1 अब ते ङालाई परींद जेयाँव चिथीनी तोबो तोबोनी है ङादाचिज़्‍या। खेपाए ज्‍या मादान्‍या चाव ज़ लिज़्‍या। 2 खाली पातर्‍या पातर्नी जैसिद बलेस्‍न्‍या ओताज़्‍याव देखा बुरू खेपाए ज्‍या ओदोवक, मेंमाए रे ओदोवक। 3 ज्‍या-री नितावत फरी खेपाए ओज्‍यालाई अछतङ तानैवक, मेंमा ब ओरेकिन अछतङ तालिक। 4 ओज्‍याए ओक्‍याँ ओल उजूँनी वाज़ माःक, ओरेए उजूँनी मनी ज़। ओरेए ओक्‍याँ ब ओल उजूँनी वाज़ माःक, ओज्‍याए उजूँनी मनी ज़। 5 मेंमाए ओरेलाई ओल्‍योदा हुन्‍या तावैंवक, खेपाए ब ओज्‍यालाई ओल्‍योदा हुन्‍या तावैंवक। खाली परमेस्‍वरलाई पोंखारिन्‍याए जूँनी जाँवा पै बातङ बातङ लिन्‍या निसखैदी ब निताव एकतार माःक, फरी सिप उलिनिक। निमालिकिन तोबोए उयुँ ओमानैधुकिन सैतानए बले·व पैंवा। 6 आव है ङादाचिउ पाँ मादाद माताए है ङालिज़्‍याव ते माःक, खाली इतावनी ताए सैं है ङालिज़्‍या। 7 ङा है ङालिज़्‍याव मिताव ताकिन ते प़ाइँ ङा मिताव ज्‍या मादोवर याताकिन चाव ताखेहो। खाली परमेस्‍वरए प़ाइँलाई छुत छुत किसिमलाव य़ेन दान्‍या बरदान याद नैसिउ, ख्वारालाई किताव, ख्वारालाई किताव।

8 ज्‍या मादावर स़ोनो रे मादावर, याज्या सिउर स़ोनो यारे सिउराए जूँनी है ङालिज़्‍या, ङा स्‍यासो बातङ लिधुकिन ते चाव ज़। 9 खाली उयुँ ओमानैधुकिन बिह्‍या ओदोवक। युँ झम माते·धुज़्याव देखा ज्‍या दान्‍या, रे दान्‍या ज़ पाथ लिज़्‍या। 10 फरी ज्‍या दावर स़ोनो रे दावराए जूँनी आव है ङालिज़्‍याव पाँ ङानी वाज़ माःक, गेप्रभुए है ओल्‍यो पाँ मनी ज़, रे दाव मेंमाए ओरेलाई ख्यानैद ताबाक। 11 ख्यानैद ओबाकिन छुत रे मादाद ज़ उलिक, अथबा ओरेस ओखैहुक। हो मिताव ज़ ज्‍या दाव खेपाए मनी ओज्‍यालाई ताऱासोक।

12 फरी जे छुतरालाई है ङादाचिज़्‍या। खास गेप्रभुए है ओल्‍यो पाँ ते माःक, ङानी ज़ है ङालिज़्‍या। जो उयुँ हुबो गेभाइए ओज्‍या उयुँ माहुबो उलिकिन फरी नो मेंमा ओरेस लिन्‍या खुसी ओताकिन नो खेपाए ओज्‍यालाई ताऱासोक। 13 हो मिताव ज़ उयुँ हुबो मेंमाए ओरे उयुँ माहुबो उलिकिन, फरी नो खेपा ओज्‍यास खुसी ओताकिन नो मेंमाए ओरेलाई ताख्यानैवक। 14 नो उयुँ माहुबो खेपा ओज्‍याए ल्‍योनी ज़ छैंव ताज़्‍या। हिताव ज़ उयुँ माहुबो मेंमा ब ओरेए ल्‍योनी ज़ छैंव ताज़्‍या। हिताव ओमाताव ताकिन निज़ार ब माछैंवर ताखेरहो, खाली नोर ते छैंवर लिज़्यार। 15 फरी नो उयुँ माहुबो, खेपा तादी ब मेंमा तादी ब ओभाःसिकिन्‍दा घभाःसिज़्याक। नो उयुँ हुबो ख्यानैसिउलाई ब फुर्सुल ताज़्या, काराव ल्‍यो ताकिन गेलाई खुसीस खैद लिन्‍याए जूँनी उखुल्‍सिउ ची। 16 तछा नरेलाई परमेस्‍वरए ओपाँत नरैधुज़्‍याक्‍या, नँ काता नसैंए? हिताव ज़ नँ खेपाए ब नज्‍यालाई तछा परमेस्‍वरए ओपाँत नरैधुज़्‍याक्‍या नँ नमासैंए।

