10
ፒዜ ዎጌ ዎጊንታንዳጉዲ ሺኢቂንቴ ሺኢጲሢ
1 ናንጊና ናንጋ ጎዳሢዮ!
ዓይጎሮ ኔኤኒ ሃያይዲ ሃኪ ዔቄይ?
ሜታሢ ዎዶና ዓይጋ ኔ ዓኣሺንታይ?
2 ፑርቶ ማዻ ዓሳ ዖቶርቃኔ፥ ማንቆ ዓሶዋ ዔያታ ዳውሳኔ፤
ሜሌ ዓሶም ዔያታ ፒራ ፒራሢዳ ፔኤሮ ዓዺንቶንጎ።
3 ፑርቶ ዓሳ ፔኤኮ ፑርቶ ዓፁሞና ሄርሺንታኔ፤
ዔኤቢ ጊዴኔ ጎዑዋ ጎጋይቂ ሺራ ዓሶ ዔያታ ዓንጃኔ፤
ናንጊና ናንጋ ጎዳ ዔያታ ጫጫሽካኔ።
4 ፑርቶ ማዻ ዓሳ ፆኦሲ ዔኤቢኬ ጎዑዋሴ፤
ዔያታ ፔ ዖቶርሙሞና ፆኦሲ ባኣሴ ጌይ ማላኔ።
5 ፑርቶ ዓሶም ዔኤቢ ቢያ ዎዴ ጊኢጋኔ፤
ፆኦሲ ዎጎ ዔያታ ዔራኒ ዳንዳዑዋሴ፤
ዬያሮ ዒዚ ፔ ሞርኮ ሚሚኢጫኔ።
6 ዔያታ ፔ ማሊፆና፦ «ኑና ዓጊሣንዳይ ባኣሴ፤
ዓይጎ ሜታኣ ባኣያ ቢያ ዎዴ ኑ ዎዛዻንዳኔ» ጋዓኔ።
7 ዔያታ ጌስታ ጌኤዞይዳ
ጋዳማንታ ሉኡዙሞንታ ዚርቂሢያ ኩሜያኬ፤
ጌኔ ባኣዚንታ ፑርቱሞዋ ዔያቶ ዻንጋኬ። 10፡7 ሮሜ 3፡14።
8 ጉርዶኮ ጎይፆ ዓጫ ካቲ ዔያታ ዴዓኔ፤
ፂሎ ዓሶዋ ዉቱንቃ ካርካ ዔያታ ዎዻኔ፤
ዓኣፓ ዔያቶኮ ማንቆ ዓሶ ፑርቱሞና ዛጋኔ።
9 ካይዚዳ ናንጋ ዞቢጉዲ ዓኣሺንቲ ዔያታ ዴዓኔ፤
ማንቆ ዓሶ ዓርቃኒ ዒኢካ ካታኔ፤
ዔያቶኮ ፒራሢና ዓይሢ ጎቺ ዔያታ ዔካኔ።
10 ማንቆ ዓሶ ጳርቂ ዔያታ ኬኤራኔ፤
ማኣዳይ ባኣ ላቤ ዓሳ
ዔያቶ ኩጮ ጋሮ ጌሊ ሎኦሚ ዓታኔ።
11 ፑርታ ማዻ ዓሲ ፔ ዒኖና፦
«ፆኦሲ ታና ዋሌኔ፤
ዓኣፖ ካሮ ፔኤኮ ካንቂ ታና ዴንቁዋሴ!» ጋዓኔ።
12 ናንጊና ናንጋ ጎዳሢዮ ዔቄ!
ፆኦዛሢዮ ኔኤኮ ዎልቆ ኩጮ ዔቂሴ!
ሄርቂንቲ ዎርቃ ዓሶ ዋሊፖ።
13 ፑርቶ ማዻ ዓሳ
ፆኦሲ ዑፃ ዓይጋ ፑርታ ጌስታይ?
ፔ ዒኖና፦
«ታ ማዻ ባኮሮ ዒ ታጊዳ ሜቶ ዓጋዓኬ» ዓይጋ ጋዓይ?
14 ፆኦሲዮ! ኔኤኒ ጋዓንቴ ሜቶና ዋኣዮና ዛጊ
ዬያ ሼሌዒሶንዶ ጎይሢ ጊኢጊሻኔ፤
ሜታዼ ዓሳ ፔና ኔኤም ሃሻኔ፤
ዜኤሮ ናኣቶዋ ኔኤኒ ማኣዳኔ።
15 ጎሞ ዓሶንታ ፑርቶ ዓሶንታኮ ዎልቆ ላቢሴ፤
ሃካፓ ሴካ ፑርታ ባኣዚ ዔያታ ማዹዋጉዲ
ዔያታ ማዻ ፑርቶ ማዾሮ ሜቶ ዔያቶይዳ ዓጌ።
16 ናንጊና ናንጋ ጎዳ ካኣቲ ማዒ ናኣናና ናንጋኔ፤
ሜሌ ፆኦዞም ዚጋ ሜሌ ዴራ ጋዓንቴ
ሳዖይዳፓ ጋፒ ባይቃንዳኔ።
17 ናንጊና ናንጋ ጎዳሢዮ!
ኔኤኒ ማንቆ ዓሶኮ ሺኢጲፆ ዋይዛኔ፤
ዔያታ ሺኢቃ ሺኢጲፆ ዋይዚ ኔ ዔያቶ ዶዲሻኔ።
18 ሳዖይዳ ዓሲ ማዒ ማዢንቴ ዓሲ
ሜሌ ዓሶ ዲቃሡዋጉዲ
ዜኤሮ ናኣቶንታ ሄርቂንቲ ዎርቃ ዓሶንታ ዛሎ
ኔኤኒ ሞኦታኔ።