7
Yaa Yijarael
1 7:1 9:14-15 Batien gihn nu e wuohdjuog angween ge aniida e ge acuung e wiih piny atieg gene ne gahl yam wiih piny gihn beehn ke yihdh kuohn nu beere yamo me koohd tooro wiih piny wale wudh nahme wale yihdh yen. 2 Keehdo dahng, e wuohnjuog moogo acahga kaa niido e beehn kaa kun moohl cahng kii ngo e ngo kaahn thaany gihr Juog Aciehg. Maa arube e ukwaago yihr wuohdjuog giih angween, e acub Juoge tee yihr gen ne raany giih wiih piny kedea giih yihdh nahme, kea, 3 7:3 9:4; 14:1, 3; 22:4 “Wiih piny maa nahme kedea yen ge keá raanyu uwahdhe ka ukedh thaany yi taahr nyum yaa Juog.” 4 7:4-8 14:1, 3; 21:12-13 Kaano e akweehn gihr yaa acub thaany taahr nyum gen ngo alihnga kejea ge beehda 144,000. Yaa nu ge beehn ke dhog wuud Yijarael ge apaar wonge ariow. 5-8 Alihbe apaar wonge ariow kiin dhog wuud ni apaar wonge ariow ge akwany ucub thaany wudh gen ke dhe wod ke dhe wod. Dhog wuud yaa acub thaany wudh gen anahg: Dhe wod paar Juuda, dhe wod paar Rioben, dhe wod paar Gaad, dhe wod paar Acer, dhe wod paar Neptaali, dhe wod paar Manaajeh, dhe wod paar Cimon, dhe wod paar Leabi, dhe wod paar Yijaacar, dhe wod paar Jebulun, dhe wod paar Jocebe kedea dhe wod paar Benjamin.
Akuud Nyoge Me Thoohdh Keter Me Wuor Juog
9 7:9 5:9; 6:11 Kaano naa amaahnya keehdo, e a niid deeh akuud nyoge me ge be rom rog gen ke kwaano e ge acuung nyum koom ruohdh kedea nyum Roomo. Yaa ngo ge beehn ke wudh thaahye beehd, kedea kihd tien paajo cang, nyoge me yihr gen ne dhog gen. Ge angahbo ke waare me tar kedea ge kaahn boog ageehb ke yi cing gen. 10 7:10 5:7 Noono maa akwaag gene kejea,
“Boadh wahy beehn kaa bang Juog gihn wuoro
ge apiih wiih koom kedea beehn kaa bang Roomo.”
11 7:11 4:4, 6 Kaano, e wuohdjuog giih acuungo ne gihr utieg gene koom ruohdh piny maa jo doonge kedea giih kuow angween wudh gen akuul gene piny upiih gene ne leej Juog. 12 7:12 4:11 Kob gene,
“E noono!
Leej kedea moar wihj maa ngahy luube
kedea muohj kahw maa wuohro kedea ruohdh maa tee ge giih Juog
gihn wuoro ke wong ke wong.
E noono.”
13 7:13 6:11; 7:9 Kaano, e a apeehny dhaano aciele peehnyo keew jo doonge kea, “Yaa ni angahbo ke waare me tar ge beehda jo kee kedea ge beehn ke kee?”
14 7:14 1:5; 22:14; Mat 24:21 Maa abeehra ngo, “Ngaa duohng ge ngahyi.”
Maa arube kea, “Kaa ngo, ge beehda nyoge maa abar maalo ke guum giih reje uwahdhe kaa abuur waay gene tar bang gihn ge aluog rem Roomo naa awoj piny. 15 7:15 21:3 Ke nying gihn nu
e naa gihn cuung gene nyum koom gihr ruohdh
ne wuor ruohdh yi Wod Juog
ke decahngo kedea dewaahr.
Kedea ngaan apiih wiih koom
ge ukoare utoor gihn me pahdh wudh gen.
16 Ge buu unahg kahje
kedea ge buu unahg riowe.
Thiow atwaany muu ukahl cahnge rog gen tooro
kedea leehdh cahng buu uyoad gene. 17 * 7:17 5:6; 21:6; Jon 10:10, 11Piih wong: 21:4 Bang gihn Roomo gihn buud koom ruohdh
e ne kwaag gen
kedea e ne kedh gen kar wahy
beere kihd piih wong ge wuuny Juoge ke oogo yi nying gen.”