21
OIeccuo ana lon ilommaththik lothocciccokot ape
1 Manakka elli locothakothe aIeccuo appummanthet ul iammakothok ncik attang nokuthut korok irapangka toCelïl (iroccot kꞌran cakuruk itti tok irapangka toThipiria). Kumminthet kin ncik ngkathar engki. 2 Ana caꞌri ica kumminthet kin okin thaththokat tothun oCcamaan oPoththuruc ana oThthoma iponat kꞌran itti Tharo ana oNaththanail ponokaꞌran koKana koCelïl, ana nyukul nyoCepethi ana ul woIeccuo iammakothok wꞌrek weꞌra. 3 ACcamaan oPoththuruc iꞌrekat kin itti, “Mpaik paeo iape.” Akin iꞌrekathok itti, “Oron thaeo unnaththut.” Akin oingkat akin arrat ikuppuꞌrung konoiꞌri, anaruk caꞌri cen ngkoꞌra okin thakorronno occokat papꞌrek aththik.
4 Ana ngngïꞌrïmak aIeccuo ocoꞌrat nokuthut korok, aul iammakothok wakinninakat itti ook oIeccuo. 5 Akwakkarat kin akwomekat kin itti, “Paththon, nthella ape wottei?”
Akin omekat oIeccuo itti, “Papella.”
6 Akwomekat kin itti, “Norret loꞌrak lape thokkun wothothari wokuppuꞌrung konoiꞌri ana nthiꞌriththa ape.” Manakka okin thorrethe loꞌrak than, akin iꞌriththakat ape akin ommakat otho akka ape wokat woppot cannan.
7 Apul ipammakot oIeccuo ipa kwappongothe iꞌrekat oPoththuruc itti, “Katha Ili.” Anakka oPoththuruc poccïkothe lon itti, “Katha Ili” akwïꞌrïkakat kret kung ikïn akworpat iꞌri (akka kwokat puetheik). 8 Aul immakothok wꞌrek akkakat ngkuppuꞌrung konoiꞌri akin otho loꞌrak aloppathe ape tit akka okin thaththakonnoka ciththan nokuthut korok. 9 Anakka okin thorpotheik nocapu akin immakat monyïk mothik amonu ape nan ana arrakith.
10 AIeccuo omekat kin itti, “Nona ape wotte nape ianon thiꞌriththat.”
11 ACcamaan oPoththuruc arrat ikupppuꞌrung konoiꞌri akwothat loꞌrak lape tomarakan ana lonat ape tit ittïttïk arrial weꞌreꞌrapuruk ana alkaire ana ikken kꞌrapuruk (153) ana loꞌrak lape lakorronno ommottakat nape iokat tit woppot. 12 AIeccuo iꞌrekat kin itti, “Nanthan annathoꞌrko thuꞌrit thorrot.” Opilin pellakathe nti iul iammakothok ipipittot itti, “Oung oththa” akka okin thaththina itti ook Ili oIeccuo. 13 AIeccuo onekat arrakith akwekat kin, akwonekat ape cakuruk akwekat kin. 14 Ana nocaꞌri nci oIeccuo pothikkiet maꞌri mꞌrapuruk akwumminthet ul iammakothok ncik ammakka kurokot nti ithio.
OIeccuo perene oPoththuruc
15 Anakka okin thoꞌrkot cik, aIeccuo iꞌrekat oCcamaan oPoththuruc itti, “Camaan ukul woIuanna, ngkwongothin cannan nolon elli appiki?”
Akwothïanthok tit itti, “Ïï Ili win, ngkwinan itti mpongothung.”
AIeccuo omekathok itti, “Oꞌrkie lungkat lin cik kicce.” 16 Akwappipittathok attang itti, “Camaan ukul woIuanna, ngkwongothini?”
Akwothïanthok tit itti, “Ïï Ili win, ngkwinan itti mpongothung.”
AIeccuo iꞌrekathok itti, “Okatha lon lolangkat lin.”
17 Ana kwothikkiekathe maꞌri mꞌrapuruk akwipittothok itti, “Camaan ukul woIuanna, ngkwongothini?”
APoththuruc uakat ka akka oIeccuo pipittothok lon othikkie maꞌri mꞌrapuruk itti, “Ngkwongothini?” Akwomekathok itti, “Ili win, ngkwina lon appik ana ngkwina itti mpongothung.”
AIeccuo iꞌrekathok itti, “Oꞌrkie lungkat lin cik. 18 Mpiꞌret non lon ilaik ïcat itti caꞌri ica ngkwokat puꞌrit, ngkwokat ako eret ngkarkkang ana aeo na ngkwongothe itti ngkwaeo. Anaruk amma ngkwothakkat thomocco, ngkwathie nyaun akin akieng eret ana okin onekothung na ngkwꞌrat eo.” 19 OIeccuo piꞌret elli akwokene thio itha oPoththuruc athio ana itha akwethet Kapik thrïk ngngin. Akwomekat oPoththuruc itti, “Omakothin.”
20 APoththuruc olliakat akwimmakat itti pul ipammakot oIeccuo ipa oIeccuo pappongothe paik pammakot kin nthoceken, ook ipothïngkarakothe oIeccuo caꞌri icakin thokat akin oꞌrko thuꞌrit thocipin ana ipiꞌrethe oIeccuo itti, “Pul ipangkene, oththa akkaik pathokerong?” 21 Anakka oPoththuruc pimmarok akwiꞌrekat oIeccuo itti, “Ili win, ana lon loIuanna tat?”
22 AIeccuo othïanthet oPoththuruc tit itti, “Amma oun akkongothe itti kwikkoik puccuk anakkakat, ngkwiꞌre taththa? Omakothin tulluk.” 23 Alon opettakat cik itti pul ipammakot oIeccuo empi pakinnio. Anaruk oIeccuo pakorronno omet oPoththuruc itti pakinnio anaruk kwomethok itti, “Amma oun akkongothe itti kwikkoik puccuk anokkaprttakat, ngkwontha oung?”
24 Pul poIeccuo ipammakothok empi ipokat cik akka lon lokkattathe ana ook akkokurrot. Onïn thina itti lon lung laik ïcat. 25 Lon laik loppot ila oIeccuo pokkothe anaruk amma lalokurrakothe appik ana mpakathe ere capu ncik appik cella kaꞌran cik na natham ikkoik inokurrakot.