10
ፆኦዞ ጌይ ካኣሽኮ ሜሌ ባኮ ዛሎ ፆኦሲ ጌዔ ባኮ
1 ዒስራዔኤሌ ዴሬዮቴ! ናንጊና ናንጋ ጎዳ ዒንሢም ኬኤዛ ባኮ ዋይዙዋቴ፤ 2 ናንጊና ናንጋ ጎዳ ሂዚ ጋዓኔ፦
«ሜሌ ዓሳ ናንጋ ጎይፆ ናንጊፖቴ፤
ፑርታ ባኣዚ ሙካንዳያ ማዒፆ ዔያቶም ዔርዛ ባኣዚ
ጫሪንጫ ጴዻማና ዒጊቹሞና ጎጋይቂሢና ዔያቶኮ ዳምቤኬ፤
ዒንሢ ጋዓንቴ ዬያ ዒጊጪ ሴካ ሃንጋ ጌይፖቴ።
3 ሜሌ ዓሶኮ ዔያታ ጉሙርቂ ካኣሽኪ ናንጋ ባካ ጉሪ ባኣዚኬ፤
ሚሢ ዴኤሊዳፓ ቲቂንታኔ፤
ዓርሲ ዔራ ሃኣሚ ዛንቃሬና ዑሪ ጊኢጊሻኔ፤
4 ዬያ ዔያታ ቢራ ዓንጊና ሃሣ ዎርቄና ጳርቂ ሚዛጲሳኔ፤
ዓጊፁዋጉዲ ሚስማሬና ጳርቂ ዓይሣኔ።
5 ዬይ ባካ ቲኢኪንታ ካፒንታ ዬያጉዴ ባኮዋ ዒጊቻኒ
ጎሺዳ ጌሦ ባኣዚ ጉዴያኬ፤
ዬይ ባካ ጌስታኒ ዳንዳዑዋያኬ፤
ሃንታኒያ ዳንዳዑዋኣሢሮ ዓሲ ኬዲ ዬያ ሃንታኔ፤
ፑርታ ባኣዚ ሄሊሳኒና ዔኤቢ ማኣዳ ባኣዚ ጴዺሳኒ
ዬይ ባካ ዳንዳዑዋኣሢሮ ዬያ ባኮ ዒጊጪፖቴ።»
6 ናንጊና ናንጋ ጎዳሢዮ! ኔጉዴያ ዖኦኒያ ባኣሴ፤
ኔኤኒ ዼኤፒኬ፤
ኔኤኮ ሱንፃ ዼኤፒ፥ ሃሣ ዎልቄና ዓኣያኬ።
7 ካኣቶኮ ቢያ ኔኤኒ ካኣቲ ማዔሢሮ ኔና ዒጊጩዋይ ዖናዳይ?
ዴሮኮ ዔሮ ዓሶንታ ዔያቶኮ ካኣቶንታ ባኣካ
ኔናጉዴያ ባኣሢሮ ቦንቾ ኔኤም ኮይሳኔ። 10፡7 ዮሃ. ፆፔዻ 15፡4።
8 ቢያሢ ዔራቶ ባይቂ ዔዔኤያንዳኣፓዓቴም
ሚሢና ዔኤቢ ማሊሲ ኮሾና ባኮፓ ዓይጎ ዔያታ ዔኪ ዔራንዳይ?
9 ዬይ ማሊሲ ኮሾና ባካ ቴርሴሴፓ ዔኪ ሙኮና ቢራ ዓንጊና፤
ሃሣ ዑፓዜ ጌይንታ ቤዛፓ ጴዼ ዎርቄና ጳርቂ ኮሺንቴያኬ፤
ዔሮ ማዔ ሃኣሞ ዓሳ ዬያ ኮሼያኬ፤
ዬያጉዲ ዔሮ ዓሶንታ ዶርዞንታ ዹዔ
ዲንኪ ዓፒላና ጋላፒ ሚዛጲ ዓፒላና ዬያ ካንቆናኔ።
10 ናንጊና ናንጋ ጎዳሢዮ! ኔኤኒ ጋዓንቴ ጎኔ ፆኦሲኬ፤
ኔኤኒ ባይቁዋ ፆኦሲ፥ ናንጊና ናንጋ ካኣቲኬ፤
ኔኤኒ ዻጋዻ ዎዶና ዓጪ ማዔ ካራና ቢያ ዓጊፃኔ፤
ዓሶኮ ካኣታ ኔ ዻጎ ጎሪንቶ ጊቢ ዶዲ ዔቃኒ ዳንዳዑዋሴ።
11 «ሜሌ ፆኦዛ ጫሪንጮና ሳዖና ማዢባኣያ ማዒፆ፤
ሃሣ ኔኤኒ ናንጊና ናንጋ ጎዳሢ ሜሌ ፆኦዞ ጌይንታ ካኣሽኮ ባኮ
ቢያ ባይዛንዳሢ ዔያቶም ኬኤዜ» ታኣም ኔ ጌዔኔ።
ናንጊና ናንጋ ጎዳ ጋላቶና ጋላታ
12 ፆኦሲ ፔ ዎልቆና ሳዖ ማዤኔ፤
ፔ ዔራቶና ዓጮ ቢያ ማዤኔ፤
ዒዛኮ ማሊ ጶቂሣ ዒኖናኣ ጫሪንጮ ዼጊዲ ዒ ዳሬኔ፤
