1 गे जेल्‍योदा हुव गेमादैवए ‘किताव लिज़्‍यार’ लिद आतिद ‘एथेन्‍सल गेबातङ ज़ गेल्‍या ब’ लिद, 2 जेल्‍योदा तिमोथीलाई हतप्‍त ज़ गेपरींके। नो मिँ गेभाइ ज़, परमेस्‍वरसकाव येसु ख्रीसए चाव ओथा सथैज़्‍याव मिँ ज़। परमेस्‍वरए ओपाँत जेर्सार हाइद्याद जेयुँर सझेंःद्यान्‍याए जूँनी नोलाई गेपरींके। 3 हो ताकिन जेदैज़्‍याव दुखरानी जेयुँर सतेन्‍या जेमाले। जे ब जेसैंज़्‍या, आव दुखर सहिन्‍या गेजुँ ज़ लिज़्‍या। 4 गे जेस गेलिज़्‍याक ‘जुनी ब दुखर दैन्‍या ज़ जेले’ लिद ङ़ादाकिन ज़ है दाव ज़ गेनैचिज़्‍याव। है गेदाचिज़्‍याव मिताव ज़ नो दुखर हुके, नो ब जेसैंज़्या। 5 आव भरी ङाचेतैक कैताराक सैतानए झुकैद याबले·वादा, गेय़ेन भरी अऩाकलाव ताया लिद परमेस्‍वरए ओपाँत किताव यालिज़्‍याव लिद बनै आतिद मासहिधुद हतप्‍त ज़ ङापरींके।

6 जेल्‍योनी तिमोथी ब भर्ज़ा ज़ हुद ‘नलावर परमेस्‍वरए ओपाँत यायुँ हुप्‍द या याल बनै खैवर लिज़्‍यार’ है उलिहुक ते चाव जेथा गेथैके। गेलाई मया दाद जेचेतैसिज़्‍याव स़ोनो गेस फरी दैसिन्‍या युँ जेदोज़्‍याव ब तिमोथीए ओयाःनी गेथैके। 7 है जैद गेनैं गेमेंर, परमेस्‍वरए ओसतत ज़ जेलिज़्‍यावए गे गेदुखराल ब गेयुँर बनै होलाँ ताके। 8 जे प्रभुए ओपाँत थ॰रिद जेलिज़्‍यावए गे ब अब ते जो तादी ब गेसहिधुया ज़। 9 परमेस्‍वरए जेल्‍योङाव ओदोव य़ेननी बनै रेंद ज़ परमेस्‍वरलाई गेपोंखारिक जेजूँनी जतिकाव धन्‍याबाद गेचरैःदी ब ओभार खर्क ज़ गेमाख्याधुइ। 10 गे परमेस्‍वरलाई गेपोंखारिक खर्क गेङाः गेङाः जोरैद्यासिउके स़ोनो परमेस्‍वरए ओपाँ तोबो ऩेब्‍लो मासैंद यामासुदुम्‍धुज़्‍यावलाई सुदुम्‍द्याव गेदैक लिद लाकनी रील पोंखारिउ ज़ गेनैज़्‍या।

11 ओल गेबाबु परमेस्‍वर स़ोनो गेप्रभु येसुनी जेल्‍योदा हुन्‍या येम फैद ओयासिरक, 12 स़ोनो गे किताव जेलाई मया गेदाचिज़्‍याव हिताव ज़ गेप्रभुए जेलाई मनी जे जेल स़ोनो छुतरास खैन्‍या युँ झन ज़ धोल पोगोल जैद ओयाचिउक, 13 स़ोनो ओल्‍योदा बनै थ॰रिउर ओजैचिउक। हो ताकिन ची गेप्रभु येसु फरी ओचाकर्‍यारास उहुक जे गेबाबु परमेस्‍वरए ओङ़ाक जेखत माल्‍यो छैंवर जेथ॰रिरिज़्‍या।