1 Amma manna mpantere karru koppot koul wꞌrek ionyi ana karru kouꞌrupa wothothïlettat woKapik anaruk mpella thongarot, lon lin laka ere poꞌre pocurntuk. 2 Ana amma mponu puꞌran pothernte lon loKapik ana puꞌran pothina lon ilamuꞌruttakot ncik ilanthan ana pothina lon ncik appik, ana mpoccokothe lon nocïkït itti mpamukkie moꞌrong ncik nokaꞌran ken anaruk mpella thongarot, mpakonnoka poporot. 3 Ana amma mpethet ul thaꞌrthan thin appik iaiak ana manna okꞌre ka kin nthik anaruk mpella thongarot mpakirrnniot lon lꞌrek ntit.

4 Thongarot thaik itti thoccokot cïkït ilon ana thoporot lon ana thakorrnnoka thonyira ana thakorrnno ipot ka thoura. 5 Thongarot thakorronnoka thonthoma ca ana thakorrnnoka thrïk nan ana thakorrnno ua ka accokkot ana thakorrnno aꞌrntot lon ilokithak cik. 6 Thongarot thakorrnno opirane lon ilokithak noka anaruk thapirane lon noka ilaik ïcat. 7 Thongarot thangwarot ana thonekket cïkït nolon ana thonu thoꞌrikot cik ana thaccokot cïkït ilon.

8 Thongarot thakorrnno omattat. Anaruk nalon lotherente lon ana there ngkarru koul, koul wꞌrek thacoꞌro ana thinaik nti ica thacoꞌro. 9 Akka oron thina lon lotte ana oron there ilaKapik kethet ton ammakka ul wothernte lon loKapik itti oron there lotte, 10 anaruk amma oMiccie pokkaprttakot mono alon ocothakot, lon ilokat lakorrnno ocothakot lintat cik. 11 Akka mpokat parthuk potteik, mpokat anere ere ukul iotteik ana mpokat anokwarttikot cik ere ukul iotteik ana mpokat anothettot lon cik ere ukul iotteik. Manakka mpocokkat, mpopaꞌranthet lon lothathukur cik. 12 Papu iparon thaik thakathacce inenni pikkoik ere papu ipaik imanthara, anaruk oron thimma ncik appik ana kicce amma oron thincettothe ncinokkït. Inennei mpina lon lotte anaruk mpina lon ncik appik ammakka mpinakot ncik appik.

13 Ana inenni elli ilꞌrapuruk laꞌrungkwot cik, thoccokot lon nomïkït ana thoꞌrïkot cik ana thongarot anaruk thongarot akkrïk nti iakin appik.