ጎሞ ማዻ ዓሶሲ ዛጊ «ዔያቶም ዬይ ዓይጋ ማዔይ!» ጌይ ማሊፖ።

ዋላሺጉዲያኣ ሹሊ ዲኢናንዳኔ።

ዓጮይዳ ኮሺና ኔኤኒ ናንጋንዳኔ።

ዒዚያ ኔኤኮ ዒና ኮዓ ባኮ ዒንጋንዳኔ።

ናንጊና ናንጋ ጎዳም ሃዳርሲ ኔና ዒንጌ፤

ዒዛ ጉሙርቄ፥ ዒዚ ኔና ማኣዳንዳኔ።

ኔኤም ዎጊንታ ዎጎዋ

ዓቢ ዹኡሲጉዲ ፖዒሳንዳኔ።

ናንጊና ናንጋ ጎዳ ማዻ ባኮ ዛጋኒ ካፔ፤

ሜሌ ዓሶኮ ፑርቶ ማሊፃ ዔያቶም ጊኢጌያ ማዔቴያ ሮኦጋዺፖ።

ዻጋይዳፓ ኔና ማሄ፥ ሮኦጋዺሢዳፓኣ ካፒንቴ።

ናንጊና ናንጋ ጎዳ ጉሙርቃዞንሢ ጋዓንቴ ሳዖ ዔካንዳኔ።

ፑርቶ ማዻ ዓሳ ሩኡሪና ባይቃንዳኔ፤

ኔኤኒ ዔያቶ ኮዔያታቴያ ዴንቃዓኬ።

ዖርጎቹሞና ኮሹሞና ዴንቂ ዔያታ ዎዛዻንዳኔ። 37፡11 ማቲ. 5፡5።

ሜሌ ዓሶ ፑርቱሞና ዒዛ ዑፃ ዔቂሳኔ፤

ዒዛ ዒፂሢና ሃኣሚ ዻዓኔ።

ናንጊና ናንጋ ጎዳ ዔያቶ ሚኢጫኔ።

ማንቆ ዓሶንታ ሜታዻ ዓሶዋ ዎዻኒ

ኮዦ ማዾ ማዻዞንሢያ ሹካኒ

ፔኤኮ ጬንቾ ዓፓሮ ቱጋኔ፤

ሂኢዦዋ ፔኤኮ ጊኢጊሻኔ።

ዔያቶ ሳዞ ማዒ ጫርጋንዳኔ፤

ሂኢዣኣ ዔያቶሲ ሜቃንዳኔ።

ኮሺ ዓሲኮ ዻኮ ቆሎንሢ ባሼኬ።

ፂሎ ዓሶ ጋዓንቴ ናንጊና ናንጋ ጎዳ ዶዲሻንዳኔ።

ዴና ዔያቶሲ ዔያቶም ማዒ ቢያ ዎዴ ናንጋንዳኔ።

ሉማሢ ዎዶና ሙኡዚ ዴንቂ ዔያታ ሚሽካንዳኔ።

ናንጊና ናንጋ ጎዳኮ ሞርካ ቡኒጉዲ ዲኢናንዳኔ፤

ዓዳ ጩቢ ባይቃሢጉዲ ዓኣፓፓ ባይቃንዳኔ።

ጋዓንቴ ማሂ ዬያ ጪጉዋሴ፤

ፂሎ ዓሲ ጋዓንቴ ሚጪንታኔ፤

ማሂያኣ ዒንጋኔ።

ዒዚ ጋዳንቄ ዓሳ ጋዓንቴ ባይቃንዳኔ።

ዒዚ ዬያ ዓሢኮ ናንጋ ፒዜ ማዒፆ ጎናሳኔ።

ናንጊና ናንጋ ጎዳ ፔ ኩጮና ኬኤሊንቂ ዒዛ ዓርቃንዳኔ።

ዬያይዳ ናንጊና ናንጋ ጎዳ ኮሺ ዓሲ ሃሼም

ናኣታ ዒዛኮ ሙኡዚ ባይዚ ሺኢቃንቴ

ፔቴታዖ ታኣኒ ዛጊባኣሴ።

ዒዛኮ ናኣታኣ ዓንጂንቴያ ማዓንዳኔ።

ናንጊና ኔኤኒ ናንጋንዳኔ።

ዒዛም ጉሙርቂንታዞንሢ ዒ ሃሹዋሴ፤

ፑርቶ ማዻ ዓሶኮ ዜርፃ ጋዓንቴ ባይቃንዳኔ።

ዒዞይዳ ዔያታ ናንጊና ናንጋንዳኔ።

ዒንዲርዛ ዒዛኮ ፒዙሞ ጌስታኔ።

ቶካ ዒዛኮ ቡኡዲንቱዋሴ።

ዎዻኒያ ዒዛ ዒ ኮዓኔ።

ዒዛኮ ሞርኮም ዓኣሢ ዒንጊንዱዋሴ፤

ዓሲ ቡካ ቤዞይዳ ሞኦቶና ዓሳ ዒዛ ላሢንዱዋሴ።

ጎይፆዋ ዒዛሲ ካፔ፤

ዒዚ ሳዖ ኔኤም ዻካልሲ ኔና ቦንቺሳንዳኔ፤

ፑርቶ ዓሳ ባይቃንቴ ኔ ዛጋንዳኔ።

ዓዳ ሊባኖኦሴ ሚፆጉዲ ዋርቂ ዓኣንቴ ታ ዛጌኔ፤

ዒኢካ ዬይ ሚፃሢ ባኣሴ፤

ኮዒያ ታ ዒዛ ዴንቂባኣሴ።

ኮሺ ማዔ ዓሲኮ ሃጊ ማዓ ዎዛ ዓኣኔ።

ዜርፃኣ ዔያቶሲ ባይቃንዳኔ።

ሜታሢ ዎዶና ፑኖ ካያሢ ዔያቶኮ ዒዛኬ።

ፑርቶ ማዻ ዓሶ ኩጫፓ ዔያቶ ዒ ኬሳንዳኔ፤

ዔያታ ዒዛ ፔኤኮ ፑኖ ካያሢ ማሄሢሮ

ዒዚ ዔያቶ ዓውሳንዳኔ።