22
ዓይኑሞ ሱኡጋሢ ዓይሣ ጎይፆና ካሪፆ ዎልቄ ዛላ ዓይናዺንታ ዳውቴ ዓይኑሞ
ዖዪሢ ዒላቲና ጋላታ ዓይኑሞና
1 ታ ፆኦዛሢዮ! ታ ፆኦዛሢዮ! ኔ ታና ዓይጋ ሃሼይ?
ኔኤኒ ታና ዓውሲፆ ሃሺ ሃኬሢ ዓይጎሮዳይ?
ታኣኮ ዚኢሊንቲፆ ዑኡዞይዳፓ ዓይጋ ኔ ሃኬይ? 22፡1 ማቲ. 27፡46፤ ማር. 15፡34።
2 ታ ፆኦዛሢዮ! ሮኦሮ ታ ኔ ባንሢ ዒላታኔ፤
ኔኤኒ ጋዓንቴ ታኣም ዋይዙዋሴ፤
ዋንቶዋ ታ ዔኤሊንታኔ፥ ሃውሺያ ታኣኮ ባኣሴ።
3 ኔኤኒ ጋዓንቴ ዒስራዔኤሌ ዓሳ ኔና ጋላታያ
ኔኤኮ ካኣቱሞ ዖይቶይዳ ዴዒ ዎይሣ ዱማዼ ፆኦሲኬ።
4 ኑኡኮ ቤርታኣ ዓዶንሢ ኔና ጉሙርቄኔ፤
ዔያታ ኔና ጉሙርቄም ኔኤኒያ ዔያቶ ዓውሴኔ።
5 ኔ ማኣዳንዳጉዲ ዔያታ ኔ ባንሢ ዒላቴ ዎዶና
ኔኤኒ ዔያቶ ዓውሴኔ፤
ዔያታ ኔና ጉሙርቄሢሮ ኔ ዔያቶ ቦርሲሲባኣሴ።
6 ታኣኒ ጋዓንቴ ዓሲዳፓ ቢያ ላኣፓ፥ ዛኣሌ ማዔያኬ፤
ዓሳ ታና ሚኢጫኔ፥ ዓሲ ባኣካ ታኣኒ ቶኦቺንቴያኬ።
7 ታና ዛጋ ዓሳ ቢያ ቦሂ ሺራኔ፤
ዔያታ ቶኦኮ ፔኤሲ ዓጊሢ ዓጊሢ
ሂዚ ጌዒ ታና ሚኢጫኔ፦ 22፡7 ማቲ. 27፡39፤ ማር. 15፡29፤ ሉቃ. 23፡35።
8 «ናንጊና ናንጋ ጎዳ ዒዛ ዓውሳንዳኔ ጌዒ
ዒዚ ጎዳ ጉሙርቃኔ፤
ሂንዳ ዒዚ ዒዛ ናሽካያታቴ ዓውሶንጎ» ጋዓኔ። 22፡8 ማቲ. 27፡43።
9 ኮሺና ታ ሾይንታንዳጉዲ ማሄሢ ኔናኬ፤
ናይ ማዒ፥ ታ ዒንዶኮ ዻንፆ ታ ዻንቃንቴያ
ታ ጉሙርቄሢ ኔናኬ።
10 ታ ዒንዶ ጎጳፓ ኬስካዖ ኔ ዑፃ ታ ሃሺንቴኔ፤
ታ ዒንዳ ታና ሾዔማፓ ዓርቃዖ ታኣኮ ኔ ፆኦዛሢኬ።
11 ታና ሜታ ሄላኒ ዑኬሢሮ፥ ሃሣ ታና ማኣዳያኣ ባኣሢሮ
ሃዳራ ኔኤኒ ታ ኮራፓ ሃኪፖ!
