12
Mipanggop Si Sabyechuʼn Man-illongan
(Mrk. 2:23-28; Luk. 6:1-11)
1 Si osaʼn Sabyechu un man-illongan cha Judio, langoy cha Jesus ya cha disipulusla si pappayaw un lamuɏ-an si wheat. Labitin cha disipulus Jesus ot pummutingcha si kilutimancha. 2 Intullong pun cha Pariseo chi alla, kalancha kan Jesus, “Itullonglu ked chi pin-an cha disipuluslu koon, siluplingcha lintog taku un mipalit chi pumuting ya mangkutim si Sabyechu.”* 12:2 Cha Pariseo ked uchum un Judio, sabyali secta willu grupucha. Osaʼn grupucha. Mamaticha kan cha losan un Chachaan un Liigilin Ugud Apudyus ked masapuyn tuttuwaonchaʼn ustu-ustu. Chilog-ancha si achu un bilin cha lintog un illidchon Apudyus kan Moses. Un-ulloyoncha tuttuwaon cha ugalin cha tagu lu tuttuwaoncha lintog Apudyus. Aginsasantucha ngim malagbyasuɏcha si somsomokcha ya leyastugcha. Cha uchum biligbigcha si Jesus un Messias ya lambyabyawicha. Ngim kaachuwan kan chicha issancha si Jesus ya pionchaʼn patoyon siya.
3 Ot kalan Jesus kan chicha, “Ha achipunyu kamman bilasa killingwan David ya cha kakadwala si labitilancha?” 4 “Lilumlok si byeɏoy Apudyus ot killancha tilapay un lichatun kan Apudyus un ipalit chi lintog ti abus cha papachi si mangan. Ngim killanla mit laing ya illidchela cha kadwala.† 12:4 1 Samuel 21:1-6, Leviticus 24:9 5 Ya osa bo, ha achipunyu bilasa si lintog Moses un mangkawachi cha papachi si templo si Sabyechuʼn man-illongan? Siluplingcha lintog un mipalit un mangkawachi, ngim achipuncha mit makabyasuɏ. 6 Ngim ibyegak kan chikayu alla, awed utla chi osa un langatngatu lu ha templo.‡ 12:6 Ha templo chi kapotogen un lugeɏ utla pita kan cha Judio. 7 Awed chi piok un maawatanyu. Liigili si ugud Apudyus un kalala, ‘Achipunku potpotgon cha ayam un ichatchatunyu kan Sakon. Ngim siyad potpotgok chi kumachegu kayu kan cha asintataguyu.’ Lu laawatanyu otyan chi pion chi hachiʼn uguchon, achiyu otyan pabyasuɏon cha lappun byasuɏcha. 8 Ti Sakon un Alak chi Tagu, alla kalobbongak un mangibyega lu silu makwa si Sabyechu un man-illongan.”§ 12:8 Daniel 7:13-14 Alak chi Tagu - iluseɏn Jesus mipanggop kan siya mismu. Ha piolaʼn uguchon ked makataguwala kan cha kadwala utla pita. Ha milasilala kan cha chogalaʼn tagu un siya Apucha ya siya malakcheɏ kan chicha.
Ha Lamalin-awaan Jesus Si Lapikon Chi Imala
(Mrk. 3:1-6; Luk. 6:6-11)
9 Ummoyon udchi si Jesus ot ummoy si sinagogacha. 10 Inggew chi leɏakiʼn lapikon chi osaʼn imala ya inggew bo cha uchum un mansingisingitcha si mangichiɏumancha kan Jesus. Ot kalancha kan siya, “Ipalit kamman chi lintog taku lu palin-awaon chi lasakit si Sabyechuʼn man-illongan?”
11 Ot kalan Jesus, “Lungay awed osaʼn keɏliluyu ta liɏus-ub si abut si Sabyechuʼn man-illongan, achipunlu kamman umoy eɏan? 12 Lapotpotog chi tagu lu ha keɏlilu. Ked tuttuwaʼn chakampun si masupling chi lintog taku lu tuɏungan taku cha tagu si Sabyechuʼn man-illongan.” 13 Oli pun kalan Jesus si leɏakiʼn lapikon chi imala, “Uyachom chi imam.” Iluyedla ot bummaɏu imala un isun chi osa. 14 Ot ummoyon cha Pariseo ta umoycha mantutuɏagen lu hilu in-ilonchaʼn mangtoy kan Jesus.
