4
Ka Wuor Juog Yi Dhaahre
1 Batien giih nu, e a amaahnyo uniida dhe wod maalo ngo apuogo nyuma. Duol thiow muu ukoohg wa lan baya gihn anaa alihnga umodho acahg rob yihra kea, “Beehn maalo kan beere gihn tiihy ree batien gihn, nyoadha nyoadho yihri.” 2 4:2-3 5:7 Ke nye wong kaano e Wahy Juog anaa yiihm wiiha maa aniida koom ruohdh nyuma yi Maalo e dhaano apiih wiihe. 3 Ngaan apiih kihde uroomo ke kihd giih me liel. Kedea kar koom aciel daane piny, daano me liel ne weej. 4 * 4:4 Jo doonge: 5:5, 8, 10; 7:11, 13; 11:16; 14:3; 19:4Tar: 6:11 Koom ruohdhe dhaano aduuno wonge angween koom umodho atieg gene piny kedea jo doonge apiih wudh gen. Ge anaa angahbo ke waare me tar kedea ajahme maa ayug ke dhaahb ge ne wudh gen. 5 4:5 8:5; 11:19; 16:18; 17:9 Maahny kodh kedea mahr kodh ge ubeehn oogo ke yoohn bang koom yi diehr. Nyum koom ni lame abiihjberiow ge ake aliel. Lame giih nu ge naa Wahy Juog ge abiihjberiow ni. 6 † 4:6 15:2Giih me kuow angween: 5:6, 8, 11; 6:1; 7:11; 14:3; 15:7; 19:4 Thiow nyum koom anudo ke gihn me wa naam duohng maa ayug kaa madhara muu uneehno ne ryang ryang.
Yi diehr buud koom kedea e koom aciel gene piny anudo ke giih me kuow angween. Kedea rog gen apahng ke nying ke kun do ngahdh gen kedea nyum gen. 7 Mar umodho ake roomo ke nguu, riown gen uroomo ke muor maa tuud, kedea dahg gen kaan nyinge uroomo ke kaan nying dhaano, maa ngween gen uroomo ke coar muu upaahr. 8 4:8 1:17; 11:17 Ge noono angween cang kihd dhaano kiin gen yihre ne boohm abiihjbeciel kedea rog gen apahng ke nying keehd thaahdh boohm e nying me maahnyo anudo yihdh gen. Ge abuohj kaa rob ke bang decahngo kedea dewaahr e ge be cuung kob gene,
“Juog Aciehg ge Juog moogo tooro ngo anudo,
kedea ngo nud awaahn ni kedea ngo unud.”
9 Giih kuow angween wahy poong awahr gene ne moar wiih Juog kedea ne wuor ngo maa ne muohj koohre e ge apiih wiih koom kedea ge kuow ke wong ke wong. Ge yug giih kuowe giih nu, 10 e jo doonge giih adhaano aduuno wonge angween ge apahdh wudh cong gen nyum ngaan apiih wiih koom ge kuow ke wong ke wong kedea uthoohr gene ajahme giih gen nyum koom ne wuor ngo e ge ukoohbo,
11 4:11 Any 5:9, 12; 11:15, 17; 12:10; 15:3-4; 19:6 “Juog ruohdh wan!
Yih naa ngaa wiihe rom ke moaro kedea ke wuoro
kedea yih ne yihri ne tee
bang gihn yih naa acag nyepinye cang
kedea yih naa adaahd ucag gen kedea unahg gene giih me nud.”