1 Lagamput ka hachi, chilutukan Apu Jesus cha pitumpuɏu ya chuwaʼn lelleɏaki. Ot silinchudwala imbuun chicha ta umun-ulacha umoy si kacha ili ya lugeɏ un simsimmokla un ayan. 2 Kalalaʼn lan-alig kan chicha, “Achu-achu cha maali, ngim akit cha man-ali. Ked manchawat kayu kan Apudyus un singkuwa kan cha laoy un maali ta mangibuun si achuʼn man-ali.” 3 Ot pilalibbyat Jesus chicha, “Ingkayu! Ibuunku chikayu kan cha lawwing un tagu un isuyu keɏlilun likamos kan cha kaog-ogyat un laatap un asu. 4 Achi kayu mangiyawit si pilak, pasiking, sancheɏ ya achi kayu makaug-uggud kan cha tagu si chaɏan. 5 Lu lumlok kayu si osaʼn byeɏoy, ulaonyu ibyega si cha inggew un, ‘Si Apudyus chi awed kan chikayu.’ 6 Ked lu pionchaʼn mammangili kan chikayu, tuttuwaʼn binchisyulan Apudyus chicha. Ngim lu achipun cha sumayakaw, mangulin kan chikayu ibinchisyun Apudyus kan chicha. 7 Ked lu mangiliyon chikayu, inggew kayu si hachiʼn byeɏoy. Achi kayu man-attu-attun. Lu silu ichuslugcha un kalonyu ya ilumonyu, achi kayu mangamili si kalonyu ti hachi byetug chi labbuyu. Ti lobbonglan matangchelan cha mangkawachi. 8 Lu lumlok kayu si osaʼn ili ya mangiliyon chikayu, kalonyu lu silu ichuslugcha kan chikayu. 9 Palin-awaonyu cha lasakit si hachiʼn ili ya ibyegayu kan chicha, ‘Chancheli gumatngan chi Mampangatan Apudyus kan chikayu.’ 10 Ngim lu lumlok kayu si ili ya achipun chikayu mangiliyon, inggew kayu si kapappawayancha ya ibyegayu, 11 ‘Ulay chi tapuk si iliyu un pillumkot si ikimi pukpukanmi ta mangammuwanyu un kiged kayu si machusaanyu. Ngim ammuwonyu otyan un chanchali gumatngan chi Mampangatan Apudyus kan chikayu, ngim ilissanyu.’ 12 Tuttuwa allaʼn ibyegak kan chikayu, un lu chumtong chi eɏgew un manguisan Apudyus si losan un tagu, singkumaɏu chusan cha tagu si hachiʼn ili lu chusan cha iSodom.* 10:12 Genesis 18-19”

13 Intuɏuy Jesus un lan-ugud, kalala, “Kadchegu kayu un iKorazin ya iBethsaida. Lu killingwak ud Tyre ya Sidon† 10:13 Cha billumɏoy ud Tyre ya Sidon si awi, lanchilameg cha ugalicha un keɏwikancha. Ha imbyegan cha propeta si machusacha ked mabyasan si Isaiah 23:1-18; Ezekiel 26-28; Amos 1:9-10 cha allaʼn lakaskaschaaw un isun chi killingwak ud iliyu, labyeyeg otyan un lambyabyawicha kan cha byasuɏcha, si ummamuyancha un lansilupancha si guti ya langiggacha si chebu si uɏucha un mangipain-ancha un lambyabyawicha. 14 Ngim lu chumtong chi eɏgew un manguisan Apudyus si losan un tagu, singkumaɏu machusaanyu lu cha iTyre ya iSidon. 15 Ked chikayu un iCapernaum, ha lamlamaonyun michayaw kayu ud langit ing-inggala? Achipun! Ti ibyellun Apudyus chikayu ud Impiyeɏlu.”

16 Oli pun kalan Jesus kan cha disipulusla, “Ha taguʼn chumngeɏ kan chikayu, sakon chi chongɏola. Ngim lu silu mangissan kan chikayu, issala bo sakon, ked sigulachu boʼn issala langibuun kan sakon.”

17 Langulin cha hachiʼn pitumpuɏu ya chuwa un imbuun Jesus un amod chi galascha. Ot kalancha kan Jesus, “Apu, ulay cha aɏan tummuttuwacha kan chikami si pileɏyawmi chicha si ngachenlu!”

18 Kalan Jesus kan chicha, “O, Illilak si Satalas un laodcheg lampeɏpuʼd langit un isun chi lasasliit un kilat. 19 Chongɏonyu! Illidchek chikayu si pallakabyelin un guschenyu uɏog ya geyyaman ya mangabyak si kabyeeɏan chi kabusuɏ. Lappun makwa kan chikayu. 20 Ngim achipun kayu otyan manggalas gapu ta tummuttuwa cha aɏan kan chikayu, ngim mangganggalas kayu ti lailista ngachenyu ud langit.”