Si Jesus Chi Chilutukan Apudyus
15 Tilagammun pun Jesus chi panggopcha, ummoyon si hachiʼn ili. Ot achu cha taguʼn litun-ud kan siya. Ot kilaanla cha saksakitcha. 16 Ngim bililinla chicha ta achipuncha ibyegbyega chi mipanggop kan siya. 17 Killingwala cha laoy ta matungpeɏ imbyegan propeta Isaiah un kalala,
18 “Allaya bubùulok un chilutukak. Siya tagtagopok, ya siya bo masmas-omak.
Ibuunku Ispirituk kan siya ta siya mangiwaɏaweg kan cha Gentil
si in-ilon chi taguʼn mapalintog si sangwalan Apudyus.
19 Achipun makasubog willu achipun mampokaw,
ya achipunla isong-ak un man-ugud si kekkesa.
20 Achipunla man-awichen cha lakapsut chi pammaticha,
ya laalus kan cha maam-amis. Ituɏuyla kawachila inggalad
matungpeɏ ustu un panggop Apudyus.* 12:20 Ha piolaʼn ibyega si allaʼn pangngalig ked si Jesus achipunla man-awichen cha tagu un lachismaya willu lakapsut chi pammaticha ngim tuɏungala chicha.
21 Ya lamlamaon cha losan un tagu un siya Malagu kan chicha.Ӡ 12:21 v. 18-21 Isaiah 42:1-4
Si Jesus Ya Si Beelzebul
(Mrk. 3:20-30; Luk. 11:14-23)
22 Oli pun illiyoycha kan Jesus chi osaʼn leɏakiʼn kiluɏap ya ilumeɏn chi aɏan. Ot pileɏyaw Jesus chi aɏan un inggew kan siya ot lakatullong ya lakaginga hachiʼn leɏaki. 23 Ot laschaaw losan cha taguʼn langitutullong si killingwan Jesus ot kalancha, “Siya lin chi galak David un uuwayon taku?”
24 Ngim chingngeɏn pun cha Pariseo hachi, kalancha, “Makwaʼn peɏyawola aɏan ti si Beelzebul un pangat cha aɏan chi langatod si kilabyelinla un mameɏyaw kan cha aɏan.”
25 Ammun Jesus chi awed si somsomokcha ot kalala kan chicha si pangngalig, “Ulay siluʼn turay lu lappun timpuyug cha tagu un mantitillalungcha mampapatoy, lalakachaʼn mayam-an. Katchi bo makwa si ili willu simbyeyan, lu lappun timpuyugcha un mantitillalungcha mampapatoy maasibbyakawcha. 26 Siya bo, lu kalanyu un si Satalas chi langatod si kilabyelinkuʼn mameɏyaw si aɏan, himma ilon cha aɏan un mantitillalung mampapatoy? Lu katchi kooncha achipun mallalayun chi turaycha. 27 Lu kalanyun si Beelzebul chi langatod si kilabyelinkuʼn mameɏyaw kan cha aɏan, simman bo langatod si kilabyelin cha bubuɏunyuʼn mameɏyaw kan cha aɏan lù? Chicha mampaloklok un langkamali kayu. 28 Ngim ha katuttuwaala, ha Ispiritun Apudyus chi langatod si kilabyelinku un mameɏyaw si aɏan, ked siya mangipaloklok un gummatong chi mampangatan Apudyus kan chikayu.”
29 Ot lan-alig si Jesus ta ipakaammulaʼn lakoskoscheɏ pallakabyelinla lu si Satalas. Ot kalala, “Lappun makaslok si byeɏoy chi mangkoscheɏʼn tagu ked lan-aɏa kan cha kukkuwala lu achila yan ulaon byaɏuchon chi mangkoscheɏʼn tagu asila ot samsamon cha kukkuwala.