12 ሚርጌ ሞርካ ዓዳ ዹዋ ጌማይጉዲ ታና ማንጌኔ፤
ዎልቆና ዓኣ ባኣሳኔ ዓጮ ዚዮ ጌማቶጉዲ ማንጊ ታና ዔቄኔ።
13 ኬሚ ዎዺ ሾኦሊ ሙዓንዳ ዞቢ ጉዻሢጉዲ
ዻንጎ ፔኤኮ ዔያታ ታ ዑፃ ሻዔኔ።
14 ዎልቃ ታኣኮ ላቢ ዓዳ ዋኣሢ ማዔኔ፤
ሜጌፃኣ ታኣኮ ቢያ ጪጊጫፓ ኮልኮልቄኔ፤
ጋሮይዳ ዒና ታኣኮ ሾፒጉዲ ዓልቄኔ።
15 ዎልቃ ታኣኮ ሃይቄ ቦኦቆ ሜቂሢጉዲ ዶዴኔ፤
ዒንዲርዛ ታኣኮ ፃኣዺ ሆንጎላሢዳ ዓዺንቴኔ፤
ኔኤኒ ታና ሃይቄ ዓሲጉዲ ሲላሎይዳ ሃሼኔ።
16 ፑርቶ ማዻ ዓሳ ካኒ ቡኪ ማንጋሢጉዲ ታና ማንጌኔ፤
ዞባ ታኣኮ ኩጮንታ ቶኮንታ ፔ ፁንጎና ፃጴኔ።
17 ሜጌፃ ቢያ ታኣኮ ፓይዲንታያ ማዒ ፔጋዺ ጴዼኔ፤
ታ ሞርካ ታና ጊዥ ጌዒ ቶኦቺሢና ዛጌኔ።
18 ዓፒሎ ዔያታ ታኣኮ ጊሽቲ ዔኬኔ፤
ታኣኮ ዖዶዞ ዓፒሎይዳኣ ዱማሲ ዔሮ ባኮ ዓጌኔ። 22፡18 ማቲ. 27፡35፤ ማር. 15፡24፤ ሉቃ. 23፡34፤ ዮሃ. 19፡24።
19 ናንጊና ናንጋ ጎዳሢዮ! ታ ኮራፓ ሃኪፖ፤
ታና ማኣዳሢዮ! ታና ማኣዳኒ ዑካዼ።
20 ሼምፓሢ ታኣኮ ጬንቾ ዓፓሮና
ዬያቶ ካናቶ ዎልቆናፓ ዓውሴ።
21 ዞቦ ዻንጋፓ ታና ዓይሴ፤
ጫርጋ ሜኤኖ ጉራናፓ ታና ካፔ።
22 ኔ ሱንፆኮ ዼኤፑሞ ታ ዒጊኖም ታ ኬኤዛንዳኔ፤
ዔያታ ቡኪንቴ ቤዛ ታ ኔና ጋላታንዳኔ። 22፡22 ዔብ. 2፡12።
23 ዒንሢ ናንጊና ናንጋ ጎዳ ዒጊጫ ዓሳ ጋላቱዋቴ!
ዒንሢ ያይቆኦቤ ዜርፃ ቢያ ዒዛ ቦንቹዋቴ!
ዒንሢ ዒስራዔኤሌ ዜርፃ ቢያ ዒጊቹሞና ዒዛ ዼግ ዼጊዱዋቴ!
24 ዒዚ ሄርቂንቲ ዎርቃ ዓሶኮ ሜቶ ቶኦቺባኣሴ፤
ዬያ ዔያቶኮ ዒ ዛጊ ሻኣኪንቲባኣሴ፤
ፔኤኮ ዓኣፖ ካሮዋ ዔያቶይዳፓ ዒ ሺርሺባኣሴ፤
ጋዓንቴ ፔና ማኣዳንዳጉዲ ዒላታ ዒላቶ ዋይዜኔ።
25 ኔኤኒ ማዼ ኮዦ ማዾሮ
ሚርጌ ኔ ዴራ ቡኬ ቤዛ ታ ኔና ጋላታንዳኔ፤
ኔና ዒጊጫ ዓሶ ቤርታ ታ ዔቂ
ታኣኒ ናኣቤ ናኣቦ ኩንሣንዳኔ።
26 ማንቆ ዓሳ ሚሽካንዳያ ሄላንዳኣና ሙዓኔ፤
ናንጊና ናንጋ ጎዳ ኮዓዞንሢያ ዒዛ ጋላታኔ፤
ዒና ዔያቶኮ ዔያታ ናንጋ ዎዶ ቢያይዳ ዎዛዻኔ።
27 ዓጮኮ ጋፖ ሄላንዳኣና ዓኣ ዓሳ ቢያ ማሊ ጶቂሥሢና
ናንጊና ናንጋ ጎዳ ባንሢ ማዓኔ፤
ዓጮይዳ ዓኣ ዴራ ቢያ ዒዛም ዚጋንዳኔ።
28 ቢታንቶ ቢያ ኔኤሮኬ፤
ዴሬ ቢያ ኔኤም ዎርቃኔ።
29 ናንጊና ናንጋ ጎዳሢዮ! ሚርጌ ቆሎ ዓኣ ዓሳ ቢያ ኔኤም ዚጋንዳኔ፤
ሃይቂ ዱኡታኒ ዑኪ ዓኣሢያ ቢያ ሙኪ ኔ ቤርታ ጉምዓታንዳኔ።
30 ሙካንዳ ሾይንታ ዒዛም ማዻንዳኔ፤
ሴካ ቤርታኣ ሾይንቶማኣ ፆኦሲ ባኣዚ ኬኤዚንታንዳኔ።
31 ሃጊ ሾይንቲባኣ ዴሬም
ዔያታ ዒዛኮ ፂሉሞ ማዾ
«ናንጊና ናንጋ ጎዳ ዴሮ ፔኤሲ ዓውሴኔ» ጌዒ ጌዒ ኬኤዛንዳኔ።