95
ጋላታ ዓይኑሞ
1 ሃኒ ሙኩዋቴ፤ ዎዛና ኑ ናንጊና ናንጋ ጎዳም ዓይናዾም!
ኑኡኮ ዻቂንቶ ላላሢም ኑ ዒላሾም!
2 ዒዛም ማዓ ጋላታ ዓይኑሞ ዔኪ
ኑ ዒዛ ቤርቶ ሺኢኮም!
ዓይኑሞና ኑ ዒዛ ሄርሾም፤
3 ናንጊና ናንጋ ጎዳ ዼኤፒ ፆኦሲታሢሮ
ሜሌ ፆኦዛፓ ዑሣ ዒ ዼኤፒ ካኣቲታሢሮ።
4 ሳዖ ዴማኣ ቢያ ዒዛ ኩጮ ጋራኬ፤
ዹኮኮ ቶኦካኣ ዒዛሲኬ።
5 ዒዚ ማዤሢሮ ባዛ ዒዛሮኬ፤
ኩጫ ዒዛኮ ሳዖ ኮሼኔ።
6 ሃኒ ሙኩዋቴ፤ ኑ ዒዛ ካኣሽኪ ዚጎም!
ኑና ማዤ ናንጊና ናንጋ ጎዳ ቤርታ ኑ ጉምዓቶም።
7 ዒዚ ኑኡኮ ፆኦዛሢኬ፤
ኑ ዒዛ ኩጮ ካፒፆ ዴማ ዓኣ ማራቶ
ኑና ዒ ሄንቃ ዒዛኮ ዴሮኬ፤
ዬያሮ ዒዚ ሃኖ ሂዚ ጌዒ ኬኤዛሢ ዋይዙዋቴ፦
8 «ዬያ ዓሳ ናንጉዋ ዳውላ ሜሪባና ማሳ ጌይንታ ቤዛ
ዒንሢኮ ቤርታኣ ዓዶንሢ ማዼሢጉዲ
ዒንሢያ ዋይዚ ዒፃያ ማዒፖቴ። 95፡8 ዔብ. 3፡15፤ 4፡7።
9 ዔያታ ማዾ ታኣሲ ዛጌያ ማዔያታቴያ
‹ታ ዎይታቴያ› ጌዒ ታና ዔያታ ዛጌኔ፤
ማሂ ማሂ ታና ዔያታ ዎይታቴያ ዛጌኔ። 95፡9 ኬሲ. ማፃ 17፡1-7፤ ፓይ. ማፃ 20፡2-13።
10 ዬኖ ሾይንቶ ዖይዲታሚ ሌዔ ጉቤ ታኣኒ ሻኣኪንቴኔ፤
ዒማና ታኣኒያ፦ ‹ዒና ዔያቶኮ ታና ሃሼ ዴሬኬ፤
ጎይፆዋ ታኣሲ ዔያታ ዔሩዋሴ› ጌዔኔ።
11 ዬያሮ፦ ‹ፔቴታዖ ታኣኮ ሃውሾይዳ ዔያታ ጌላዓኬ›
ጌዒ ታኣኮ ዻጎና ታ ጫኣቄኔ።» 95፡11 ፓይ. ማፃ 14፡20-23፤ ላሚ. ዎማ 1፡34-36፤ 12፡9-10፤ ዔብ. 4፡3-5።