17 खाली परमेस्‍वरए जो मितावल खुल्‍द खतैद नैचिउ, हो मितावल ज़ बाच्‍यो। पो पोङाव मन्‍दलीरालाई हैज़ ङारादोज़्‍या। 18 क्‍याल्‍न्‍या सरेस ताधुव मिँ परमेस्‍वरए ओपाँत उहुकिन नो मिँ क्‍याल्‍न्‍या सरेस माजैसिउ मिताव ताजैसिक। हो मिताव ज़ क्‍याल्‍न्‍या सरेस माजैसिउ मिँ उहुकिन नो मिँए क्‍याल्‍न्‍या सरेस ताजैवक। 19 नो सरेस जैसिन्‍या माजैसिन्‍या ओलेखा माले, परमेस्‍वरए ओपाँ दान्‍या वाज़ लिज़्‍या। 20 परमेस्‍वरए ओराखुलो बेलाक किताव याल्‍यो हिताव ज़ उलिरक। 21 परमेस्‍वरए ओपाँत उहुव बेलाक छुतए ओबाँदा ओल्‍यो ताकिन नोए उजूँनी सोगो तादोवक, नल ज़ उलिक। खाली नो मिँ ननी हाइसिउ ओदैकिन नो मौका ताऱासोक। 22 काराव ल्‍यो ताकिन परमेस्‍वरए ओपाँत जेहुव बेलाक छुतए ओबाँदा जेल्‍यो ताकिन परमेस्‍वरए ल्‍योनी ऱास्‍सिउर जेताज़्‍या। हो मिताव ज़ परमेस्‍वरए ओपाँत जेहुव बेलाक सुए उधूँल ज़ जेमाल्‍यो ताकिन अबकिन ख्रीसए उधूँल जेताके। 23 है जैद जेलाई ख्रीसए उजिउ झाःद ओलँःचिउर जेतावए छुतए ओबाँदा ताजैसिच्‍यो। 24 ङानैं ङामेंर, जे परमेस्‍वरए ओपाँत जेहुव बेलाक कितावल जेल्‍यो, होल ज़ लिद परमेस्‍वरए ओसेवा दोचिके।

25 ज्‍या मादोताव, रे मादोतावराए जूँनी है ङादाचिज़्‍या। आव पाँ गेप्रभुए ल्‍योनी ते माःक। हैदी ब ङा ङाल्‍योनी ज़ ङासम्‍जैचिज़्‍या। खाली परमेस्‍वरए ङाल्‍योदा उयुँ ओनावनी आव ङापाँ युँ हुबो पाँ ज़ लिज़्या। 26 आज्‍यालकाव इताव धो सहिउ दुखर गेक्‍याँत याहुरिज़्‍यावए बुरू जे किताव जेलिज़्‍याव हिताव ज़ जेलिकिन पाथ लिज़्‍या। 27 खाली बिह्‍या जेदोधुव ताकिन जेज्‍यारास ताभाःसिच्‍यो। जेमादोताव ताकिन बिह्‍या दाव तापैंच्‍यो। 28 हैदी ब जे खेपाराए ज्‍या जेदोदी ब पाप ते माले। हिताव ज़ बिह्‍या मादोताव मेंमाराए रे यादोदी ब पाप माले। खाली बिह्‍या दोज़्यावराए आव जिउत दुखर दैर सैं लिद ङा जेलाई ननी जोगोइव ङापैंज़्‍या।

