1 Ked susulud, gapu ta amod chi kachegun Apudyus, masapuɏʼn idchonyu long-egyu un matattaguʼn chatun kan Apudyus, laapudyusan kan mampagalas kan siya. Kamatla tuttuwa ya koon un malaychayaw kan siya. 2 Achiyu tuɏachon cha kokòon cha achipun mamati, ngim ha koonyu, ipalubusyu si Apudyus un mamabiɏu si somsomokyu. Ked maammuwanyu cha pion Apudyus, ya cha losan un bibiɏuwola, ya losan un makaay-ayu kan siya ya lappun mangkuɏangala.

3 Gapu si kachegun Apudyus kan sakon, ibyegak cha alla kan chikayu: Masapuɏʼn kacha osa, achila ipangatu long-egla si somsomokla, ngim masapuɏʼn ammala somsomkon chi kabyeeɏala un illidchon Apudyus kan siya gapu si lamatiyala. 4 Iyaligku long-eg takuʼn tagu. Ulay lu ossaan chi long-eg, achu petila ya langkangkalasi mauseɏancha. 5 Isula bo kan chitakuʼn mamati, ti ulay achu taku, miyalig taku os-ossaan un long-eg Kristu, ked lantitipug taku losan ulay langkangkalasi taku. 6 Ked masapuɏʼn usaɏon taku langkangkalasiʼn kabyeeɏan un illidchon Apudyus kan chitaku gapu si kachegula. Lu kabyeeɏan un mangipakaammu si ugud Apudyus, masapuɏʼn koon taku un maibyaseɏ si pammati un awed kan chitaku. 7 Ked lu kabyeeɏan un mansimbi kan cha uchum, masapuɏʼn ipapatichaʼn mansimbi. Ked lu kabyeeɏan un mantudtuchu si katuttuwaan, masapuɏ boʼn bibiɏuwoncha un mantudtuchu. 8 Lu siyad laatod kan sika kabyeeɏan un mansegeg, segagom cha uchum ta kumoscheɏ pammaticha. Ked lu illidchon Apudyus kan sika kabyeeɏan un tumuɏung, masapuɏʼn mangtodkaʼn ustu. Ked ha laidchen si kabyeeɏan un mangipangpangu kan cha mamati, masapuɏʼn ipapatichaʼn mangichaɏan. Ked lu malagchegu laatod kan sika, masapuɏʼn lagalaskaʼn mangwa.

9 Masapuɏʼn ituttuwa taku ayat taku kan cha bubuɏun taku. Ya masapuɏ man-awichen taku cha lawwing ta siyad somsomkon taku cha bibiɏu. 10 Masapuɏʼn man-asiayat taku un isun chi man-aayat taku si mismuʼn sulud taku, ya man-asipotog taku un mangkakadwa. 11 Achi taku masachut un mangkawachi, igettok takuʼn mansimbi kan Apu Jesu Kristu. 12 Ked makaganggalas taku gapu si lamlama taku, alu-alusan taku cha ligat, ya ipapati takuʼn malluwalu. 13 Ked tuɏungan taku cha tagun Apudyus un makasapuɏ si tuɏung ya mangiliyon taku cha byaɏanglaʼn tagu.

14 Lu awed mamaligat kan chikayu, achiyu eɏwagen chicha ngim manchawat kayu kan Apudyus ta binchisyulala chicha. 15 Makaganggalas taku kan cha lagalas, ya makachauy taku bo kan cha manchachauy. 16 Makatimpuyug taku kan cha losan un tagu, ya achi taku leɏastug, ngim makabibiɏun taku kan cha labyebya un tagu.* 12:16 Ha piolaʼn uguchon si Greek, achi taku leɏastug ngim lakasagala taku un mangwa si kawachin chi bubùulon. Ya achi taku kamad tuttuwa un isun chi ammu taku losan.

17 Lu awed langwa si lawwing kan chitaku, achi taku ibyaɏos si lawwing. Ngim siyad ipapati taku koon cha bibiɏu si tullong cha tagu. 18 Koon taku kiged chi kabyeeɏan taku un makatimpuyug si lumin-awaan kan cha losan un tagu. 19 Susulud, ulay silu kooncha kan chikayu, achi kayu bumaɏos ngim ipiyeɏyu kan Apudyus ta siya bumaɏos. Ti liigili si ugudla un kalala,

20 Ha koon taku, tuɏachon taku hachiʼn liigili un ugudla un kalala,

21 Ked ilan taku ta achi taku paabyak si lawwing, ngim ha koon taku, abyakon taku cha lawwing si mangwaan taku si bibiɏu.