1 है जैद इतावनी जे गेलाई, “आवर ख्रीसए ओसेवा दाज़्यावर, परमेस्‍वरए म़ोंसिउ ओपाँ पलास्‍ज़्‍यावर याल्‍यो” लिन्‍या सरेसो ताके। 2 सेवा दोज़्यावराए याय़ेन, यार्गे परमेस्‍वरए है ओल्‍यो भरित सतस दाद उयुँ होलाँ जैद्यान्‍या लिज़्‍या। 3 है जैद जे तादी ब, छुतराए तादी ब, जो मितावनी है जेदाँदी ब, जो मितावनी जेगोइँनादी ब ङा ग्‍याल गिल ज़ ङामाताए। ङानी ब ङा इताव ङालिज़्‍या है ङामालिधुइ। 4 खाली ङाचेतैक परमेस्‍वरए ओय़ेन ङाबले·खेहो सा लिन्‍या ङामासैंए। हैदी ब ङा है ङालिज़्‍यावनी माःक, ङालाई छ्यानिन्‍या ओल परमेस्‍वर ज़ लिज़्‍या। 5 है जैद जे ब थिक बेला ओमाहुद छुतर ताराछ्यानिच्‍यो। गेप्रभु फरी उहुक चुम चुमोलाव म़ोंसिउ भरी ओज़लाँए सरैंःरिज़्‍याव, प़ाइँ युँलाव पाँ ब सतैंरिज़्‍याव। हो छ्याम मिँरालाई “चाव जेदोव ओल्‍यो, माचाव जेदोव ओल्‍यो” लिन्‍या ओल ज़ है दान्‍या ले।

6 ङानैं ङामेंर, ङा आक पै ङासरोल जे अपोल्‍लोसस गिनलाई जेगोइँसिज़्‍यावनी गिन गिनमिन वाज़ हाइद ङानै। ननी ज़ जे गिनलाई रँःद ङा है ङालिज़्याव धर्मसास्‍त्रलाव पाँर य़ाका जेदोकिन जे जेल सुए उमिनत ज़ स॰द सघ्योःसिन्‍या जेमाले। 7 जे छुतए उमिननी नैं मेंराकिन कै जैद चाव जेलिज़्‍याव? जेसकाव लिज़्‍याव भरी परमेस्‍वरए ल्‍योनी अइज़ जेदैव माःक रो? है जैद जे काराव मादैवराए मिताव जैसिद जेस॰ज़्‍याव? 8 जे, “गेस प़ाइँ ज़ उलिज़्यावए धनी ताद परमेस्‍वरए ओराज्‍यालाव राजा ताद गेले,” है जेलिज़्‍या दी। इताव जेपाँए ते गिनलाई अपोल्‍लोसस ब बलेंद जेबाधुव ची ओल्‍यो! जे साचो निताव ज़ जेताव ताकिन ते तान्‍या ओल्‍यो। गिन ब जेस राजा तान्‍या गिन्‍ल्‍यो! 9 खाली चिऊक ते गे परमेस्‍वरए ओसाची खतैसिउर प़ाइँरानी छींताव सिन्‍या सजा दैव स्‍यासोर गेरैंःज़्‍या। नो गेलिज़्‍याव सजाल आव मानुवाताव मिँराए याङ़ाक स़ोनो परमेस्‍वरए ओचाकर्‍याराए याङ़ाक चिऊसी ऩिन्‍या मितावर ताद गेले। 10 गे ख्रीसए उजूँनी बरे·सी ऩिन्‍यार ताद गेले, जे ते ख्रीसए उमिनत बधा घ्योःवर ताद जेले। गे कान्‍ल ज़ मागनिसिउ मितावर ताद गेले, जे ते घेप्‍पा मिन खिम्‍न्‍यार वाज़ ताद जेले। गे मिँराए ङ़ाक प़ैक्‍यार ताद गेले, जे ते मान दैव स्‍यासोर जेजैसिज़्‍या। 11 आख मनी ज़्‍यान्‍या ओन्‍याए माथैंद, करे करे थाकना बुरूम ज़ गेबाऱिज़्या, लिन्‍या गेझ़िम ब माले, मुत्‍का लप्‍ता ब कैव ज़ गेनैज़्या। 12 परमेस्‍वरए ओपाँ गेरासथैक ब गेकुइए य़ेन दाद गेङासिके। गेलाई थल्‍ज़्‍यावरालाई असिक गेराएज़्‍या, गेखिरी यापसिक ब गेसहिज़्‍या, 13 गेमिन बले·द्याज़्‍यावरालाई ब चावनी ज़ गेरापजैज़्‍या। गे आःपै मानुवातावराए याङ़ाक कान्‍ल ज़ मागनिसिउ, युँ माजामो झ़िम्सी स्‍यासोर ताद गेले।

14 आव ङासरो भरी जेलाई लाज मोर्नो जैन्‍याए जूँनी माःक, याबाबुए उयुँलाव ओज़ारालाई ओराम·लैज़्‍याव मितावनी तखेप ङासिङार्चिके। 15 काराव ल्‍यो ताकिन जेलाई ख्रीसए ओपाँ पैज़्‍यावर बनै कुधु ज़ यालिदी ब जेबाबु ते तोबो ज़ लिज़्‍या। जेलाई येसु ख्रीसए ओपाँ ङासथैचिउए ङा ज़ जेबाबु मिताव ङाताके। 16 है जैद जेलाई है ङादाचिज़्‍या, ङा ङादोज़्‍याव मिताव जे मनी दोच्‍यो। 17 आवए उजूँनी ज़ तिमोथीलाई जेल्‍योदा परींद ङानै। नो मिँ परमेस्‍वरए ओपाँत ङायुँ हुबो ङायुँलाव ङाज़ा मिताव ज़ लिज़्‍या। नोए ङा पो पोङाव मन्‍दलीरालाई ङारापैज़्‍याव मिताव येसु ख्रीसए उमिनताव चलन दान्‍या जेलाई ब पैचिरिज़्‍याव।

18 ख्‍वा ख्‍वार ते ङा जेल्‍योङ खर्क ज़ माहुन्‍या मिताव ङम्‍सिद बनै स॰ज़्यार दी। 19 हैदी ब गेप्रभुए उयुँ ओताकिन ङा हतप्‍त ज़ जेल्‍योदा ङाहुरिज़्‍या। हो ताकिन नो स॰ज़्‍यावर यायाः वाज़ सैं साचो यासक्ती ब उलिज़्‍याव रँःन्‍या ङाले। 20 परमेस्‍वरए ओराज्‍यालाव मिँर तान्‍या याःए वाज़ माःक, परमेस्‍वरए ओसक्तीनी दान्‍या मनी ज़। 21 है जैद ङा जेल्‍योदा ङाहुक झुइस हुन्‍या सैं मया रैद चावस हुन्‍या जे ज़ सैंच्‍यो।