8
Jesus Wanî Uurî'nîkon Ton Pe
Teepîremasanon Esanon Yepotorî Pe
1 Tamî'nawîron yentai sîrîrî taa annaya manni' wanî Jesus pî' teeseurîmasen pe awanî. Mîîkîrî Jesus wanî ipîkku pe, kure'nan uurî'nîkon tonpe teepîremasen esanon yepotorî pe awanî. Mîîkîrî ereutasa' ko'mamî tamî'nawîronkon esa' pe Paapa yaponse' meruntî winî. 2 Moropai miarî si'ma Paapa pata'se' pu'kuru ya' mîîkîrî esenyaka'ma ko'mannîpî teepîremasanon esanon yepotorî pe. O'non pata Paapa yapurîto' pu'kuru pata, intîrî'pî pata si'ma, pemonkonyamî' nîtîrî'pî pe pra awanî.
3 Tamî'nawîronkon manni'kan teepîremasanon esanon yepotorî wanî'pî imenkasa'kon pe, to' esenyaka'mato'pe Paapa pia tîntîrîkon tîrî pî'. Moropai tînpo'tîkon tekînkon po'tîto'pe to'ya tonpakon nîkupî'pî imakui'pî ton pe, mîrîrî wanî'pî to' esenyaka'mato'pe. Mîrîrî warantî uurî'nîkon ton pe Jesus teepîremasen kure'nanya î' tîrî e'pai awanî'pî uurî'nîkon tonpe. 4 Tarî non po tîwanî ya, teepîremasen pe awanî pepîn e'painon. Maasa pra tarî teepîremasen, mîrîrî ku'nenan, wanî tîntîrîkon tîînenan î' kai'ma Moisés nurî'tîya ta'pî yawîrî ku'nenan wanî mîîto'pe. Jesus esenyaka'mato' wanî pepîn Moisés nurî'tî nekaremekî'pî yawîrî. 5 Tîîse inkamoro teepîremasanon esenyaka'mato' wanî tarî. Mîrîrî wanî ka' po tîwe'sen patakanen pe neken, moropai itekatono'pî pe awanî. Mîrîrî ye'nen î' pensa Paapa yewî' konekaiya ya, Paapaya ta'pî Moisés pî':
Aka, e'to' yawîrî tamî'nawîrî î' ta'pîuya moropai yenpo'pîuya aapia era'mapa manni' wî' po mîrîrî yawîrî mîkupîi Êx 25.40
ta'pîiya. 6 Tîîse Jesusya morî teesenyaka'mato' ton yapi'sa' manni'kan teepîremasanon esenyaka'mato' yentai. Maasa pra Moisés nurî'tî maimu yawîrî to' esenyaka'ma'pî. Tîîse mîîkîrî Jesus ko'mamî sîrîrî Paapa moropai pemonkon yarappana tîwe'sen pe î' kai'ma morî pe pemonkon ena emapu'tîpa kai'ma Paapa yarakkîrî. Mîrîrî warantî eesenyaka'mato' wanî morî pe, e'mai' pe Moisés nurî'tî pia tîmaimu esetanto' tîntîrî'pî yentai. Maasa pra morî panpî' tîrîuya pe wai aapia'nîkon taasai'ya ye'nen.
7 Sîrîrî e'mai'non î' ta'pî Paapaya Moisés nurî'tî pî' e'sa' ya, e'to' yawîrî, amenan pe inî'rî î' taa Paapaya pepîn e'painon. 8 Tîîse Paapaya era'ma'pî î' kai'ma yairî pra pemonkonyamî' yeseru wanî. Mîrîrî ye'nen ta'pîiya:
—Î' pensa amenan mai to' nîkupî tonpe
konekauya kupî sîrîrî Israel ponkon tonpe.
Moropai Judá nurî'tî pemonkonoyamî' ton pe
ikonekauya kupî sîrîrî,
9 manni' pena atamokon tonpe ikupî'pîuya warantî pra,
î' pensa Egito pata yapai to' mo'kauya yai ikupî'pîuya warantî pra.
Maasa pra inkamoro e'sa' pra man mîrîrî yawîrî.
Mîrîrî wenai inkamoro yewanmîrî'pîuya,
to' piapai atarima'pî —ta'pî Uyepotorîkonya.
10 —Sîrîrî kupîuya maasa to' nîkupîton pe
insamoro Judeuyamî' tonpe.
Awanî pe man see warantî —ta'pîiya.
—Itîrîuya to' esenumenkato'kon ya',
umaimu to' nîkupîkon ton tîrîuya
to' yewan ya' aako'manto'pe,
yawîrî iko'manpai to' e'to'pe,
tiaronya to' yaipontî pra tîîse.
Mîrîrî yai uurî wanî to' yepotorî pe
moropai inkamoro wanî upemonkonoyamî' pe.
11 Mîrîrî yai anî'ya tîîko'mamî yonpa yenupa eserîke pra awanî.
Moropai taiya eserîke pra awanî tîwanîyakon pî':
“Paapa epu'kî,” taiya eserîke pra awanî.
Maasa pra mîrîrî yai tamî'nawîronkonya uyepu'tî kupî sîrîrî tewankon ya'.
Manni'kan ipîkku pe pra tîwe'sanonya
moropai ipîkku pe tîwe'sanonya uyepu'tî kupî sîrîrî.
12 Mîrîrî yai tamî'nawîrî uuwanmîra to' nîkupî'pî imakui'pî kupîuya
tiwin kin ipî' enpenata pepîn Jr 31.31-34
—ta'pîiya.
13 Inî'rî eesetato'kon kupîuya pe wai amenan pe taasa' Paapaya yai, e'mai'non inkupî'pî epu'tî'nîkon tarîpai, penaro' pe awanî moropai aataretî'ka kupî sîrîrî.