1 ዬኖ ዎዶና ባብሎኔ ዓጮ ካኣቲ ባልዳኣኔ ናኣዚ፥ ሜሮዳኬ ባልዳኣኔ ጎዖሢ ካኣቲ ሂዚቂያሴ ሃርጊንቲ ፖዔሢ ዋይዜኔ፤ ዬያሮ ሂዚቂያሴም ዒንጎንዶ ባኣዚንታ ዳብዳቤያ ፃኣፒ ዳኬኔ። 2 ሂዚቂያሴ ዒዛ ኮይላ ሙኬ ዓሶንሢ ዎዛና ዔኬኔ፤ ዬካፓ ካኣቱሞ ማኣሮኮ ሜሆ ጌሦ ማኣሮይዳ ዓኣ ባኮ ጉቤ ቢሮንታ ዎርቆንታ ዱማ ዱማ ሳውቃ ዼኤሾና ሳውቂሶና ቲዦንታ ዖሎ ዓንጋሞንታ ሜሆ ቢያ ዬያ ዓሶ ቤኤዜኔ፤ ዒዛኮ ካኣቱሞ ማኣሮኮ ሜሆ ጌሦ ማኣራ ማዔቴያ ዒዚ ዎይሣ ዓጮይዳ ዓኣ ዓይጎ ቤስካ ዓኣ ቆሎ ቢያ ሂዚቂያሴ ዬያ ዓሶም ቤኤዙዋዖ ሃሼ ፔቴ ባኣዚታዖ ባኣሴ። 3 ዒማና ፆኦሲ ማሊፆ ኬኤዛ ዒሲያሴ ካኣቲ ሂዚቂያሴ ኮራ ዓኣዻዖ፦ «ዬንሢ ዓሶንሢ ዓንካፓ ሙኬይ? ሃሣ ዔያታ ዓይጎ ኔኤም ኬኤዜይ?» ጌዒ ዖኦጬኔ።

ሂዚቂያሴያ ማሃዖ፦ «ዔያታ ሙኬሢ ባብሎኔ ጌይንታ ሃኬ ዓጪፓኬ» ጌይ ማሄኔ።

4 ዒሲያሴ ጊንሣ፦ «ካኣቱሞ ማኣራ ዔያታ ዓይጎ ዛጌይ?» ጌይ ዖኦጬኔ።

ሂዚቂያሴያ፦ «ዔያታ ቢያ ባኣዚ ዛጌኔ፤ ሜሆ ጌሦ ማኣሮይዳ ዓኣ ባኮይዳፓ ቢያ ታኣኒ ዔያቶም ቤኤዙዋዖ ሃሼ ዓይጎ ባኣዚያ ባኣሴ» ጌዔኔ።

5 ዬካፓ ዒሲያሴ ካኣቲም፦ «ቢያ ባኮ ዎይሣ ጎዳ ማዔ ፆኦዛሢ ጋዓሢ ዋይዜ፦ 6 ኔኤኮ ቤርታ ዓዶንሢ ሙኪ ሃኖ ሄላንዳኣና ቡኩሴ ቆላ ካኣቱሞ ማኣሮይዳፓ ኔኤኮ ቢያ ፒፂንቲ ዔኪ ባብሎኔ ዓጮ ዓኣዺንታንዳ ዎዴ ሙካንዳኔ፤ ፔቴ ባኣዚታዖ ኔኤም ዓታዓኬ። 7 ኔኤኮ ዜርፆይዳፓ ፔቴ ፔቴዞንሢ ባብሎኔ ዓጮ ዲዒ ዔኪ ዓዺንቲ፥ ዬያ ዓጮኮ ካኣቱሞ ማኣራ ዓሽቲሚ ማዒ ማዻንዳጉዲ ዔያቶ ማሆንዶኔ» ጌዔኔ። 39፡7 ዳኣኔ. 1፡1-7፤ 2ካኣቶ. ማ 24፡10-16፤ 2ፆኦሲ. ዓሃኬ 36፡10።

8 ካኣቲ ሂዚቂያሴ ጋዓንቴ ዒዚ ዎይሣ ዎዶና ዓጫ ኮሺ ማዒ ዴዓንዳሢ ዔርቴያ ማዔሢሮ፦ «ናንጊና ናንጋ ጎዳይዳፓ ዔኪ ሙኪ ኔኤኒ ታኣም ኬኤዜ ቃኣላ ኮሺኬ» ጌዔኔ።