30 “Lu silu achipun tumimpuyug kan sakon siya bumusuɏ kan sakon. Ya lu silu achipun tumuɏung kan sakon un manguppun kan cha tagu, ked siya umabuɏ kan cha taguʼn umali kan sakon. 31 Ibyegak kan chikayu, makwaʼn mapakawan cha losan un byasuɏ ya cha man-ugud si lawwing mipanggop kan Apudyus. Ngim lu silu mangibyega si lawwing mipanggop si Ispiritun Apudyus, achipun mapakawan. 32 Ked lu silu mangibyega si lawwing mipanggop kan Sakon un Alak chi Tagu, makwaʼn mapakawan. Ngim lu silu mangibyega si lawwing mipanggop si Ispiritun Apudyus, achipun makwaʼn mapakawan si sala ya ing-inggala.”
Ha Kayu Ya Bunga
(Luk. 6:43-45)
33 Oli pun lan-alig si Jesus un kalala, “Ha bibiɏuʼn kayu, bibiɏu bo mambubungala. Ngim ha lawwing un kayu, lawwing bo mambubungala. Ti milasin chi kayu si mambubungala. 34 Chikayuʼn galak chi uɏog! Ma in-ilonyuʼn lawwik un man-ugud si bibiɏu? Ti ha awed si somsomok, siya bo mibyalikas chi tupok. 35 Ha bibiɏuʼn tagu, pasig bo bibiɏu cha uguchola ti ha awed si somsomokla ked ustu-ustuʼn bibiɏu. Ngim ha taguʼn lawwing ked lawwilawwing bo awed si somsomokla, ked lawwing bo cha uguchola. 36 Tuttuwa ibyegak kan chikayu, lu chumtong chi manguisan Apudyus kan cha tagu, kacha osa songbyatala kan Apudyus cha losan un ilugudlaʼn lappun simsimbila. 37 Ti losan un ilugudla, siya useɏon Apudyus un manguis kan siya, hachi mambyeseɏala lu lakabyasuɏka willu achipun.”
Lampakwacha Si Lakaskaschaaw Kan Jesus
(Mrk. 8:11-12; Luk. 11:29-32)
38 Ot kalan cha uchum un Pariseo ya cha uchum un mimistulun chi lintog kan Jesus, “Mistulu, mangipailaka si lakaskaschaaw kan chikami ta mangagammuwanmi un lampeɏpu kan Apudyus chi pallakabyelinlu.”
39 Ngim kalan Jesus kan chicha, “Patunged kayu lawwing un tagu si salaʼn lolap. Lan-awichenyu si Apudyus. Ipatutyuʼn mangipailaak si lakaskaschaaw, ngim lappun ipailak. Siyà abus un ipailak chi lakaskaschaaw un isun chi lakwa kan Jonah un propeta si awi. 40 Ti si Jonah, illinggew si buwang chi iyu si tiɏuʼn eɏgew ya tiɏuʼn labi. Isuk un ilawagenchaʼn Alak chi Tagu, milobolak si tiɏuʼn eɏgew ya tiɏuʼn labi.‡ 12:40 Jonah 1:17, ha osaʼn piolaʼn uguchon si Greek - inggewak si milobolak si pita, ked lugeɏ cha latoy ud Hades. Illinggew si Jesus si tiɏun eɏgew ya tiɏun labi. 41 Lu chumtong chi timpu un manguisan Apudyus kan cha tagu, pabyasuɏon chikayu kan cha taguʼn tiludtuchuwan Jonah ud Nineve, ti lambyabyawicha si byasbyasuɏcha si chingngeɏcha imbyegbyegan Jonah.§ 12:41 Jonah 3:5 Ngim chikayu, ulay ammuyu un allaak si sala un langatngatu lu Jonah, achipun kayu pay laing tumuttuwa si tudtuchuk. 42 Si hachiʼn eɏgew un manguisan Apudyus kan cha tagu, lumoswa byebyaiʼn Reyna ud Sheba si awi, ked pabyasuɏon chikayuʼn tagu si salaʼn lolap. Ti ulay lu adchayuwan chi lampeɏpuwalaʼn ili, ummoyla inggettok chingngeɏ lasilib un tudtuchun Ari Solomon.* 12:42 1 Kings 10:1-10 Ngim chikayu, ulay allat kan chikayu si sala langatngatu lu si Solomon, achipunyu chongɏon.”
