1 है जैद जे छुत जातलाव मिँरालाई येसु ख्रीसए ओपाँ ङासथैचिउनी झ्‍यालखानाल परिद लिज़्याव ङा पावलए जे जेजूँनी पोंखारिउ ज़ ङालिज़्या। 2 जेलाई परमेस्‍वरए याव ओपैंज़्‍याव असिकर सथैन्‍या ङाकुइत याद ओनैनाज़्याव जेसैंज़्‍याखेहो। 3 आकिन यादा जाँ जाँ सर्द ङायाचिउ मिताव परमेस्‍वरए ङ़ादाकिनकाव कप्‍सिउ पाँर सतैंद नैद ओयाँज़्याव। 4 नो पाँर चावस जेचिऊकिन ‘परमेस्‍वरए ख्रीसए ओक्‍याँताव ओदोव य़ेनर पावलए ओसैंज़्याव ची ओल्‍यो’ लिन्‍या थ·रैन्‍या जेले। 5 नो पाँ भरी गेकिन ङ़ादाङाव मिँरालाई आज्‍यालकाव मिताव चावस सतैंसिउ ओमालिज़्‍याव। आज्‍याल ते छैंव पुरूसनी नो पाँर येसु ख्रीसए छैंव ओसाचीर स़ोनो अगमबक्ताराए जूँनी ओपो·स ज़ सरैंःसिउ लिज़्या। 6 नो कप्‍सिउ पाँ आव ज़ — परमेस्‍वरए यहूदीरालाई वाज़ ओरायो य़ाकालाव असिक आज्‍याल ते जे छुत जातलाव मिँराए ब आव गेसथैचिज़्‍याव चाव थानी येसु ख्रीसए ओक्‍याँतिन यहूदीरास सिप ज़ दैन्‍या जेताके। जे नोरास तोबोए ओथोर ताद सिप ज़ परमेस्‍वरए ओराज्‍यालाव बताहा दैन्‍यार ब जेताके।

7 ङा फरी परमेस्‍वरए उयुँ ङाल्‍योदा गराँद ङाक्‍याँताव ओदोव ओसक्तीनी नो पाँ सथैन्‍यात ओसेवा दान्‍या ब ङाताके। 8 परमेस्‍वरए उमीं भरिरानी ङा प़ाइँरानी ज़िम्‍ज़ा कान्‍ल ज़ मागनिसिउ ङाल्‍यो। हैदी ब परमेस्‍वरए नाःल्‍दिउ असिक याद छुत जातलाव मिँरालाई ख्रीसए ओक्‍याँताव अचम्‍बलाव ओपाँर भाःन्‍या जैनाक्‍यो। 9 हो वाज़ माःक, प़ाइँ जैज़्याव परमेस्‍वरए ङ़ादाकिन ज़ आज्‍याल पै कप्‍द ओनैज़्‍याव पाँर इतावनी ज़ दोज़्‍याव लिद प़ाइँ मिँरालाई सतैंद्याव ब ङादैके। 10 गे ओमन्‍दलीए गेक्‍याँताव ओदोव य़ेननी स्‍वर्गताव घेप्‍पार स़ोनो यासक्ती ल्‍योराए परमेस्‍वरए अचम्‍बलाव उबुद्धीर घरँःरक लिद, 11 परमेस्‍वरए ङ़ादा ज़ थ·रैद ओनैज़्‍याव मिताव गेप्रभु येसु ख्रीसनी आव य़ेन दोक्‍यो। 12 अबकिन गे येसु ख्रीसस तोबो ताद ओललाई गेयुँ उहुबोनी ज़ परमेस्‍वरए ओल्‍योदा गेबाक गेलाई सुम्‍सिवा ज़ लिद गेयुँ हुबो ज़ लिज़्‍या। 13 है जैद जेस ङाबिन्‍ती लिज़्या, ङा जेजूँनी दैद ङानैज़्‍याव आव दुखर रँःद जेयुँ तासतेच्‍यो। आव भरी जेलाई तान्‍याए जूँनी ज़ लिज़्या।

14 है जैद ङा परमेस्‍वर गेबाबुए ओङ़ाक ङाघूँदानी फुलुप्‍सिद ङापोंखारिज़्‍या। 15 नो गेबाबुए ल्‍योनी नाम नमलाव ओथोराए यामिन नैसिउ लिज़्या। 16 जेजूँनी ङापोंखारिक, परमेस्‍वरए अचम्‍बलाव ओअसिकनी जेलाई छैंव पुरूस याद जेयुँल थ॰रिउर ओजैचिउक है ङालिज़्‍या। 17 परमेस्‍वरलाई जेयुँ जेसुहुबोनी फरी ख्रीसए जेयुँल बास ब ओदोवक। ननी ज़ नैं मेंरास स़ोनो परमेस्‍वरए ल्‍योदा मया जेदोकिन रामिउ जरा स़ोनो गज मिताव थ॰रिउ तान्‍या जेले। 18 है जैद ख्रीसए ओमया गेल्‍योदा खा ख्यो·व, खा राँव, खा झेंःव, खा उर्जीं ल्‍यो उलिज़्‍याव, हो छैंव उमींरास सिप ज़ घसैंरक लिद ब ङापोंखारिज़्या। 19 नो सुए ज़ यामासैंधुज़्‍याव ओमया सैंद वाज़ परमेस्‍वरए ओगे किताव उलिज़्याव हिताव ज़ जे जेगे ब तान्‍या ले।

20 परमेस्‍वरए गेयुँलाव ओचलैज़्‍याव ओसक्तीनी ओलस गेऩिज़्‍यावकिन स़ोनो गे है गेलिज़्‍यावकिन, झन ज़ कुधु दाद्यासिज़्‍याव। 21 निताव दाद्याज़्यावलाई मन्‍दली स़ोनो येसु ख्रीसए ओक्‍याँत प़िरी प़िरी पै खर्क ज़ माखेम्‍न्‍या ज़गै मगैव ज़ ओताक। आमेन।