Atham iaine ul woThocculunukkia 2
Atham ieꞌra ammakka oPoluc pokurrinet ul wonokaꞌran koThocculunukkia
Lon lonothon
Ul wꞌrek ioccokothe lon loIeccuo nokaꞌran koThocculunukkia thonat lon ima itti Ili oIeccuo pokkaprttakot ntit. Ittina oPoluc paik pakurro atham ieꞌra akwonceꞌret lon elli cik ilocikittakothe nomïkït ana akwiꞌret kin itti lon lakaik loppot ilokithak ana nguꞌru aIeccuo parthuk okkaprttako ntan. AIeccuo parthuk anthan, ul wamakot pul pꞌrek kꞌran itti pul pouꞌru ana kwikko pꞌra lon loMiccie.
OPoluc popakkukkwenthet kin itti okin thaꞌrungkot ithoccokot lon nomïkït manna amma okin thaik thoccokot thiak. Kwomekathekin itti okin thareko othakka itti akin ikkoik ammakka oPoluc pokkothe ana ul wung iakin thokat ire. Ana akin oka thopoꞌrot than ithokkot lon iloporot.
Lon ilaik iatham
1. Thomicco (1.1–2)
2. Opirane Kapik noka ana aꞌrane ngaꞌrama (1.3–12)
3. Lon lothao thoMiccie (2.1–17)
4. Thikkoik thoul woMiccie (3.1–15)
5. Lon ilocothothe (3.16–18)
1
1 Oun oPoluc ana oCcila ana oThimiththaoc thamicco non ithoccokothe lon loIeccuo nokaꞌran koThocculunukkia itha ul woKapik oNgappa ponnon ana Ili oIeccuo oMiccie. 2 Athoporot ana thomicco thoKapik oNgappa ponnon ana Ili oIeccuo oMiccie oka nanon.
Caꞌri cothakkama
3 Pangkingon, onïn thongothe itti onïn thethet Kapik thopira noka appinappin nti ilon lon ana lekkot nan menik akka thoccokot lon loKapik nomïkït thon thaik tharttakot nan ana thongarot thon ithanon thongarothe ngngin thaik tharttakot nan. 4 Ilen akka anïn othïngkakinenon ngngin onon ithoccokothe lon loIeccuo nthoꞌrungkot cik thon ilon loKapik ana thoccokot lon loKapik nomïkït thon ithiak ana nthantoka manna thaik thakkiettat thiak ikkitheththak.
5 Menik Kapik kikkiet non cik ngili ngung inganon thorukwinthet ilon ana elli lakene itti thakkama thoKapik thocoꞌrotheik. 6 Kapik konu lon locoꞌrotheik kakkiet ul thiak iokkiethenon thiak 7 ana kethet non thongoko onon ithaik thaccokot thiak ana onïn cakuruk. Elli appik lakaik amma Ili oIeccuo okkarttako ntan nci nokkït ntothiꞌrot, mpuꞌran pung ana nuꞌrupa wothothïlettat woKapik. 8 Ana kwanthan nthik ithacco ana kwaccokiet nokkwion thiak ithꞌrat Kapik ana ithannokkwine lon iloporot loIli wonnon oIeccuo kunu ncik. 9 Okin thaccokot thiak ana okïttakineik thupuththuput ana okin thakïccetta ntokït koIli oIeccuo ana ntokït kopuꞌran pung thïrïk thung 10 nocaꞌri ica kwao akwathomerekettat iul wung appik ioccokothe lon lung nomïkït. Onon thaka naththungon akka onon thoccokothe lon lïn nomïkït ilanïn therenet non.
11 Ilen elli akka ïnaꞌranenon ngaꞌrama appinappin itti aKapik othikkienon ithekko nothikkoik itha kwakkarothenon. Ana ïnthaꞌranenon ngaꞌrama itti aKapik ittarot non mpuꞌran pung annokkot lon iloporot ila nthongothe itti nthakkot akka onon thoccokothe lon loIeccuo nomïkït. 12 Onïn thaꞌra ngaꞌrama engi othakka itti akꞌran koIli oIeccuo omerekettat ianon ana anon omerekettat iak ammakka thoporot thoKapik konnon ana Ili oIeccuo oMiccie.