21 Si hachiʼn uras, lagalas si Jesus gapu si Ispiritun Apudyus. Ot kalalan lalluwalu, “Ama, un Ap-apu ud langit ya pita. Manyamalak kan sika ti impakaammum chi katuttuwaan kan cha achipun lakaacheɏ ked inlimodlu kan cha masisilib ya cha lakaacheɏ. O, Ama, manyamalak kan sika ti siya piom un makwa.”

22 Intuɏuy Jesus un lan-ugud, “Impiyeɏn Amak cha losan kan sakon. Lappun uchum si langagammu si kila-Apudyusku lu achi abus si Ama un Apudyus. Ya lappun bo uchum si mangagammu kan Ama un Apudyus lu achi abus chi Alak ya cha pililiyak un mangipakaammuwan.”

23 Oli pun lansagung si Jesus kan cha disipulusla ot kalalaʼn langiyaggakaw kan chicha, “Pian kayu ti mailayu cha itutullongyu! 24 Ibyegak kan chikayu, achu cha propeta ya cha Ari un pionchaʼn mangitullong si allaʼn itutullongyu, ya pionchaʼn chongɏon cha chochongɏonyu. Ngim achipuncha mitullong ya makadngeɏ.”

25 Si osaʼn eɏgew, summiked chi osaʼn mistulun chi lintog ta sikapala si Jesus, kalala, “Mistulu, simma kook ta matataguwak kan Apudyus ing-inggala?”

26 Kalan Jesus kan siya, “Simma liigili si lintog? Simma man-aawatlu?”

27 Summongbyat chi leɏaki, un kalala, “Masapuɏʼn ayatom si Apudyus si losan un somsomoklu, si losan un kalichodwam, si losan un koscheɏm ya si losan un kilalainglu. Ya masapuɏʼn ayatom chi asintatagum un isun chi man-aayatlu si long-eglu.”‡ 10:27 Deut. 6:5; Leviticus 19:18

28 Kalan Jesus kan siya, “Ustu insongbyatlu, koom laoy ot matataguka ing-inggala.”

29 Ngim pion chi mistulun chi lintog un achipun mabiilan si imbyegala ot ilimusla kan Jesus, “Simman cha asintataguk?”

30 Ot lan-alig si Jesus un kalala, “Inggew chi osaʼn leɏakiʼn lampeɏpuʼd Jerusalem un man-osog umoy ud Jerico. Inggew pun si chaɏan, insalob cha wanted siya ot illaɏacha losan un keɏgala, ulay silupla, pilang-okcha ot tilelan cha siya un agin-oottoyon si igid chi kesa. 31 Liyaspuɏʼn lan-osog chi osaʼn pachin cha Judio si hachiʼn kesa ot intullongla pun siya, liligligela. 32 Umooli pun, langoy bo osaʼn galak Levi.§ 10:32 Cha galak Levi, chicha cha tummuɏung kan cha papachi si kawachicha si templo. Lichuum pun si inggewan chi leɏaki, intullongla siya ot liligligela bo. 33 Ngim lapalos pun, lummaus chi osaʼn Samaritan* 10:33 Cha tagud Samaria ya cha Judio, lawingoncha kacha osa kan chicha. Itullongyu John 4:9, 8:48 un umoy mambyaat. Lichuum pun si inggewan chi leɏaki, intullongla siya ot kilacheguwala. 34 Kilatamla siya ot ilagasala sugatla si apɏus ya byeyas ot bilacheɏla. Asila ot ingkeɏga si kabyayula ot illiyoyla siya si osaʼn maabyangan un byeɏoy. Ot ilayyuwalala siya. 35 Labigat pun, illidchola chuwaʼn pappalatan pilak si simbyeɏoy ot kalala kan siya, ‘Ayyuwalam siya ked lu mangkuɏang chi allaʼn pilak, asik byeyachen lu mangulilak.’ ”

36 Ilimus Jesus si hachiʼn mistulun chi lintog, “Si uwam un kasomsomkan, silu kan cha tiɏu chi tuttuwan cheeg chi hachiʼn pilang-ok cha wanted?”

37 Summongbyat chi mistulun chi lintog, “Ha taguʼn kummachegu kan siya.”

Ot kalan Jesus kan siya, “Ingkan ked koom chi katlat.”

38 Lalidtidchaɏan pun cha Jesus ya cha disipulusla, lichuumcha si osaʼn ili. Ot limangilin chi osaʼn byebyaiʼn mangngachen Martha. 39 Inggew chi suludla un mangngachen Mary, un ammala inyamuy si sangwalan Jesus ot lanchongeɏ si intudtuchula. 40 Ngim machanchalagen si Martha un mangisagala si kaloncha, ummoy kan Jesus ot kalala kan siya, “Apu, ha lappun kamman anyamanla kan sika un bilay-alak gey kan suludkuʼn mangisagala si kalonyu? Ibyegam u kan siya ta tuɏungalak!”

41 Ngim kalan Jesus kan siya, “Martha, Martha, amod chi manchachaleglu mipanggop si achuʼn byaleg un makwa. 42 Ngim ossaan chi kasapuɏan. Siyad pililiyan Mary chi kabiɏuwan, ked achipun makaan kan siya.”