7
ዑኡታሢ ዓይኑሞ
1 ካኣቲ ናዔሌ!
ዱርዞ ዓኣሢ ዓኣ ቶካ ኔኤኮ ዎዚ ሚዛጳይ!
ጉባዛ ኔኤኮ ዓንጎ ሼኤሺ ኮሻ ዓሳ ሚዛጲሲ ኮሼ ፓልሞ ማላኔ።
2 ጉልዓ ኔኤኮ ዎይኔ ዑሺ ዓርሦና ቢሪሌ ማላኔ፤
ኬርና ኔኤኮ ሚዛጲ ቡኒ ሺርሺ ቱኮና
ዛርጎ ናቲጉዲኬ።
3 ላምዖ ዻንፃ ኔኤኮ ሜንቴ ሾይንቴ ሞይሌ ናይ ማላኔ።
4 ባቃና ኔኤኮ ዳርሲ ዓቺና ሚዛጲሶና ዼጌ ቤዞጉዲኬ፤
ዓኣፓ ኔኤኮ ዼኤፖ ካታሞ ሃሴቦኦኔ ጌሎ ካራ ዓኣ
ቦቆሎ ዋኣፆ ማላኔ።
ሲኢዻ ኔኤኮ ዒኢካ ዴዒ ዴማስቆ ዛጋኒ
ኮሾና ሊባኖኦሴይዳ ዓኣ ዼጌ ቤዞጉዲኬ።
5 ኔኤኮ ቶኦካ ቄርሜሎሴ ዹኮጉዲኬ፤
ኔኤኮ ማዢንቴ ቶኦኮ ጋማ ጉኡፂሲ ሱኮና ቃጪና ማላኔ።
ካኣቲ ኔኤኮ ዬያ ማዢንቴ ቶኦኮ ሚዛጱሞና ዲዒንቴኔ።
6 ታ ሚሼሌ! ዎዚ ኔኤኒ ሚዛጳይ?
ዎዚ ኔኤኒ ኮሽካይ?
ኔ ናሽካ ናሹማ ዎዚ ዎዛሳይ?
7 ዔጳ ኔኤኮ ሜኤፄጉዲኬ፤
ዻንፃ ኔኤኮ ሜኤፆ ዓሞ ማላኔ።
8 ሜኤፆ ሚፆ ታኣኒ ጊዒ
ዓኣፖ ማንፂፆ ናሽካኔ፤
ዻንፃ ኔኤኮ ዎይኖ ዓሞጉዲኬ፤
ካሳ ኔኤኮ ጋሲ ካሢ ሳውቃያጉዲኬ።
9 ዻንጋ ኔኤኮ ቃራ ዎይኔ ዑሺጉዲኬ።
ዑኡቴሎ ዓይኑሞ
ያዺ ማዔቴ ኮዦ ዎይኖ ዑዣ
ታ ዒሾኮ ሙሱሮና ዓጮ ባኣኪና
ሻኣዺ ኬዳያ ማዖንጎ።
10 ታኣኒ ታ ዒሻሢሮኬ፤
ዒዚያ ዓፃዺ ማላሢ ታናኬ።
11 ታ ዒሼ! ሃኒ ዬዔ፤
ካታማፓ ዙሎ ኬስኪ ኑ ዎላ ዓኣዾም፤
ዒባኖ ዒኢካ ኑ ዴንዲ ዎርቆም።
12 ሚኢሪ ዔቂ ዎይኖ ጎዦ ኑ ዓኣዾም፤
ዎይኖ ቡና ዹኡቄያ ማዔቴ
ሮኦማናኣ ቡኔቴ ኑ ዛጎም፤
ዒኢካ ታና ታኣኒ ኔኤም ጉቤና ዓኣሢ ዒንጋንዳኔ።
13 ማንዳሪክሴ* 7፡13 ማንዳሪክሴ ጋዓዞ፦ ማዢ. ማፃ 30፡14ይዳ ዛጌ። ጌይንታ ሚፆ ቡኖ ሳውሞንታ
ሃሢ ዱኡዞናሢ ማዔቴያ ካፄ ሚፆ ዓኣፓኣ
ኑ ካራ ኩሚ ዓኣኔ፤
ታ ዒሼ! ዬያይዳፓ ታ ኔኤም ጌሤኔ።