103
ዳውቴ ዓይኑሞ
ፆኦሲ ናሹሞ
1 ታኣኮ ሼምፔሌ! ናንጊና ናንጋ ጎዳ ዓንጄ!
ታኣኮ ጋሮ ዑፃኣ ቢያ ዒዛኮ ዱማዼ ሱንፆ ጋላቱዋቴ።
2 ታኣኮ ሼምፔሌ! ናንጊና ናንጋ ጎዳ ዓንጄ፤
ኔኤም ዒ ማዼ ባኮ ቢያ ዋሊፖ።
3 ጎሞ ቢያ ኔኤኮ ዓቶም ጋዓሢ
ሃርጎ ኔኤኮ ቢያ ፓሣሢ፥
4 ናንጎ ኔኤኮ ባይሲንቶ ዔቶፓ ዓውሳሢ
ፔኤኮ ሚጪንቲፆና ኮሹሞና ኔና ጎኦባሢ፥
5 ጋርቼ ዎልቆ ኔኤኮ ዓዳ ኮኦኬ ጎይሢ ዓካሳሢ
ኔኤኒ ማላ ባኮ ፔ ኮሹሞና ኩንሣሢ
ኔኤም ዒዛኬ።
6 ናንጊና ናንጋ ጎዳ ሄርቂንቲ ዎርቃዞንሢም ቢያ
ፒዜ ዎጌ ዎጋኔ።
7 ጎይፆ ፔኤሲ ሙሴም
ማዾዋ ፔኤሲ ዒስራዔኤሌ ዓሶም ዒ ቤኤዜኔ።
8 ናንጊና ናንጋ ጎዳ ሚጪንታያና ዓቶም ጋዓያ
ዻጋዻኒ ሩኡሩዋያና ናሹማኣ ሚርጌያኬ። 103፡8 ያይ. 5፡11።
9 ዒዚ ቢያ ዎዴ ዻቢንቲ ሙሪ ሃንቱዋሴ፤
ዻጋዼ ጎይሣኣ ዴዑዋሴ።
10 ዒዚ ኑም ኑኡኮ ጎሞጉዴያ ማሂ ዒንጊባኣሴ፤
ኑ ዻቢንቶጉዴያኣ ጪጊባኣሴ።
11 ጫሪንጫ ሳዓፓ ሌካ ዼጋሢጉዲ
ዒዛኮ ሚጪንቲፃ ዒዛ ዒጊጫ ዓሶም ዼኤፒኬ።
12 ዓባ ኬስካ ባንፃ ጌላ ባንፃፓ ሃካሢጉዲ
ዻቢንቶ ኑኡሲ ኑፓ ዒ ሃኪሴኔ።
13 ዓዴ ፔኤኮ ናኣቶ ሚጪንታሢጉዲ
ናንጊና ናንጋ ጎዳ ዒዛ ዒጊጫዞንሢ ሚጪንታኔ።
14 ዒዚ ኑኡኮ ማዢንቶ ዔዔራኔ፤
ኑኡኒ ሲላሊ ማዔሢያ ማላኔ።
15 ዓሲኮ ናንጎ ዎዳ ማኣቲጉዴያኬ፤
ካይዚዳ ዑጊ ቡና ቡኒጉዲኬ።
16 ካይዚ ቡኒ ዢባሬ ዢባርሻ ዎዶና ቤዞና ዲኢኒ ባይቃኔ፤
ዬይ ዎንዴ ዒኢካ ዓኣያ ማዔሢያ ዔርቱዋሴ።
17 ናንጊና ናንጋ ጎዳኮ ሚጪንቲፃ ጋዓንቴ
ናኣናና ዒዛ ዒጊጫዞንሢምኬ፤
ዒዛኮ ፂሉማኣ ናዖኮ ናዖ ሄላንዳኣናኬ።
18 ዒዚ ዬያ ማዻሢ ጫኣቁሞ ካፓዞንሢና
ዓይሢፆዋ ዶዲ ካፓዞንሢምኬ።
19 ናንጊና ናንጋ ጎዳኮ ካኣቱሞ ዖይታ ጫሪንጫ ዶዴኔ፤
ካኣቱማኣ ዒዛሲ ቢያሢ ዎይሣኔ።
20 ዒንሢ ዒዛኮ ቃኣሎም ዓይሢንታ ኪኢታንቻ
ዒዛኮ ዓይሢፆ ማዺ ኩንሣ ዎልቆሮንሢ
ናንጊና ናንጋ ጎዳ ዓንጁዋቴ።
21 ዒንሢ ዒዛኮ ማሊፆ ማዺ ኩንሣ
ጫሪንጫ ዓኣ ማዢንታ
ናንጊና ናንጋ ጎዳ ዓንጁዋቴ።
22 ዒንሢ ዒዚ ዎይሣ ዓጫ ናንጋ ዓሳ ቢያ
ማዢንታኣ ቢያ ናንጊና ናንጋ ጎዳ ዓንጁዋቴ፤
ታ ሼምፔሌ! ዒዛ ዓንጄ።