1 Ot lallangɏangaak pun, awed chi Keɏlilu un summisiked si bilig un Zion. Ya awed bo cha lichoga kan siya un taguʼn 144,000 un lameɏkaan chi kicheycha si ngachen chi Keɏlilu ya ngachen chi Amala. 2 Ya chingngeɏk bo mantobyeg un ginga un lampeɏpuʼd langit un isun chi alaas chi tumeteub un chelum ya isun chi mantobeg un kuchuɏ, ngim isun chi tukeɏn cha achuʼn arpa. 3 Ked cha hachiʼn tagu un 144,000, silasagung cha hachiʼn umaammuy un Ari ya cha hachiʼn opat un parsua ya cha mangipangpangu. Ked kankantaoncha baruʼn kanta un lappun uchum si sin-ammu lu achi abus cha hachiʼn 144,000, ti chicha bilayachen chi Keɏlilu si illinggewancha ud pita. 4 Cha allaʼn tagu, lappun lakabyasuɏancha mipanggop si byebyai, ti lappun lakasuyopancha si byebyai. Lituntun-udcha si Keɏlilu si losan un ummoyala, chicha cha labyayachen chi byasuɏcha un isun chi insilan Apudyus chicha kan cha uchum un tagu ti chicha ummulaʼn lamati, ked isun chi michatuncha kan Apudyus ya hachiʼn Keɏlilu. 5 Ya lappun akit lantuntulliyancha ya lappun mapabyasuɏancha kan Apudyus.

6 Oli ked, intullongku bo osaʼn anghel un tumattattayap si ngatu, un mangiweɏaweg si mallalayun un Bibiɏuʼn Chameg kan cha losan un tagu si allaʼn lubung, si losan un kaili-ili, tribu ya mangkangkalasiʼn ugud. 7 Ked chakeɏ gingala, un kalala, “Ipotogyu si Apudyus, ya chayawonyu kilangatula, ti allaʼn gummatong chi manguisala kan cha losan un tagu! Ked chaychayawonyu siya, ti siya langwa kan cha losan, ulay langit ya pita, ulay bo byeybyey ya cha losan un uud!”

8 Awed bo mikadwaʼn anghel un liyun-ulud, un kalala, “Gettok un layam-an chi hachiʼn machamchameg un iliʼn Babylon si machusaala! Ti cha tagu udchi, isun chi impailumcha kan cha losan un tagu hachiʼn mampiyaʼn byeyascha, un ha miyaligela, ha langawisancha kan cha tagu un mangwa si kilagatkat un pin-acha killingwa.”

9 Ot awed bo mikatluʼn anghel un liyun-ulud kan cha hachiʼn chuwa, ot chilakeɏla bo gingalan kalala, “Losan un malaychayaw si hachiʼn kaog-ogyat un ayam ya hachiʼn silan-ayam, ya cha losan un impameɏkala kicheyla willu imala si ngachenla, 10 sigulachuʼn ipailum Apudyus kan chicha mampiipiit un byeyaslaʼn latasa un lappun kamosla, hachi miyaligen chi amod un sangala! Ti paligatan Apudyus chicha losan si apuy ya gumilegileb un asupli, ked bubuyyaon cha angheles Apudyus ya hachiʼn Keɏlilu. 11 Ked ha apuy un mamaligat kan chicha, achipun masobsobyen ti gumilegileb si ing-inggala un lappun umillongan chi asukla. Ya lappun pulus gumingkan chi ligatcha si ileɏgew ya lilabi ked maligligatancha, ti chicha cha hachiʼn lalayaw si kaog-ogyat un ayam ya hachiʼn silan-ayam ya chicha bo lameykaan si ngachen chi hachiʼn ayam.”

12 Ngim chikayuʼn tagun Apudyus un lalungpeɏ si imbyegala ya mamati kan Jesus, masapuɏʼn pakoscheɏonyu pammatiyu ta achi kayu maawis, ulay silu makwa kan chikayu.

13 Lapalos ked, chingngeɏk bo ginga un lampeɏpuʼd langit, ot kalala kan sakon, “Igilim cha allaya: Malipud si sala, Mabinchisyulan cha losan un mangikatoy gapu si mansimbiyancha si Apu taku!”

Ot tilachulan bo chi Ispiritun Apudyus un kalala, “O! Tuttuwaʼn mabinchisyulancha, ti ha matoyancha, hachi umillongancha si laligat un kawachicha, ya hachi bo mangeɏ-ancha si gunggulacha gapu si bibiɏuʼn killingwacha.”

14 Lallangɏangaak pun, awed chi intullongku un mamputilak un libuu, ya awed bo ummaammuy si lap-atla un isun chi tagu un labyetukungan si bilalituk un koronan chi Ari ya ilooglela mantachom un kompay. 15 Ot intullongku bo osaʼn anghel un lummoswa un lampeɏpu si templo ud langit, ot pilokawala hachiʼn ummaammuy si lap-at chi libuu, “Useɏom chi halat un kompaylu ta gapasom chi pita, ti gummatong chi ustuʼn man-aapit, ti isun chi leum cha maapit si pita!” 16 Ot ha umaammuy si libuu, inggapasla kompayla ot ilapitla cha losan un maali si pita.

17 Ot awed bo osaʼn intullongkuʼn anghel un lummoswaʼn lampeɏpu si templo ud langit un ilooglela bo mantachom un kompay. 18 Ot lummoswa bo osaʼn anghel un lampeɏpu si altar un sosoggen si michatun kan Apudyus. Hachiʼn anghel, siya simbiyang si apuy. Ot pingkawala hachiʼn osaʼn lalangchon si mantachom un kompay, kalala, “Lopgachom chi halat un isun chi wakeʼn muɏa un kalanchaʼn grapes si pita ti leumcha losan!” 19 Ot hachiʼn anghel illopgedla kompay si pita ya illaɏala cha losan un bungan cha grapes, ot pilonponla si chakeɏʼn astan Apudyus, un ha aligla, amod chi sangalaʼn malusa kan cha tagu utla pita. 20 Ked ha aastan chi grapes, inggew si lasin chi ili. Ot chaɏa lummoswa si hachiʼn astan, ot lilitapla lasuluk si tiɏunggasut ya chuwampuɏuʼn kilometro chi kaanchula, ya masikachen chi kalusgongla.