1 Gilamput pun Jesus intudtuchu cha alla, tilelala ud Galilee ot ummoy si sakupon Judea un chomangon chi chewwang un Jordan. 2 Amo-amod cha taguʼn litun-ud kan siya ot pilalin-awala cha lasakit.

3 Ummoy cha uchum un Pariseo kan Jesus ot impachaschaʼn sikapan siya un kalancha, “Ha ipalubus kamman chi lintog un ichangan chi leɏaki asawala ulay byaɏanglan gapu?”

4 Summongbyat si Jesus, “Ha achipunyu bilasa liigiliʼn ugud Apudyus un kalala si chamchamu un langwaan Apudyus si tagu, killingwala leɏaki ya byebyai.* 19:4 Genesis 1:27 5 Ot kalala bo, ‘Hachi gapula un telan chi leɏaki cha amala kan ilala ked litipug kan asawala ked mambyalincha ossaan un long-eg.’† 19:5 Genesis 2:24 6 Ked chakampun si chuwachaʼn long-eg ngim ossaan un long-eg. Ked lappun kalobbongan chi tagu un mampasila si lantimpuyugon Apudyus.”

7 Ot ilimus bo cha Pariseo, “Puggey un imbilin Moses lù un idchen chi leɏaki asawala si kasuɏatan un man-ichangcha, asila ot paoyolon?”

8 Kalan bo Jesus, “Impalubus Moses un ichanganyu asawayu gapu si kilatangkin chi somsomokyu, ngim chakampun si katchi panggop Apudyus si chamu. 9 Ked ibyegak kan chikayu, lu awed leɏakiʼn mangichang si asawala malaksig lu lakachegchegas, makabyasuɏ si chegchegas lu mangasawa si sabyaliʼn byebyai.”

10 Kalan cha disipulusla, “Lu katchi makwa si man-asawa, un-ulloy chi achipunta mangasawa.”

11 Ngim kalala kan chicha, “Chakampun si losan un tagu makakopya si lait, ti abus cha allaʼn langidchen Apudyus. 12 Ti lakalakalasi gapun chi achipun chi leɏaki mangasaw-an. Ti cha uchum, liyalakchaʼn katchi, ked cha uchum, gapu ta lakapuncha. Cha uchum, achipuncha mangasawa mipagapu si ayatchaʼn mansimbi si Mampangatan Apudyus. Ked lu silu makatungpeɏ si tudtuchun alla, koola otyan.”

13 Illinggew cha uchum un taguʼn langiyoy kan cha aalakcha kan Jesus ta ipatayla imala kan chicha ya iluwaluwala chicha. Ngim ilomɏan cha disipulus chicha. 14 Ngim kalan Jesus kan chicha, “Palubusanyu cha aalak un umali kan sakon. Achiyu ipalit chicha, ti cha katlaʼn aalak chicha cha mipati si Mampangatan Apudyus ud langit.” 15 Oli pun impatayla imala kan chicha ot ummoyon.

16 Si osaʼn eɏgew, ummoy chi osaʼn bumaru kan Jesus ot kalala, “Mistulu, simma bibiɏuʼn kook ta mataguwak kan Apudyus ing-inggala?”

17 Ot kalan Jesus kan siya, “Puggey imuson kan sakon mipanggop chi bibiɏu? Ti abus si Apudyus si bibiɏu. Lu piom un makatagu kan siya si ing-inggala, masapuɏʼn patiyom cha bilinla.”

18 Ot ilimusla, “Simma bilinla un masapuɏʼn kook?”

Ot kalan bo Jesus, “Achika pumatoy, achika makachegchegas, achika man-akaw, achim tistiguwan chi chakampun si tuttuwa. 19 Masapuɏʼn potpotgom cha amam kan ilam,‡ 19:19 Exodus 20:12-16, Deuteronomy 5:16-20 ya ay-ayatom cha asintatagum un isun chi man-aayatlu si long-eglu.”§ 19:19 Leviticus 19:18

20 Ot kalan chi leɏaki, “Inggan chi kabyen-ogku ilaminku killingwa cha bilin, ot simma langkuyangak?”

21 Ot kalan Jesus kan siya, “Lu piom un lappun mangkuɏangam, man-ingilaka kan cha losan un kukkuwam ked idchom chi ngilala kan cha kapus, ta langit chi manguppulam si kilabyaklanglu. Ked umalika, mitun-ud kan sakon.” 22 Ngim chingngeɏn pun chi hachiʼn leɏaki imbyegan Jesus, ummoyon un manchachauy ti amod chi bilaklangla.

23 Oli pun kalan Jesus kan cha disipulusla, “Tuttuwa ibyegak kan chikayu, patunged kakaskun chi mipatiyan chi byaklang si mampangatan Apudyus. 24 Ti lagodgochong chi lumlokan chi kameɏ si abut chi talud lu ha mipatiyan chi byaklang si mampangatan Apudyus.”

25 Chingngeɏn pun cha disipulus chi hachi, patunged cha laschaaw. Ot kalancha, “Simman lù cha makwaʼn matatagu?”

26 Ngim intullong Jesus chicha ot kalala, “Lu tagu mangwa, achipunla kabyeeɏan, ngim lu si Apudyus, kabyeeɏala losan.”

27 Ot kalan Peter, “Somsomkom, tilelanmi cha losan ta piga gey lu mitun-ud kami kan sika. Simma magalebmi?”

28 Ot kalan Jesus kan chicha, “Tuttuwa ibyegak kan chikayu, Sakon un Alak chi Tagu, lu chumtong chi man-Ariyak si baruʼn lubung, chikayu un lituntun-ud kan sakon mantugew kayu bo kan cha lasawaɏan si chuwaʼn trono un makaturay kan sakon. Ked chikayu manguis kan cha simpuɏu ya chuwaʼn galak Israel. 29 Ked lu silu malelan si byeɏoyla, susuludla, amala, ilala, cha aalakla ya cha pitala mipagapu kan sakon, maminggasut chi awatola lu cha tilelala ked maidchen si biyeg un mallalayun. 30 Ngim achu cha langatun tagu si sala ked mibyabyacha si umaliʼn eɏgew. Ya achu cha labyabya un tagu si sala ked mipangatucha si umaliʼn eɏgew.”