4
ዬሩሳላሜይዳ ሄሌ ሜቶ
1 ጌኤዦ ማኣሮ ማዦና ሹጫ ጉሪ ዞኦስካ ኬኤሪንቴኔ።
ዎዎይቴዖ ዎርቃ ሳልፔንቴሞ!
ጌኤዦ ዎርቃ ሜሌ ባኣዚ ማዔንቴሞ!
2 ፂዮኔይዳ ዓኣ ዓቲንቆ ናኣታ ጌኤሺ ዎርቄጉዲታዖኬ፤
ሃይሾ ሃሢ ማኒ ዢኢጬ ዓጪና ማዤ
ሜሄ ማዒ ዓቴንቴሞ!
3 ዉኡካሢታዖ ፔኤኮ ሾዖና ናኣቶ ዻዻንሢሣኔ፤
ሃይ ታኣኮ ዴራ ዓሲ ናንጉዋ ዳውሎይዳ ዓኣ ቱኡቴጉዲ
ፔኤኮ ናኣቶም ሚጪንቱዋያ ማዔንቴሞ!
4 ናኣቶ ዔያቶኮ ዋኣፃ ዼኤቤሢሮ ናኣቶኮ ዒንዲርዛ
ዻንጎይዳ ዓዺንቲ ዴዔኔ፤
ናኣታ ዔያቶኮ ሙኡዚ ሺኢቃኔ፤
ጋዓንቴ ፔቴታዖ ዔኤቢ ዔያቶም ዒንጋ ዓሲ ባኣሴ።
5 ሃያኮ ቤርታ ቃውቲ ቃውቲ ኮሺ ባኣዚ ሙዓ ዓሳ
ካራ ባይዚ ሴካ ሃንጋ ጉሪ ዤኤማኔ።
ጋላፒ ማዔ ሚዛጶ ማኣዓሢ ማይንቲ ዲጬ ዓሳ
ሃሢ ዲቢንሢ ላኣሎ ዱባይዳ ፔና ሃሺ ላሄኔ።
6 ታ ዴሮይዳ ሄሌ ሜታ
ዖኦኒያ ካኣሙዋንቴ ዶዒ ባይቄ
ሶዶሜ ካታሞ ሜታፓ ባሻያኬ። 4፡6 ማዢ. ማፃ 19፡24።
7 ካኣቶ ናኣቶ ማዔ ዔያቶ ሱኡጋ ዔያቶ ኮይላ
ሻቺፓ ባሼ፤ ዲኢቂፓኣ ባሼ ጌኤሽኪ ጴዻያኬ፤
ዔያቶኮ ሚዛጱማ ሴንፔሬ ጌይንታ ሹጮጉዲኬ።
8 ሃሢ ጋዓንቴ ዓኣፖ ካራ ዔያቶኮ ጪላንቺጉዲ ካርቴኔ፤
ዞኦዛ ዔያታ ሜታዺ ሃንታኣና ዔያቶ ዔራ ዓሲያኣ ባኣሴ፤
ሜልዚ ሚሢጉዲ ዒልዓ ዔያቶኮ ዑፆይዳ ፓፂ ባይቄኔ።
9 ናዮና ሃይቂ ኩዳ ዓሶይዳፓ
ጬንቾ ዓራፖና ዎዾ ዓሳ ቃራኬ፤
ሙዓ ባይቄሢሮ ዓሳ ዞኦዛ ናዮና ሜሊ ጉሪ ኩዳኔ።
10 ባይሲንታ ኬዴም ካታማ ካራ ባይቄ ዎዶና
ናኣቶ ሚጪንታ ላኣላ ፔ ኩቻ ፔኤኮ ናኣቶ ካሢ ሙዔኔ። 4፡10 ላሚ. ዎማ 28፡57፤ ሂዚ. 5፡10።
11 ናንጊና ናንጋ ጎዳ ፔኤኮ ዼኤፖ ዻጎ ዴንሢ
ፂዮኔኮ ፃጶ ሙይ ዶዶይሳንዳ ታሚጉዲ
ዔዔኤታ ፑርታ ባኣዚ ኬይሴኔ።
12 ዓጮ ቢያሢዳ ዓኣ ካኣቶዋ ማዖም ዴራ
ዬሩሳላሜ ካታሞኮ ጌሎ ካሮና
ሞርኬ ጌላንዳኔ ጌይ ፔቴታዖ ማሊባኣሴ።
13 ጋዓንቴ ዬይ ያዺ ማዔሢ ዒኢካ ጌኤዦ ዓሶ ዎዼ
ቄኤሶንታ ፆኦሲ ማሊፆ ኬኤዛ ዓሶ ጎሞ ዛሎናኬ።
14 ዔያታ ዬያ ሱጉፆና ዒኢቴያታሢሮ
ዔያቶኮ ማኣዓሢታዖ ጫርቂ ካኣማ ዓሲ ባኣሴ፤
ዔያታ ዓኣፒ ባይቄ ዓሲጉዲ ጎይፆይዳ ሴካ ሃንጋ ቴኤም ጋዓኔ።
15 ዬያሮ ዴራ፦ «ዴንዲ ባይቁዋቴ!
