51
ዓይኑሞ ሱኡጋሢ ዓይሣ ጎይፆና ዓይናዺንታ ዳውቴ ዓይኑሞ፤ ዳውቴ ቤርሳቤሄ ዒኢሴያና ፆኦሲ ማሊፆ ኬኤዛ ናኣታኔ ሙኪ ዒዛ ጎሬኔ።
ማኣሪንታኒ ሺኢቂንቴ ሺኢጲሢ
1 ፆኦሲዮ! ኔኤኮ ኮሹሞጉዴያ ታና ማኣሬ፤
ኔኤኮ ሚጪንቲፆ ሚርጉሞና
ዻቢንቶ ታኣኮ ዓቶም ጌዔኔ። 51፡1 2ሳሙ. 12፡1-15።
2 ዻቢንቶ ታኣኮ ጋፒሲ ማስኬ፤
ታ ጎማፓ ታና ጌኤሼ።
3 ታኣኒ ታኣኮ ዻቢንቶ ዔራኔ፤
ቢያ ዎዴ ጎማ ታኣሲ ታ ቤርታ ታኣም ጴዻኔ።
4 ታኣኒ ዋይዞ ዒፄሢ ኔኤምኬ፤
ታ ኔ ቤርታ ፑርታ ባኣዚ ማዼኔ፤
ኔኤኒ ዒፃ ባኮ ታ ማዼኔ፤
ዬያሮ ኔኤኒ ታኣም ዎጌ ዎጊፆና
ሜታሢያ ሄሊሴሢ ፒዜኬ። 51፡4 ሮሜ 3፡4።
5 ታ ዒንዳ ታና ጎጳዼማፓ ታኣኒ ጎሜናኬ፤
ሾይቴማፓ ዓርቃዖ ታ ዻቢንቴያኬ።
6 ኔኤኒ ፒዜ ማዒሢና ጎኑሞና ናሽካሢሮ
ኔ ዔራቶኮ ዓኣሺንቴ ባኮ ታና ዔርዜ።
7 ሂሶጴ ዒላዦና ታና ኮርዴ፤
ታኣኒያ ጌኤሽካንዳኔ፤
ታና ማስኬ፥ ሻቺዳፓ ባሼ ታኣኒ ቦኦራንዳኔ።
8 ዎዛ ዑኡሲ ኔ ታና ዋይዚሴ፤
ኔ ታኣኮ ሜንሤ ሜጌፃ ዎዛዻንዳኔ።
9 ታኣኮ ጎሞ ዛጊፖ፤
ዻቢንቶዋ ታኣም ዓቶም ጌዔ።
10 ታ ፆኦዛሢዮ! ጌኤሺ ዒና ታኣም ዒንጌ፤
ፒዜ ማዔ ዓያና ጋራ ታኣኮ ጌሤ።
11 ኔ ቤርታፓ ታና ሺኢሺፖ፤
ኔኤኮ ዱማዼ ዓያኖዋ ታጊዳፓ ዔኪፖ።
12 ኔኤኒ ታና ዓውሴ ዎዶና ዒንጌ ዎዞጉዴ ዎዛ ታኣም ዒንጌ፤
ዓይሢንታያ ማዓንዳጉዲ ታና ማኣዴ።
13 ዬካፓ ታኣኒ ዓይሢፆ ኔኤኮ ካፑዋ ዓሶ ዔርዛንዳኔ፤
ጎሞ ዓሳኣ ኔ ባንሢ ማዓንዳኔ።
14 ታኣኮ ዼኤሻሢ ማዔ ታ ፆኦዛሢዮ!
ዓሲ ዎዺሢዳፓ ታና ኔ ካፔ፤
ኔኤኒ ዓውሳያ ማዔሢሮ ጋላታ ዓይኑሞ ታ ዓይናዻኔ።
15 ናንጊና ናንጋ ጎዳሢዮ! ዻንጎ ታኣኮ ቡሌ፤
ታኣኒያ ኔና ጋላታንዳኔ።
16 ዎንዴ ኔ ዒንጎ ባኣዚ ናሽካያ ማዔቴ
ታኣኒ ኔኤም ዒንጌያ ናንዳኔ፤
ሚቺ ዒንጎ ዒንጊፃኣ ኔና ዎዛሱዋሴ።
17 ፆኦሲም ዒንጊንታ ዒንጊሢ ሜቄ ዒኔኬ፤
ሜቄያና ሂርኪ ጌዔ ዒና ዒዚ ቦሁዋሴ።
18 ፆኦዛሢዮ!
ፂዮኔ ማኣዳኒ፥ ዬሩሳላሜኮዋ ኬኤሎ ዲፆ ኮሻኒ
ሃዳራ ኔኤኒ ጌዔሢጉዲ ማዖንጎ።
19 ዬማ ዎዶና ፒዜ ዒንጎ ዒንጊፆንታ
ሚቺ ዒንጎ ዒንጊፆናኣ ኔኤኒ ዎዛዻንዳኔ፤
ኑኡኒያ ኔኤም ዒንጎ ባኮ ዒንጎ ቤዛ ዚዮ ጌማቶ ሺኢሻንዳኔ።