4
परमेस्वरसकावर स़ोनो परमेस्वरकिन तँदाङावर
1 ङायुँलाव ङानैं ङामेंर, ‘परमेस्वरए उपुरूसनी ङापाँज़्या’ है लिज़्यावरालाई प़ाइँलाई तारापतिच्यो। ङ़ादा ‘परमेस्वरनी हुव पुरूस सैं माःक’ लिद थ·रैद वाज़ यारापतिच्यो। परमेस्वरए उमिन कुद तँनी पैज़्यावर कुधु ज़ ताद लेर। 2 जे ते परमेस्वरए उपुरूसनी पाँज़्यावलाई आनी ज़ सरेस्न्या जेले — जोए ‘येसु ख्रीस परमेस्वरनी मिँ मिन्सिद हुव ज़’ है लिज़्या, नो परमेस्वरए उपुरूसनी ज़ पाँज़्या। 3 जोए ‘येसु परमेस्वरए ओज़ा ख्रीस माःक’ है लिज़्या, नो मिँ परमेस्वरए उपुरूसनी पाँज़्याव माःक। नो ते ख्रीसकिन तँदाङाव पुरूस ची। नो हुरिज़्यावए उजूँनी ङ़ादाकिन ज़ जेथैज़्याव, होए ओपाँ आज्याल ब रैंःधुके। 4 खाली जे ते, ङाबाबुज़ार, परमेस्वरनिकावर ताद निताव पाँज़्यावरालाई हारैद जेरानै, काराव ल्यो ताकिन जेस लिज़्याव परमेस्वर मानुवात लिज़्यावकिन घेप्पा लिज़्या। 5 नोर आव मानुवातावर यातावए मानुवाताव पाँ ज़ पाँज़्यार। मानुवाताव मिँराए नोराए यापाँ भैंःज़्यार। 6 गे ते परमेस्वरसकावर गेलिज़्या। परमेस्वरलाई सरेस्ज़्याव भरी गेपाँत हुज़्यार। फरी जोर परमेस्वरए उमींर माःक, होराए आव गेपाँ माथैर। ननी ब परमेस्वरए उपुरूसनी साचो पाँज़्याव स़ोनो धुतनी पाँज़्यावनी छुतिज़्यानी।
छुतलाई मया दान्या
7 अ ङायुँलाव ङानैं ङामेंर, जे जेल मया दासिच्यो। निताव य़ेन दान्या परमेस्वरए ल्योनी ज़ हुज़्या। है जैद नैं नैंल मया दासिज़्यावर परमेस्वरनी जर्मिउर, परमेस्वरलाई सरेस्ज़्यावर ताज़्यार। 8 परमेस्वर ओमया ल्यो लिज़्या। है जैद ओमया माल्योए परमेस्वरलाई मासरेसो। 9 परमेस्वरए गेलाई मया ओदासिज़्याव आनी ज़ रैंःज़्या — गेलाई बाँचैन्याए जूँनी तोबोका तोबो ओज़ा आव मानुवात परींद्यासिक्यो। 10 छुतलाई मया दान्याए ओअर्थ आनी ज़ रैंःज़्या — गे परमेस्वरलाई मया गेदोव माःक, ओल परमेस्वरए ज़ गेलाई मया दाद गेपापए सजा फो·द्यान्याए जूँनी ओज़ालाई परींद्यासिक्यो। 11 ङायुँलाव ङानैं ङामेंर, परमेस्वरए गेलाई निताव मया ओदासिउए गे मनी गे गेल मया दासिउ ताके। 12 परमेस्वरलाई सुए ज़ खर्क ज़ मारँःतार। हैदी ब गे गेल मया गेदासिकिन, परमेस्वर गेस उलिज़्याव रैंःज़्या, स़ोनो ओमया गेक्याँत यो·ज़्या।
13 परमेस्वरए गेलाई उपुरूस याद ओनैसिज़्यावए गे ओलस गेलिज़्या, ओल गेस उलिज़्याव गेसैंज़्या। 14 स़ोनो गे ओलस ल्यो उसिसर ब ‘परमेस्वरए आव मानुवातावरालाई बाँचैन्याए जूँनी ओज़ा परींद ओयासिउ साचो ज़’ लिन्या ओसाचीर गे ज़ गेलिज़्या। 15 जोए ‘येसु परमेस्वरए ओज़ा ज़’ है लिज़्या, नोस परमेस्वर लिज़्या, ओल मनी परमेस्वरस ज़ लिज़्या। 16 परमेस्वरए गेलाई मया ओदासिज़्याव गेसैंज़्या, स़ोनो नत ज़ गेयुँ हुप्ज़्या।
परमेस्वर ओमया ल्यो लिज़्या। गे ब ओल माँःती छुतलाई मया गेदोकिन गे परमेस्वरस गेताज़्या, परमेस्वर ब गेस ताज़्या। 17 तोबोए तोबोलाई मया दान्यात परमेस्वरए ओमया चबनै रैंःज़्या। है जैद गे आज्याल ब ओल स्यासो गेलिज़्यावए परमेस्वरए ओराफाल्रिज़्याव छ्याम ओङ़ाक माछे·द ज़ गेयुँ होलाँ जैद बान्या गेले। 18 परमेस्वरए ल्योक रेंद बाज़्याव मिँ माछे·ए। नो ओमया ल्यो ओतावए ओछ्याचे भरी म़ाज़्या। ‘सजा ङादैया’ है लिज़्याव वाज़ छे·ज़्या। छे·ज़्याव मिँए परमेस्वरए ओमया मासैंव। 19 परमेस्वरए ङ़ादा गेलाई मया ओदासिउए गे ब तोबोए तोबोलाई मया गेदोज़्या।
20 जोए ओयाःए वाज़ ‘परमेस्वरलाई मया ङादोज़्या’ है लिद परमेस्वरए उमिनताव ओनैंलाई ओसोकिन, नोए ओपाँ धुत ज़ रैंःज़्या। ओल ज़ उरँःव नो ओनैंलाई मया ओमादोकिन, ओमारँःज़्याव परमेस्वरलाई झन कै जैद मया ओदोधुरिज़्याव? 21 परमेस्वरए ल्योनी गेदैव दान्या पाँ आव ज़ — जोए परमेस्वरलाई मया दोज़्याव, होए नैं मेंलाई ब मया ओदोवक।