1 Ummachali pun cha Jesus ud Jerusalem, gummatongcha si pon-ed chi Bilig un Olivo un mambyeatan cha iliʼd Bethphage ya Bethany. Ot pilaulan Jesus cha chuwaʼn disipulusla 2 un kalala kan chicha, “Umula kayu si anchiyan iliʼd chomang ked lu gumatong kayu, ochesanyu lipupungod un ayyubun chi changki un chaampun makabyayuwan. Ubyachenyu ked igetongyu utla. 3 Lu awed mangimus un, ‘Payuggey lait ubyachen?’ ibyegayuʼn, ‘Masapuɏn chi Apu ya asila kakma iyulin.’ ”

4 Ummoyoncha ot inchesancha ayyubu si kesa un lipupungod si sawang chi osaʼn byeɏoy. Ot ilubyachencha. 5 Ot cha uchum un taguʼn sumisiked si hachi, kalancha, “Himma koonyu, payuggey ubyachen lait un ayyubu?” 6 Imbyegacha imbyegan Jesus kan chicha ot inteun cha hachiʼn tagu. 7 Ot inggetongcha ayyubun changki kan Jesus ot inyap-ap cha disipulus chi takpin chi silupcha si ochog chi ayyubu ot langabyayu si Jesus. 8 Achu bo cha taguʼn langiyapleg kan cha silupcha si kesa ya lummapngis cha uchum si pangan cha kayu ot inyaplegcha si kesa un ayola. 9 Ot cha taguʼn ummun-ula ya cha lituntun-ud kan siya, simpapakuycha un kalancha,

11 Gummatong cha pun ud Jerusalem, lilumlok si Jesus si templo. Lilangɏangala pun cha losan, ummoy kan cha lasawayan si chuwaʼn disipulusla ud Bethany ti lummaschom.

12 Labigat pun si langulilancha un lampeɏpuʼd Bethany, labitin si Jesus. 13 Ot intapla kayuʼn igus un achu tubula, ot ummoyla intullong lu awed bungala. Ummachali pun, lappun inchesala si bungala ngim tubu abus ti chaampun chi timpun mamungaala. 14 Ot kalala si kayu, “Malipud si sala, lappun mangan kasin si bungam.” Ot chingngeɏn cha disipulusla imbyegala.

15 Gummatongcha pun ud Jerusalem, ummoy si Jesus si templo ot lampeɏyaw kan cha inggew un mallalaku ya cha pin-a mangngila. Ot ilaminla lilitwed cha lamisaan cha mansusupli si pilak ya cha aammuyan cha mallalakù kalapati. 16 Ya impalitla bo cha mambubukud un mangoy si chaɏom chi templo. 17 Ot kalalaʼn lantudtuchu kan chicha, “Ha chakampun kamman un liigili si ugud Apudyus un, ‘Ha byeɏoyku ked siya kalanchaʼn malluwaluwan cha losan un tagu si kaili-ili.’ Ngim lambyalilonyu tatayɏuwan cha akkawan.”† 11:17 Isaiah 56:7, Jeremiah 7:11

18 Chingngeɏn pun cha ap-apun cha papachi ya cha mimistulun chi lintog chi kingwan Jesus, lansingitcha si in-ilonchaʼn mangtoy kan siya. Ti ummogyatcha kan siya ti laschaaw cha amo-amod un tagu si tudtuchula. 19 Lummaschom pun, tilelan cha Jesus chi hachiʼn siudad.

20 Labigat pun, si lilausancha hachiʼn kayuʼn igus, intullongcha un leɏangu inggala si puunla. 21 Laslasmok Peter chi imbyegan Jesus ot kalala kan siya, “Mistulu, ilam! Leɏangu kayuʼn igus un ileɏwagem!”

22 Summongbyat si Jesus kan chicha, “Patiyonyu si Apudyus. 23 Tuttuwa ibyegak kan chikayu, lu silu mangibyega si allaʼn bilig, ‘Umopwaska ked man-atunka si byeybyey,’ ked achipun manchuwachuwa somsomokla ngim patiyola un ha imbyegala ked makwa, tuttuwa un makwa. 24 Ked ibyegak kan chikayu, lu silu chawatonyu kan Apudyus si luwalu, patiyonyu un maatod kan chikayu, ked awatonyu. 25 Lu malluwalu kayu, pakawalonyu cha taguʼn lakabyasuɏ kan chikayu ta pakawalon bo Amayuʼd langit cha byasbyasuɏyu. 26 Ngim lu achipunyu pakawalon, achipun bo Amayuʼd langit pakawalon cha byasbyasuɏyu.”‡ 11:26 Chakampun si mipati allayan bersikulu Mark 11:26 si chachaan un kasuɏatan un liigili si Greek. Maila si Matthew 6:15

27 Ot langulin cha Jesus ud Jerusalem. Si lalidtidchaɏalan Jesus si chaɏom chi templo, ummoy kan siya cha ap-apun cha papachi, cha mimistulun chi lintog ya cha pallakayon cha Judio. 28 Ot kalancha kan siya, “Simma kalobbongam un mangwa kan cha laoy? Silu langatod si allaʼn kalobbongam un mangwa kan cha laoy?”

29 Ot kalan Jesus kan chicha, “Awed chi imusok kan chikayu. Lu songbyatanyu, asik ibyega lu simma kalobbongak un mangwa kan cha laoy. 30 Ibyegayu kan sakon chilu lampeɏpuwan chi kalobbongan John un mambunyeg? Leɏpu kan Apudyus willu tagu?”

31 Ot lan-iillimuscha, “Simma ibyega taku? Lu kalan takuʼn, ‘Leɏpu kan Apudyus’ kalala un, ‘Payuggey achi pilati si John lù?’ 32 Ngim lu kalan takuʼn, ‘Leɏpud chi tagu,’ ” Ngim ummogyatcha kan cha tagu, ti mamaticha losan un propetan Apudyus si John. 33 Ot silongbyatancha si Jesus, “Achipunmi ammu.”

Ot kalan Jesus kan chicha, “Achipunku bo ibyega kan chikayu lu silu leɏpuwan chi kalobbongak un mangwa kan cha laoy.”