1 Ipasomsomoklu kan cha mamati utlat ta potgoncha cha papangat ya cha manturay, ya tuttuwaoncha chicha ya masapuɏʼn pasigcha lakasagala un mangwa si bibiɏu. 2 Achicha man-ugud si lawwing ulay siluʼn tagu ya achicha makasubog, ngim masapuɏʼn laaluscha ya ipailacha un lapakumbyabyacha kan cha asintatagucha.

3 Ti ulay chitaku si sin-eɏgew, lasukin taku, achipun taku tumuttuwa, laallilaw taku, lansimbi taku si lawwing un pion chi long-eg ya lagalason taku cha lawwing. Ya ileɏgew un lawwing ya ilaapos cha awed kan chitaku ya man-asisanga taku. 4 Ngim impailan Apudyus un Malagu kachegula ya tagopla kan chitaku. 5 Ya tilagula chitaku, chakampun un gapu si bibiɏuʼn killingwa taku, ngim gapu si kachegula kan chitaku. Chiluɏsala cha byasuɏ taku ya illidchela chitaku si baruʼn biyeg mipagapu si Ispiritun Apudyus ya pilabiɏula chitaku. 6 Illidchon Apudyus chi Ispiritu kan chitaku mipagapu kan Jesu Kristu un Malagu kan chitaku. 7 Ked gapu si kachegun Apudyus, libilang takuʼn lappun byasuɏla kan siya ya makwaʼn matawid taku lamlamaon takuʼn biyeg un mallalayun.

8 Tuttuwa cha allaʼn imbyegak kan chikayu. Piok un ipatutlu ibyega cha alla, taplu cha lamati kan Apudyus ammancha ileɏam un mangwa kan cha bibiɏu si losan un timpu. Liya cha gettok ya alla magaleb cha tagu.

9 Ngim achika makaisi-isik kan cha lappun puutla ya cha anchu-achun listaan cha chachakkeɏ ya susubog ya titiliw mipanggop si lintog ti lappun ituɏung cha katchi ya lappun simsimbila. 10 Lu silu mangmangwa si mansisilaanyu, byegbyegaanyu ta iyageyla. Ked lu achipun mabyegaan si chamu ya pidwala, wissechonyu. 11 Ti ammuyu un cha katchiʼn tagu ked malagbyasuɏcha ya ummachayucha si katuttuwaan. Ked ulay siya ammula un lawwing cha pin-ala koon.

12 Lu ibuunku si Artemas willu si Tychicus kan sika. Umaalika pay kan sakon ud Nicopolis, ti simsimmokku un udchi inggewak si salaʼn agilid 13 Tuɏungam cha Zenas kan Apollos si mallubyatancha un mambiyasi, ya ammam ilan lu wechewed cha kasapuɏancha. 14 Tudtuchuwam cha biɏun taku ta kooncha bibiɏu ta makatuɏungcha kan cha makasapuɏ si tuɏung, taplu awed bibiɏuʼn ibungan chi matattaguwancha.

15 Chikami losan utla, pakumustaonmi sika. Pakumustaom bo cha bubuɏun taku un mamati utlat.

Otyan ta kacheguwan Apudyus chikayu losan.