29 आव तोबो पाँ ब है ङादाचिज़्‍या ङानैं ङामेंर, खेम्‍न्‍या बेला नजिक उहुवए आकिनी याज्‍या ल्‍योर याज्‍या माल्‍यो स्‍यासोर ओजैसिरक। 30 सोगो दोज़्यावर मादोज़्याव स्‍यासोर ओजैसिरक, रेंज़्यावर मारेंज़्याव स्‍यासोर ओजैसिरक, लँःज़्यावर यास काता ज़ माल्‍यो स्‍यासोर ओजैसिरक। 31 आव मानुवातावर याराचलैदी ब लन्‍था मादोज़्याव स्‍यासोर ओजैसिरक, काराव ल्‍यो ताकिन आव मानुवाताव जेरँःज़्‍याव भरी अइज़ खेम्‍न्‍या म़ान्‍यादा वाज़ बाज़्‍या।

32 जेलाई आव भरिए जेयुँ आँचा पाँचा घमाजैरक लिद है ङादाचिज़्‍या। ज्‍या मादाव खेपाए ‘परमेस्‍वरए उयुँ कातानी होलाँ जैद ङाएके’ लिद नदा वाज़ उयुँ थू जैज़्‍याव। 33 ज्‍या दावए ते ‘ङाज्‍यालाई कातानी खुसी ङाजैके’ लिद मानुवाताव लन्‍थाल ब लिज़्‍या। 34 नितावए उयुँ ऩेथोदा ज़ ताज़्‍या। हिताव ज़, रे मादाव मेंमाए ‘आव ङाक्‍याँ ङायुँलाई कातानी छैंव ङानैके’ लिद परमेस्‍वरए ल्‍योदा वाज़ उयुँ थू जैज़्‍याव। रे दाव मेंमाए ते ‘ङारेलाई कातानी खुसी ङाजैके’ लिद मानुवाताव लन्‍थाल ब लिज़्या। 35 आव भरी जेजूँनी ज़ है ङादाचिज़्‍या। आव पाँरानी जेलाई सुर्द ङानैचिज़्‍याव ते माःक, जेलाई तयुँ जैद्याद प्रभुए ओसेवा दान्‍यात पाथ पारैन्‍याए जूँनी ची।

36 फरी जेज़ा ल्‍योरालाई है ङादाचिज़्‍या, मेंमा जेज़ारालाई रे दाव मायाद करस नैन्‍या माःक। बैंस हुद रे दान्‍याकाव ओतावत, नो मेंमा रे मादाद मातान्‍या मिताव उलिकिन नोलाई तावैंच्‍यो, दाव एच्‍यो।* 7:36 १ कोर ७:३६-३८ ग्रीक खामनी ऩेथोनी बुझिसिज़्या। छुत बुझिन्‍या आव ज़ — छोर्‍याए बिह्‍या मादाद मातान्‍या ते माःक, खाली छोर्‍याए ल़ुज़ालाई ऩिद बिह्‍या दाव ओपैंकिन ओदोवक। आल पाप माले। 37 नो मिँए फरी ‘ङाज़ालाई रे दाव मायाद खुसीस ङानैधुया’ है लिद उयुँल ओथ·रैकिन स़ोनो कर लैन्‍या पाँर यामाहुकिन, उयुँलाव ओथ·रैव मितावनी ओज़ालाई ओनैधुकिन चाव ज़ लिज़्‍या। 38 ओज़ालाई रे जैद्याज़्‍यावए चाव ज़ दोज़्‍याव, ओज़ालाई रे जैद मायाज़्यावए झन चाव जैक्‍यो।

39 फरी मेंमा ओरे ओलेवा भरी ओरेए ओसतत ज़ ल्‍यो परिज़्‍या। ओरे उसिकिन वाज़ छुतस रे दान्‍या उखुसी ताज़्‍या। खाली नो छींनीकाव ओरे परमेस्‍वरए ल्‍योदा उयुँ हुबो मिँ ताव परिके। 40 खाली ङा ङाबिचारल ते नो राँदी मेंमा रे मादाद निताव ज़ उलिकिन झन खुसी तान्‍या ले। आव पाँत परमेस्‍वरए उयुँ ब लिज़्‍याखेहो ज़ है ङालिज़्‍या।