1 Lummaus pu pigaʼn eɏgew, langulin si Jesus ud Capernaum. Lanchilongeɏʼn awed siya si byeɏoyla. 2 Lachagup cha achuʼn tagu inggala lappun maigewan ulay chi kallangan. Ot imbyegbyegan Jesus chi ugud Apudyus kan chicha. 3 Si hachi, gummatong cha opat un leɏakiʼn bilumbulligencha osaʼn lapalalais un leɏaki ta iyoycha kan Jesus. 4 Ngim lappun in-ilonchaʼn makaachali kan Jesus ti amod cha tagu. Langwa cha pun, ilabutancha otop un byetug Jesus, asicha ot impacheɏa buligla. 5 Laammuwan pun Jesus chi gettok un pammaticha, kalala si hachiʼn lapalalais, “Alakku, lapakawan cha byasuɏm.”

6 Inggew cha uchum un mimistulun chi lintog un umaammuy. Sin-aayumimit cha un kalancha, 7 “Puggey katchi ugud chi allaʼn tagu? Iyisula ga long-egla kan Apudyus. Ti lappun makapakawan si byasuɏ ngim si Apudyus abus.”

8 Tagammun Jesus cha awed si somsomokcha, ot kalala kan chicha, “Puggey katlat chi somsomokyu? 9 Simma lagodgochong un ibyega si lapalalais, ‘Lapakawan cha byasuɏm’ willu ‘Lumibbyatka, aɏam chi oboklu ked malidchaɏanka?’ 10 Allaya maligammuwanyuʼn Sakon un Alak chi Tagu alla kalobbongak utla pita un mamakawan si byasuɏ.” Ot kalala si hachiʼn lapalalais, 11 “Ibyegak kan sika, lumibbyatka, aɏam chi oboklu ya ingkan uwayu!” 12 Ot lummibbyat siya, ilalikamla obokla, ot ummoyon un itutullong cha losan. Laschaawcha losan ot chilaychayawcha si Apudyus un kalancha, “Lappun illila taku si kamatla.”

13 Ummoy kasin si Jesus si teɏanteg chi byeybyey ud Galilee. Lachagup cha achuʼn taguʼn ummoy kan siya ot tiludtuchuwala chicha. 14 Malidtidchaɏan pun siya, illilala si Levi un alak Alphaeus, un ummaammuy si bubuggisan, ot kalan Jesus kan siya, “Tun-ucholak.” Ot lummibbyat si Levi ot litun-ud kan Jesus.* 2:14 Si Greek - Tun-ucholak - piolaʼn uguchon mitun-ud kan Jesus un mandisipulusla.

15 Alla pun un mangan cha Jesus kan cha disipulusla si byeɏoy cha Levi, achu cha lakakan kan chicha un manchachagup si bugis ya uchum un malagbyasuɏ, ti achu cha litun-ud kan siya. 16 Intullong pun cha mimistulun chi lintog un cha Pariseo si Jesus un lakakan kan cha malagbyasuɏ ya cha manchachagup si bugis, ilimuscha kan cha disipulusla, “Puggey makakan kan cha manchachagup si bugis ya cha malagbyasuɏ?”

17 Chingngeɏn ked Jesus chicha summongbyat, “Ha taguʼn lappun sakitla, achipunla masapuɏ chuktuɏ. Ngim cha makasapuɏ ked cha lasakit. Achipulak ummalin mangayeg kan cha lalintog un tagu, ngim cha malagbyasuɏ.”

18 Inggew chi timpuʼn lallaulan cha disipulus John un Mambubunyeg ya cha Pariseo. Si hachi, ummoy cha uchum un tagu lan-imus kan Jesus, “Puggey un chikamiʼn disipulus John ya cha disipulus cha Pariseo ked mangankallayun kami mallaun, ngim cha disipuluslu achipuncha mallaun?”

19 Inyalig Jesus un summongbyat, “Ha makwa kamman un mallaun cha bubuɏun chi leɏakiʼn mangkaseɏ lu awed cha kan siya? Mangancha bò amin! Lu inggew chi leɏakiʼn mangkaseɏ kan cha bubuɏunla, achipuncha mallaun. 20 Ngim gumatong chi timpu un miyachayu chi likaseɏ kan chicha, ked hachi asicha mallaulan.”

21 Ot kasin lan-alig si Jesus un kalala, “Lappun mangitekup si baruʼn luput si chachaan un silup. Ti ha baruʼn luput un mitekup, pissayola chachaan un silup ked maam-amod chi pissayla. 22 Ya lappun tagù mangigga si ilabuyu un byeyas si chachaan un giledchang un iiggaan† 2:22 Cha Judio iggacha byeyas si gedchang chi keɏching (goat leather). ti bumtak chi hachiʼn gedchang ked misuyat chi byeyas ya mayam-an chi gedchang. Ngim ha ilabuyu un byeyas maigga si baruʼn giledchang un iiggaan.”

23 Osaʼn Sabyechu un man-illongan cha Judio, langoy cha Jesus kan cha disipulusla si pappayaw un lamuɏ-an si wheat un isun chi pagoy. Ot pummuting cha disipulusla ot kilutimancha. 24 Kalancha Pariseo kan Jesus, “Itullonglu ked chi pin-an cha disipuluslu koon, siluplingcha lintog taku un Judio un mipalit chi mangwa si katlat lu Sabyechu?”

25 Summongbyat si Jesus, “Achipunyu kamman bilasa killingwan David ya cha kakadwala si labitilancha ya lakasapuɏancha si makan? 26 Lilumlok si David si byeɏoy Apudyus si timpun Abiathar un kangatuwan un pachi, ot illaɏala tilapay un lichatun kan Apudyus un mipalit si lintog lu kalon cha uchum un tagu ti abus cha papachi mangan.‡ 2:26 v. 25-26 Leviticus 24:9, 1 Samuel 21:1-6 Ngim killan David chi hachiʼn tilapay ot illidchela cha bubuɏunla.”

27 Ot inyalungus Jesus un kalala, “Ha Sabyechu un man-illongan, killingwan Apudyus un bumaɏuwan cha tagu, chakampun si killingwan Apudyus cha taguʼn bumaɏuwan chi Sabyechu. 28 Ked Sakon un Alak chi Tagu, alla kalobbongak un mangibyega lu silu makwa si Sabyechuʼn man-illongan.”