख्वाराए अजम्‍बरी जुनी दैन्‍या। 3 परमेस्‍वरए ओसघैसिकिन नो पाँराकिन जाँ ङ़ादा बान्‍या गेले।

4 ङ़ादा परमेस्‍वरए ओपाँत तखेप बनै सैंन्‍या ताव मिँ स्‍वर्गताव असिकर स़ोनो छैंव पुरूस ब दैद, 5 उयुँल परमेस्‍वरए ओपाँ चाव ज़ ओल्‍यो लिन्‍या थ·रैद परमेस्‍वरए ओराज्‍यालाव अचम्‍बलाव सक्तीर ओदार्दी ब, 6 छींनी नो मिँ परमेस्‍वरए ओपाँलाई सोद ओऱास्‍किन नो मिँलाई फरी सोवोल्‍द मारैसिधुइ। नो मिँए फरी ब परमेस्‍वरए ओज़ालाई क्रुसत तङ्गैद बीज्‍यात ओजैव मिताव ज़ लिज़्‍या।

7 हिताव ज़ एँःए ब परमेस्‍वरए ओसवाज़्‍याव ऱी दैद नलाव य़ेन दाज़्‍यावलाई चाव चाव सैर सपरीद ओएकिन नो एँः परमेस्‍वरए ओअसिक धूँल उलिज़्‍याव मिताव ज़ लिज़्‍या। 8 खाली नो एँःए ज़ुर ऱमर ओसपरीकिन नो एँः काम मालागिउ ताद परमेस्‍वरए ओसराप धूँलाव मिताव ज़ लिज़्‍या। निताव एँः मेंःए ओज़्‍यास वाज़ ताज़्‍या। 6:8 उत ३:१७-१८

9 अ गेयुँलाव गेनैं गेमेंर, जेलाई इताव ख्यो·न्‍या मिताव पाँर है गेदाचिदी ब, जे अजम्‍बरी जुनी दैन्‍यावाकावर ताद जेलिज़्‍याव मिताव गेङम्‍सिज़्‍या। 10 जे ङ़ादाकिन ज़ परमेस्‍वरए उमिनत लिज़्‍यावरालाई जेरासमारिहुज़्‍यावए परमेस्‍वरए ल्‍योदा जेयुँ थू जैद जेनैज़्‍याव ननी ज़ रैंःज़्‍या। परमेस्‍वर अन्‍याय मादान्‍या ओतावए नो जेय़ेनलाई मामेंःव। 11 जेल्‍योदा गेयुँ इताव लिज़्‍या, ‘नो जेआसलाई फिस्‍को मातान्‍या जैन्‍याए जूँनी नो य़ेनत छींङ पै ब कलँ लिद जेलिकिन ताखेहो’ है गेलिज़्‍या। 12 है जैद जे मातेन्‍सिद किताव भाःकाव मिँराए परमेस्‍वरए ल्‍योदा यायुँ हुप्‍द थ॰रिद यादोवनी परमेस्‍वरए ओरायो य़ाकालाव पाँर दैकेर, जे ब हिताव ज़ दोव ताके।

13 परमेस्‍वरए अब्राहामलाई य़ाका ओएक ओलकिन घेप्‍पा छुन्‍या ओमादैवए ओल उमिननी ज़ अइ लिद किर्‍या झाःक्‍यो, 14 “आछिमकिन नँलाई बनै घ्योःव असिक ङाईंरिज़्‍या, नथोर बनै सबा·द ङाईंरिज़्‍या,” 6:14 उत २२:१६-१७ है दोक्‍यो। 15 हुनी ज़ परमेस्‍वरनी ओदैव य़ाकालाई कुधु बर्स पै कींद बल्‍ल दैक्‍यो।

16 मिँराए ते याकिन घेप्‍पालाई छुद किर्‍या झाःज़्‍यार। किर्‍यानी वाज़ यापाँ थ॰रिद ‘आव ताखेहो, हो ताखेहो’ लिन्‍या पाँ भरी ब खेम्‍ज़्‍या। 17 हो मिताव ज़ परमेस्‍वरए ब, “ङा ङापाँ खर्क ज़ मात़ोसिउ थ॰रिउ लिज़्‍या,” लिद छींनीकाव ओय़ाका दैवरालाई सतैंद्यान्‍याए जूँनी अब्राहामलाई किर्‍या झाःदिक्‍यो। 18 नो खर्क ज़ मात़ोसिज़्‍याव ओपाँ अब्राहामए ओक्‍याँत ऩेथोनी ज़ रैंःके। ङ़ादा ओयो य़ाकानी रैंःके, छींनी ओझाःव किर्‍यानी ब रैंःके। है जैद गे आज्‍यालकाव मिँराए ब परमेस्‍वरए ओपाँ फिस्‍को ओमाताज़्‍याव ओल्‍यो लिद परमेस्‍वरए ओयासिरिज़्‍याव बरदान दैन्‍याए जूँनी येसुए ओक्‍याँत ख्‍यासिद लिन्‍यात गेयुँ झेंःव ज़ लिज़्या। 19-20 नो ओक्‍याँत ख्यासिद गेलिज़्‍याव येसु बनै थ॰रिउ काताए ब मापल्‍तैधुन्‍या पहर स्‍यासो लिज़्‍या। होत ज़ गेलिकिन गे ब ग्‍याल गिल ज़ तान्‍या गेमाले। नोए ज़ मल्‍कीसेदेक मिताव खर्क ज़ माखेम्‍न्‍या प्रधान पुजारी ताद प़ाइँरानी चोखो पोल लिज़्‍याव परमेस्‍वरए ओङ़ाक बाद गेलाई ब बान्‍या येम फैद्यासिक्‍यो। 6:19-20 लेबी १६:२; भज ११०:४