Ha Langulilan Chi Aɏan Si Tagu
(Luk. 11:24-26)
43 Ot intuɏuy Jesus lan-alig un kalala, “Lu telan chi aɏan chi taguʼn laaɏan, umoy si lugeɏʼn lappun chelum ta mansingit si lugeɏ un inggewala. Ked lu lappun maochesala, 44 kalala si somsomokla, ‘Mangulilak si byeɏoyku un lampeɏpuwak.’ Ked lu mangulin ya ochesalaʼn lappun inggew ya lagamput pummeɏkas ya ammala lileɏam. 45 Ked umoy man-ayeg si pitu un kadwalaʼn aɏan un sillumawik lu siya. Ked lumlokcha ya inggewcha kan siya. Singkumaɏu un lawwik chi kasasaed chi hachiʼn tagu lu ha chamu. Katchi bo makwa kan chikayuʼn mangkaɏawing un tagu si salaʼn lolap.”
Cha Ibilang Jesus Un Ilala Ya Susuludla
(Mrk. 3:31-35; Luk. 8:19-21)
46 Lan-ugu-ugud si Jesus kan cha amod un tagu si gummatngan ilala ya cha susuludlaʼn leɏaki. Illinggewchaʼd paway ti pionchaʼn makaugud kan siya. 47 Ot imbyegan chi osa kan siya, “Awed si ilam ya cha susuludlu ud paway, pioncha un makaugud kan sika.”
48 Ot summongbyat si Jesus kan siya, “Silu si ilak ya silu cha susuludku?” 49 Ot intuchula cha disipulusla ot kalala, “Allaya cha ibilangku un ilak ya cha susuludku. 50 Ti lu silu mangwa si pion Amak un awed langit, chicha cha ibilangkuʼn ilak ya susuludku.”
*12:2 12:2 Cha Pariseo ked uchum un Judio, sabyali secta willu grupucha. Osaʼn grupucha. Mamaticha kan cha losan un Chachaan un Liigilin Ugud Apudyus ked masapuyn tuttuwaonchaʼn ustu-ustu. Chilog-ancha si achu un bilin cha lintog un illidchon Apudyus kan Moses. Un-ulloyoncha tuttuwaon cha ugalin cha tagu lu tuttuwaoncha lintog Apudyus. Aginsasantucha ngim malagbyasuɏcha si somsomokcha ya leyastugcha. Cha uchum biligbigcha si Jesus un Messias ya lambyabyawicha. Ngim kaachuwan kan chicha issancha si Jesus ya pionchaʼn patoyon siya.
†12:4 12:4 1 Samuel 21:1-6, Leviticus 24:9
‡12:6 12:6 Ha templo chi kapotogen un lugeɏ utla pita kan cha Judio.
§12:8 12:8 Daniel 7:13-14 Alak chi Tagu - iluseɏn Jesus mipanggop kan siya mismu. Ha piolaʼn uguchon ked makataguwala kan cha kadwala utla pita. Ha milasilala kan cha chogalaʼn tagu un siya Apucha ya siya malakcheɏ kan chicha.
*12:20 12:20 Ha piolaʼn ibyega si allaʼn pangngalig ked si Jesus achipunla man-awichen cha tagu un lachismaya willu lakapsut chi pammaticha ngim tuɏungala chicha.
†12:21 12:21 v. 18-21 Isaiah 42:1-4
‡12:40 12:40 Jonah 1:17, ha osaʼn piolaʼn uguchon si Greek - inggewak si milobolak si pita, ked lugeɏ cha latoy ud Hades. Illinggew si Jesus si tiɏun eɏgew ya tiɏun labi.
§12:41 12:41 Jonah 3:5
*12:42 12:42 1 Kings 10:1-10