ዒንሢ ዒኢቴ ዓሲታሢሮ ኑና ሄሊፖቴ!» ጌይ ዒላታኔ።
ዬያሮ ዔያታ ዒፂ ዳውሶና ዓሲ፥ ሃሣ ቤሲ ባይዜ ዓሲ ማዔኔ፤
ዴራ፦ «ሃካፓ ሴካ ማይ ዔያታ ኑ ባኣካ ዴይንዱዋሴ» ጌዔኔ።
16 ናንጊና ናንጋ ጎዳ ዔያቶ ፔኤሮ ዜሪ ዳኬሢሮ
ሃካፓ ሴካ ዒዚ ዔያቶ ዛሎ ማላዓኬ፤
ቄኤሶዋ ዒዚ ቦንቺሳዓኬ፤
ዒኢካ ዓኣ ጋርቾማኣ ኮሺ ባኣዚ ማዺንታዓኬ።
17 «ኑና ማኣዳንዳያ ሙካንዳኔ» ጌይ ኑ ጎይሢ ዛጋኣና ላቤኔ፤
ኑና ዓውሳኒ ዳንዳዑዋ ዓሲ ኑኡኮ ሴኤሎይዳ ዔቂ ኑ ጉሪ ካፔኔ።
18 ኑኡኒ ጎይፆይዴና ሴካ ሃንጋ ሃንቱዋጉዲ
ሞርካ ኑና ዚርቂ ዔቂ ካፓኔ፤
ኑኡኮ ጋፒ ዎዴ ሄሌኔ፥ ኬሊ ኑም ሜንሦናኣኬ፤
ኑኡኒ ኩዳኒ ዑኬኔ።
19 ኑና ዳውሳ ሞርካ ኮኦኬይዳፓ ባሼ ሩኡራያኬ፤
ዹኮ ዑፆይዳ ኑና ዳውሴኔ፤
ዓሲ ናንጉዋ ዳውሎ ቦኦሎይዳኣ ኑና ካቴኔ።
20 ናንጊና ናንጋ ጎዳ ካኣቲ ማሂ ዶኦሜ
ኑኡኮ ሼምፓሢኮ ዑኡዞ ማዔሢ
ዔያታ ፔ ፒራሢና ፒሪ ዓይሤኔ፤
ዒዛ ሺቦ ዴማ ዴዒ
ዴሮ ባኣኮይዳ ናንጋንዳኔ ጌይ ኑኡኒ ማሌንቴኬ።
21 ዒንሢ ዑፄይዳ ናንጋ፥ ዔዶኦሜ ዴራ
ዎዛዹዋቴ፥ ዒላሹዋቴ!
ጋዓንቴ ዒንሢም ጊኢጊሾና ጳዻሢ
ፔ ዎዶ ካፒ ሙኮ ዓታዓኬ፤
ዒንሢያ ማሢንቲ፥ ማኣዓሢ ኬኤሪ ካላዻንዳኔ።
22 ዬሩሳላሜ ዴሬዮቴ! ዒንሢ ዻቢንቶሮ
ዒንሢም ዓጎና ፑርቶ ባካ ጊዳንዳኔ፤
ናንጊና ናንጋ ጎዳ ዑኬና ዒንሢ ዳውሲንቲ ዴንዴ ባዛፓ ማሃንዳኔ፤
ጋዓንቴ ዔዶሚያሴ ዴሬዮቴ! ዒንሢ ዻቢንቶ ዛሎ
ናንጊና ናንጋ ጎዳ ዒንሢዳ ሜቶ ዓጋንዳኔ፤ ዻቢንቶዋ ዒንሢኮ ፔጋሳንዳኔ።