6
1 ፆኦሲና ዎላ ኑኡኒ ማዻያ ማዔያታሢሮ፦ «ዒንሢ ፆኦሲዳፓ ዔኬ፥ ዒ ፔ ኮሹሞና ዒንጌ ዒንጊፆ ጉሪ ማሂፖቴ» ጌይ ኑ ዒንሢ ሺኢቃኔ። 2 ፆኦሲ ኬኤዛዖ፦
«ታ ኔኤም ኮሺ ባኣዚ ማዻንዳኔ ጌዔ ኬላ
ሄሌ ዎዶማና ታ ኔኤም ዋይዜኔ፤
ታ ኔና ዻቂሻንዳኔ ጌዔ ኬላ
ሄሌ ዎዶማና ታ ኔና ማኣዴኔ» ጋዓሢሮ
«ሃይሾ ዓካሪ ጌይንቴ ዎዳ ሃያኬ፤
ዻቂንቶ ኬላኣ ሃኖኬ።» 6፡2 ዒሲ. 49፡8።
3 ኑ ማዻ ማዻ ቦሂንቱዋጉዲ ዓይጎ ባኣዚና ማዔቴያ ዖኦማኣ ዹቆ ኑ ማዓዓኬ። 4 ጋዓንቴ ኑና ሄላ ሜቶና ሄላ ባኮ ቢያ፤ ሃሣ ዋኣዪሳ ሜቶ ቢያ ጊቢ ዳንዳዒሢና ፆኦሲም ማዻ ዓሲ ማዒፆ ቢያ ዛሎና ኑ ፔጋሲ ዔርዛኔ። 5 ፆኦሲም ማዻ ዓሲ ማዒፆ ኑ ዔርዜሢ፦ ዢራፓና ጳዺንቲ፥ ቱኡቲ፥ ዓሲና ዣሊ፥ ሚርጌ ማዺ ላቢንቲ፥ ጊንዖ ዓቲሢና ናይዺንቲሢናኬ። 6፡5 ዳኪ. ማዾ 16፡23። 6 ዬያጉዲ ሃሣ ጌኤሹሞና፥ ዔራቶና፥ ጊቢ ዳንዳዒሢና፥ ኮሹሞና፥ ዓያና ጌኤሺ ዻዋ ጎይፆ ሃንቲሢና፥ ጎኔ ናሹሞና፥ 7 ጎኔ ባኮ ኬኤዚሢና ፆኦሲ ዎልቄና ማዺፆናኬ፤ ዔኤቢ ባሻኒ ማዔቴያ ኑ ጊዳ ሙካ ባኮ ላኣጋኒ ዳንዳዒሳ ዓንጋሞ ኑኡኮ ማዓሢ ፂሉሞኬ። 8 ቦንቺንቲሢና ዻውሲንቲሢና ጋላቲንቲሢና ጫሽኪንቲሢና ኑ ናንጌኔ፤ ሃሣ ኑ ጎኔ ኬኤዛ ዓሲታዖ ሉኡዚ ዓሲ ጌይንቴኔ፤ 9 ኑ ዔርቴ ዓሲታዖ ዔርቲባኣ ዓሲ ማዔኔ፤ ሃይቄኔ ኑ ጌይንቴያታዖ ሃሢ ሼምፔና ኑ ዓኣኔ፤ ኑኡኒ ጳርቂንቴቴያ ኑና ዎዺቦኦሴ፤ 10 ኑና ዖዪሶናያ ማዔቴያ ቢያ ዎዴ ኑ ዎዎዛዻያኬ፤ ኑ ማንቆ ዓሲታዖ ሚርጌሢ ኑ ዖርጎቻኔ፤ ዓይጎ ባኣዚያ ባኣ ዓሲታዖ ቢያ ባካ ኑኡሮ ማዔያኬ።
11 ዒንሢ ቆሮንቶሴይዳ ናንጋ ዓሳ! ታ ዒንሢም ፔጌና ኬኤዜኔ፤ ዒኖ ኑኡኮ ኑ ዒንሢም ዻዊ ሃሼኔ። 12 ዒንሢ ዒንሢኮ ዒኖ ኑም ዻዊ ሃሺባኣፓዓቴም ኑ ዒኖ ዒንሢም ዻዊ ኑ ሃሼኔ። 13 ታኣኮ ዒንሢ ናኣቶ ማዔሢሮ ታ ዒንሢም ኬኤዛሢ፦ «ዒንሢያ ዒማይዲ፥ ሚርጌና ዒኖ ዒንሢኮ ኑም ዻዊ ሃሻንዳጉዲ» ጌይኬ።
ኪሪስቶሴ ጉሙርቁዋ ዓሶና ዎላ ፔቱሞ ላኣጊንቲፆ
14 ኪሪስቶሴ ጉሙርቁዋ ዓሶና ዎላ ኮይሱዋ ጎይሢና ፔቴ ማዒፖቴ፤ ፂሉሞና ጎሜና ፔቴ ማዓኒ ዳንዳዓ? ፖዒና ዹሚና ዎላ ዎዲ ናንጋኒ ዳንዳዓይ? 15 ኪሪስቶሴና ዲያሎቢኦሴና ዎይቲ ዎላ ጊኢጋኒ ዳንዳዓይ? ኪሪስቶሴ ጉሙርቃ ዓሲና ጉሙርቁዋ ዓሲና ዎይቲ ፔቴ ማዓኒ ዳንዳዓይ? 16 ፆኦሲኮ ጌኤዦ ማኣሮና ሜሌ ፆኦዞናኮ ዓይጎ ፔቱሞ ዓኣይ? ፆኦሲ፦
«ታ ናንጋ ማኣሮ፥ ታ ዴሮ ባኣካ ታ ማሃንዳኔ፤
ዔያቶና ዎላ ታ ናንጋንዳኔ፤
ታ ዔያቶኮ ፆኦዛሢ ማዓንዳኔ፤
ዔያታኣ ታ ዴሬ ማዓንዳኔ» 6፡16 ሌዊ. ዓኬ 26፡12፤ ሂዚ. 37፡27፤ 1ቆሮ. 3፡16፤ 6፡19።
ጌዔሢጉዲ ኑኡኒ ባይቁዋ ፆኦዛሢም ዱማዼ ማኣሪኬ። 17 ሃሣ ፆኦሲ ኬኤዛዖ፦
«ዔያቶ ባኣካፓ ዱማዺ ኬስኩዋቴ፥
ዒኢቴ ባኮ ካኣሚፖቴ፤
ታኣኒያ ዒንሢ ታ ዓሲ ማሃንዳኔ፤ 6፡17 ዒሲ. 52፡11።
18 ታ ዒንሢኮ ዓዶ ማዓንዳኔ፤
ዒንሢ ታኣኮ ዓቲንቆና ዉዱሮ ናኣቶና ማዓንዳኔ፤
ጋዓኔ፤ ቢያ ባኣዚ ዳንዳዓ ጎዳሢ።» 6፡18 2ሳሙ. 7፡14፤ 1ፆኦሲ. ዓሃኬ 17፡13፤ ዒሲ. 43፡6፤ ዔር. 31፡9።