8
Yesu mtambika wetu mkulu
1 Imbuli ng'ulu kubita ghose ghatulongile, iyo ino, tuna Mtambika mkulu iyakalile lubali lwe kujilo lwe chighoda che undewa che Mkulu ako kulanga. 2 Yeye kosang'ana ka mtambika mkulu hanu hala haenzeluke kubita hanu hohose, hane bumbulika lye Imulungu lya kweli, ilitsengighwe ne Imtwatsa, si ne iwanu bae iwatsengile. 3 Chila mtambika mkulu kosaghulighwa amlapfile Imulungu ghweko ne nambiko, lelo mtambika wetu mkulu kabamighwa yawe na chinu cho ukumlapfila Imulungu. 4 Ka ang'awile wa hano muisi, ang'alekile kuwa mtambika mbe, kwaapfila ma kuna watambika iwolapfa ghweko ka pfaghalaghitse Ghamalaghitso gheng'ighwe Musa ne Imulungu. 5 Nawo wosang'ana aghala igheghala na ghumfano au sisila lya ighali kulanga. Pfipfo Musa habamile kutsenga bumbulika lila, kalongelighwa ne Imulungu, “Ulole, utsenge ka pfulangusighwe haukalile kuchidunda.” 6 Lekeni sambi Yesu keng'ighwa isang'ano ya ukutambika inoghile kubita yawo, ka pfayali mlamlitsi wa laghano ilinoghile kubita laghano lila, kwaapfila lima mne ipfinu pfinoghile ghendo pfalongile Imulungu.
7 Kwaapfila ka laghano lila ililongole ng'aliwile na totso bae, ng'alibamighwa bae laghano lya keli. 8 Lekeni Imulungu kona matotso kwe iwanu wake, kalonga,
“Imtwatsa kolonga, ghamatsuwa ghakutsa,
hanitsakwika laghano lya sambi ne iwanu wa Isiraeli ne iwanu wa Yuda.
9 Ng'alitseghala bae ne laghano lyanyikile ne iwabala wawo,
ghamatsuwa ghala haniwakindile ghamoko na kuwalongotsa walawe mne isi ya Misiri.
Kwaapfila ng'awakindile laghano lyangu,
na nene tsaniwalema.
10 Lekeni alino laghano lyanitsotenda ne iwanu wa Isiraeli,
hambele ha ghamatsuwa agho,
nitsakwika ghamalaghitso ghangu mne tsimbutsi tsawo,
nitsoghandika mne mimoyo yawo,
Nitsakuwa Imulungu wawo,
nawo watsakuwa iwanu wangu.
11 Kuduhu imunu yatsomlangulitsa miyaghe,
au kumlongela ndughu yake,
‘Mmanye Imtwatsa’
kwaapfila wose iwanu wakulu ne iwadodo watsonimanya.
12 Nitsowaleghusila matotso ghawo na nzambi tsawo sitsotsipfikitsa keli.”
13 Kwa kulilonga laghano lya sambi, kalitenda lila lya mwanduso lilale, na chinu chochose ichilala cha habehi kuhupa.