13 ዒዛ ዓይሥሢና ጫሪንጮ ዑፃ ዓኣ ዋኣፃ ዴቺንታ ዑኡሲ ዋይዚሳኔ፤
ዓጫ ማዔ ካራፓ ዒዚ ሻኣሬ ዔኪ ሙካኔ፤
ዒራ ዋርቃኣና ዜኤሊንሢ ዒዚ ዜኤሊንሢሳኔ፤
ዢባሮ ፔ ኮናፓ ዒ ዳካኔ።
14 ቢያሢ ዔራቶ ባይዚ ዔዔኤዬኔ፤
ዔያታ ማሊሲ ኮሼ ባካ ሉኡዚ ባኣዚ፥ ሃሣ ሼምፔያ ባኣሢሮ
ዓንጎ ሼኤሺ ዹዓሢ ዒ ማዤ ፆኦዞ ዛጋዖ ቦርሲንቴኔ።
15 ዬይ ፆኦዞ ማሂ ኮሾና ባካ
ዔኤቢ ፓሣ ባኣዚ ባኣያ ዓማሊ ባኣዚኬ፤
ናንጊና ናንጋ ጎዳ ዬያቶ ፆኦዞ ማሂ ኮሾና ባኮይዳ
ሜቶ ዓጋኒ ሙኪ ጴዻ ዎዶና ዬይ ባካ ባይቃንዳኔ።
16 ያይቆኦቤ ፆኦሲ ጋዓንቴ ዬያቶጉዲቱዋሴ፤
ያይቆኦቤ ፆኦሲ ቢያ ባኮ ማዤሢኬ።
ዒስራዔኤሌ ፔ ዴሬ ማዓንዳጉዲ ዒ ዶኦሬኔ፤
ሱንፃ ዒዛኮ ቢያ ባኮ ማዤ ጎዳኬ።
ሙካኒ ዑኪ ዓኣ ዎዛ
17 ዒንሢ ማንጊንቲ ዓኣ፥ ዬሩሳላሜ ካታማ ናንጋ ዴራ!
ዒኢካፓ ኬስካኒ ዒንሢኮ ዓኣ ባኮ ዑኬና ቡኩሱዋቴ!
18 ናንጊና ናንጋ ጎዳ ሂዚ ጋዓኔ፦
«ሃኖ ዓጫ ናንጋ ዓሶ ታኣኒ ኬሲ ዳካንዳኔ፤
ዔያቶኮ ታኣኒ ካራ ባይዚ ዲዒንታንዳጉዲ ማሃንዳኔ።»
19 ዬሩሳላሜ ዴራ ዒላቲ ዒላቲ ሂዚ ጋዓንዳኔ፦
«ሜቂ ማኣሳኒ ኑ ኪፃዼሢሮ ኑና ባዴዔ!
ኪፃ ኑኡኮ ፓፃንዳያቱዋሴ፤
ኑ ኮራ ኑኡኒ ሃያ ሜቶ ቢያ ጊቢ ዳንዳዓንዳያ ማሌኔ።
20 ኑኡኮ ዓፒሎና ማዦና ማኣራ ሻሂንቴኔ፤
ፃጲ ኑ ቱካ ሱዛኣ ቲቂንቴኔ፤
ናኣታ ኑኡኮ ቢያ ዳውሲንቲ ዴንዲ ባይቄኔ፤
ኑኡኮ ዓፒሎና ማዦ ማኣሮ ጊንሣ ዾቃንዳያና
ጎኦቦ ዓፒሎዋ ሱፃንዳያ ፔቴታዖ ዓቲባኣሴ።»
21 ታኣኒ ማሃዖ ሂዚ ጌዔኔ፦
«ኑኡኮ ሱኡጋ ዔኤያ ማዔሢሮ
ማኣዶ ዔያታ ናንጊና ናንጋ ጎዳ ኮይላ ዖኦጪባኣሴ፤
ዴራ ኑኡኮ ሎኦማኒ ዳንዳዔሢና ዜርቂንቲ ባይቂ ዓቴሢ ዬያሮኬ።
22 ዋይዙዋቴ፤ ዓኪ ሃይሴ ኬኤዚንታኔ!
ኬዴኖ ዛሎ ካኣቲ ዪሁዳ ካታሞ ጉሪ ቦኦሊ ዳውሌ
ጊንሣ ሃሣ ዉኡካ ኮኦሚ ዓማላ ቤሲ ማሃኒ ጳሺዳኬ።»
23 ናንጊና ናንጋ ጎዳሢዮ! ዓሲኮ ሼምፓ ዬያ ዓሢ ኩጫ ማዒባኣሢ
ዒ ናንጋ ናንጎዋ ፔኤሮ ፒዚሲ ዔኪ ዓኣዻኒ ዳንዳዑዋኣሢ ታ ዔራኔ።
24 ናንጊና ናንጋ ጎዳሢዮ! ኔኤኒ ፒዜ ዎጋያ ማዔሢሮ ኑና ዞሪ ጎሬ፤
ጋዓንቴ ኑኡኒ ጋፒ ባይቁዋጉዲ ኔኤኒ ዻጋዺ ዓኣንቴ ዬይ ማዖፓ።
25 ኔኤኮ ዻጎ ኔና ዔሩዋ ዓሶና ኔ ሱንፆ ዔኤሊ ካኣሽኩዋ ዴሮይዳ ጮኦሽኬ፤
ዔያታ ኔኤኮ ዴሮ ኩርሴኔ፤
ኑና ቢያሢ ዔያታ ጋፒሲ ባይዚ፥ ዓጮ ኑኡኮ ጉሪ ማሂ ሃሼኔ።